Елордада генерал Сағадат Нұрмағамбетов атындағы «Жас Ұлан» республикалық әскери мектебіне жаңадан қабылданған 10-сынып ұландарының салтанатты түрде ант қабылдау рәсімі өтті.
Әскери киімдері бойларына жарасқан, сымдай тартылған 62 ұлан сап түзеп, арнайы әзірленген кең залға енді.
Ортаға көк байрағымыз әкелініп, іле Әнұран шырқалғаннан кейін ұландардың ант қабылдау рәсімі басталды. Аты-жөндері аталған сәтте саптан алға нық басып шығып, ант мәтінін мәнерлеп оқыған жас өскіндердің сенімді де ашық дауысы құлаққа жағымды естіледі, жүрегіңе жылы тиеді.
Жиын барысында әскери мектеп басшысы, полковник Мұхтар Майкеевпен аз-кем сұхбаттасуға мүмкіндік болды. Біздің қойған сауалымызға орай мектеп басшысы: «Мемлекет басшысының бастамасымен құрылған, 1999 жылдың 4 қарашасында ресми түрде ашылған «Жас Ұлан» республикалық әскери мектебі – еліміздің Қарулы Күштері саласына қызмет етуді мақсат еткен жеткіншектерді тәрбиелеуде өзіндік орны бар білім ошағы. Тәуелсіз Қазақстанның Қарулы Күштері үшін әскери қызметкерлерді мектеп қабырғасынан дайындау ісіне Елбасы Нұрсұлтан Назарбаевтың айрықша көңіл бөліп келе жатқанының арқасында бұл әскери мектеп жақсы жақтарымен көрініп келеді. Құрылғалы бергі 17 жылдың ішінде 700-ден астам жас түлекті тәрбиелеп шығарған мектептің тұсауын Елбасының өзі кескені, сондай-ақ, білім ұясына Кеңес Одағының Батыры, Халық Қаһарманы, қазақ халқының аты аңызға айналған перзенті, Тәуелсіз Қазақстанның тұңғыш Қорғаныс министрі, армия генералы Сағадат Нұрмағамбетов есімінің берілуі біздің ұжымға үлкен жауапкершілік жүктейді. Міне, өздеріңіз куә болып отырғандай, мектебімізге биыл қабылданған 62 оқушы ант қабылдау үстінде. Бұл шараның маңызы өте зор. Өйткені, шәкірттеріміз осы ант қабылдау арқылы өздерінің аса жауапты жолды таңдағандарын терең сезіне түседі, – деді.
Одан әрі полковник М.Майкеев 2015 жылдан бастап қабылдау ережесіне өзгертулер енгізіліп, мектепке 10-сыныптан бастап оқушылар қабылданатынын, мектеп Жарғысына сәйкес әскери пәндер және күшейтілген дене дайындығы, мемлекеттік және шет тілдері тереңдетіліп оқытылатынын, мұнда 420 тәрбиеленушіге білім беру қарастырылғанын атап өтті. Сонымен бірге, ол мектепті бітірушілердің 80 пайызы Қазақстан Республикасы Қорғаныс министрлігінің, Ресей, Беларусь, Түркия мемлекеттерінің жоғары әскери оқу орындарында білім алып жатқанын жеткізді. Оның сөзіне қарағанда, қазіргі таңда мектепте еліміздің 14 облысынан, Астана, Алматы қалаларынан келген тәрбиеленушілер, 14 ұлттың өкілдері білім алуда. Мектепте тәрбиеленушілердің құрамында жетім балалар, қамқорлыққа алынған өскіндер, көп балалы отбасының перзенттері, ата-аналары мүгедек жеткіншектер, әскери қызметшілердің балалары бар. Бұлар тәрбиеленушілердің жалпы санының 50 пайызын құрайды екен.
Ант қабылдау рәсімі аяқталған соң Қорғаныс министрлігінің өкілдері, ардагерлер, ұстаздар мен ата-аналар сөз сөйлеп, жас ұландарға табыс тілеп, ақ тілектерін арнады. Өз кезегінде ант қабылдаған жас өрендер де Қорғаныс министрлігінің басшылығы мен ұстаздарына алғыстарын білдіріп, Тәуелсіз Қазақстанның жас Отан қорғаушылары ретінде талап үдесінен шығатындарына сенім білдіреді.
Бұдан кейін оқуға жаңадан қабылданған 4-оқу-ротасы ұландарынан құралған көркемөнерпаздар тобы келген қонақтар мен ата-аналарға арнап концерттік бағдарлама ұсынды. Соңында арнайы шақырылған қонақтар мен ата-аналар мектептің жалпы жағдайымен танысты.
Жолдыбай БАЗАР,
«Егемен Қазақстан»
Астана
Суреттерді түсірген
Орынбай БАЛМҰРАТ
