Президенттікке кандидат ретінде тіркеді

26 ақпанда Орталық сайлау комиссиясының Жамбыл Аужан­ұлы Ахметбековті, ал 28 ақпанда Мэлс Хамзаұлы Елеусізов пен Ғани Есенкелдіұлы Қасымовты Қазақстан Республика­сы­ның президенттігіне кандидат ретінде тіркеу туралы мәсе­лелер бойынша отырыстары болып өтті. «Қазақстан Республикасын­да­ғ­ы сайлау туралы» Конститу­ция­лық заңның 59-бабы 5-тармағына сәй­кес аталған кандидаттар Ор­та­лық сайлау комиссиясына барлық қа­жетті құжаттарды тапсырған. «Қа­зақстан Республикасындағы сайлау туралы» Конституциялық заңның 56-бабы 2-тармағына сәй­кес президенттікке кандидатты еліміздегі облыстардың, респуб­ли­калық ма­ңы­зы бар қаланың және астананың кем дегенде үштен екісінің атынан теңдей өкілдік ететін сайлау­шы­лар­дың жалпы санының кем дегенде 1 пайызы қолдауға тиіс. Ж.А.Ахметбековтің кандида­тура­сын қолдап, еліміздің 15 өңірінен теңдей өкілдік ететін 96 557 сайлаушының қолы жи­налған. Бұл – белсенді сайлау құқығына ие сайлаушылардың 1 пайызынан астамын, М.­Х.Елеу­сізов­тің канди­датурасын қолдап еліміздің 15 өңірінен теңдей өкіл­дік ететін  97 830 сайлаушының қолы жиналған, бұл – белсенді сайлау құқығына ие сайлау­шылардың 1 пайызынан астамын құрайды. Ал Ғ.Е.Қасымовтың кандидатурасын қолдап, еліміздің 15 өңірінен теңдей өкілдік ететін 99 728 сайлаушының қолы жиналған, бұл – белсенді сайлау құқығына ие сайлаушылардың 1 пайызынан астамы. Қазақстан Республикасының Орталық сайлау комиссиясы өзінің отырыстарында ұсынылған құжаттарды қарай келіп, олар «Қазақстан Республикасындағы сайлау туралы» Конституциялық заң қоятын талаптарға сәйкес келеді деп белгіледі және Жамбыл Аужанұлы Ахметбековті, Мэлс Хамзаұлы Елеусізовті, сондай-ақ Ғани Есенкелдіұлы Қасымовты Қазақстан Республикасының президенттігіне кандидаттар ретінде тіркеу туралы қаулылар қабылдады. «Егемен-ақпарат».