Көптеген заңнамаларға экстремизм мен терроризмге қарсы іс-қимылдарды жетілдіру мәселелерін қарастырған өзгерістер енгізу жөніндегі заң жобасы Мәжілісте бірінші оқылымда мақұлданды. Осыған орай біз депутаттар Қуаныш СҰЛТАНОВ пен Мәулен ӘШІМБАЕВТАН қысқа сұхбат алған едік.
– Қуаныш Сұлтанұлы, алдымен сіздің пікіріңізді білсек. Бұл өзгертулердің маңызы қандай?
– Біріншіден, заң жобасына өзгертулер мен толықтырулар қазіргі заманның сын-тегеуріндеріне жауап беру, еліміздің қауіпсіздігін күшейту мақсатында Елбасының тікелей тапсырмасымен ұсынылып отыр. Екіншіден, заң жобасында экстремизм және терроризмнің алдын алу мақсатында қару-жарақ сақтау, сату орындарының қауіпсіздігін қамтамасыз ету мәселелері бойынша, тағы да басқа талаптар мен жауапкершіліктерді күшейту қарастырылған. Бұл өте керекті өзгерістер деп санаймын. Себебі, Ақтөбе, Алматы қалаларында болған қайғылы оқиғаның қайталануына жол бермеуімізді қарастырғанымыз абзал. Жобада экстремизм мен терроризмді насихаттағаны, шетелдердегі халықаралық террористік ұйымдарға, қарулы қақтығыстарға катысқаны үшін жазалау шаралары күшейтілген. Сонымен қатар, экстремизм және терроризмнің салдарымен, осы әрекетке барған адамдарды жазалаумен ғана емес, оның алдын алу, профилактикалық, болдырмау шараларына да айрықша мән беру маңызды деп есептеймін.
– Бүгінгі терроризм мен экстремизмнің ерекшеліктері заң жобасында ескерілген бе?
– Қазір экстремизм, терроризм дүниежүзілік, ғаламдық қайшылықтарды ушықтырып, жас ұрпақ санасына басқыншылықпен ендеп келе жатқан идеологиялық құбылысқа айналды. Тікелей адам құқығына, қоғам өміріне қауіп тудырып, екпіндеп келеді. Адамға қастандық жасауда терроршылар дінді жамылатын мысалдар көбейіп барады. Бүкіл дүниежүзінде жас ұрпақ санасы, олардың дүниетанымдары үшін ымырасыз күрес жүріп жатыр. Интернет, электрондық бұқаралық ақпарат құралдары арқылы жастардың санасына дамылсыз жағымды да, жағымсыз да ақпарат төгілуде. Көп жағдайда жағымдылары жай хабарлама ретінде беріледі. Ал жағымсыздары ашық үгіт, насихат, жымысқы бауырмалдық, жарылқаушылық түрінде, сананы улау мақсатында ұсынылады. Бұл құбылыстардың қитұрқылығынан хабары жоқ бейкүнә жастар ондайға сеніммен қарайды. Жастардың санасын алдау, арбау арқылы өз дегеніне бейімдеу басым. Жас ұрпақты осы адасу жолынан сақтап қалуға мемлекеттік аппарат, «Нұр Отан» партиясының мүмкіндігі мен қабілетін барынша ашып, нақты белсенді шаралар жүргізу күн тәртібінде тұр.
Міне, осы бағыттар екінші оқылымда ескеріліп және болашақ заңдарымызды күшейту арқылы азаматтық қоғамның санасы мен сапасына оң ықпал ету жолдарын қамти аламыз.
– Мәулен Сағатханұлы, терроризм туралы сіз не айтар едіңіз? Заң жобасы оны құрықтауға мүмкіндік бере ме?
– Соңғы 15 жылда әлемде 61 мың террорлық акт тіркеліп, олар 140 мыңнан артық адамның өмірін қиған. Өкінішке қарай, бұл нәубет біздің елімізге де жетті. Ақтөбе мен Алматы оқиғалары Үкіметтен терроризм мен экстремизмге қарсы күресті күшейтуді талап етіп отыр. Бүгінгі мақұлданған заң жобасы осы міндетті іске асыруға арналған. Ол терроризмге қарсы нақты әрекеттерді жасауға мүмкіндік береді. Мәжілістің бұл заң жобасын талқылауға қоғамның барлық топтарын қатыстыруы өте дұрыс және дәл уақытында болған шешім деп есептеймін. Аталған заң жобасын талқылау – қоғам үшін аса зәру мәселе бойынша қабылданатын заңды азаматтық қоғамның барлық институттарын қатыстырып, ашық талқылаудың алғашқы үлгісі болды. Бұл тәжірибе өзінің тиімділігін бірден көрсетті. Талқыланған заң жобасының сапасы белгілі дәрежеге бірден жақсарды.
Экстремизм мен терроризмге қарсы күресте халықаралық тәжірибені де ескерген жөн. Өйткені, біз әлемнен оқшауланған ел емеспіз ғой. Дүниежүзінің көптеген елдері осындай проблемаларды бастан кешіп отыр. Сондықтан олардың озық тәжірибесі біз үшін қымбат. Біз осы заң жобасын ЕҚЫҰ-ның сараптау комиссиясына жіберіп, олардың бағасын күтіп отырмыз. Екінші оқылымға дейін халықаралық ұйымның заң жобасы туралы ұсыныстары мен пікірлері келіп қалар деген үміттеміз.
– Әңгімелеріңізге рахмет.
Әңгімелескен
Жақсыбай САМРАТ,
«Егемен Қазақстан»