Африка-Еуразия конгресі Ясауи жолымен жүреді

Алматы қаласында Түркияның Думлупынар университетінің әлеуметтік ғылымдар институты мен Қожа Ахмет Ясауи атындағы Халықаралық қазақ-түрік университетінің Еуразия ғылыми-зерттеу институты бірлесе отырып, I Халықаралық Африка-Еуразия зерттеулер конгресін өткізді. Биылғы конгрестің тақы­рыбы «Африка-Еуразия елде­ріндегі қоғам, ақпарат және ақ­параттық технологиялар» деп аталады. Конгресте Африка-Еуразия елдеріндегі ақпараттық технологиялардың қоғам мен саясатқа ықпалы бағаланып, осы аймақтарға қатысты түрлі мәсе­лелер ғалымдар талқысына салынды. «Африка-Еуразия зерттеулер конгресі әлеуметтік ғылымдар саласында жүргізілетін зерттеулер деңгейін арттыруға және түрлі мәдени үдерістерді салыстыруға септігін тигізеді. Осылайша, Аф­рика-Еуразия қалаларынан келген әлеуметтанушылар өз ғы­лыми-зерттеулері мен жұ­мыс­­тарын ұсынып, әлеу­меттану са­ласындағы зерттеулер­ге жалпы және аймақтық ма­ғы­нада үлес қоса алатын болады», – дейді осы шараны ұйым­дас­тырушылардың бірі, Дум­лу­пынар университетінің докто­ры Һакан Аридемир. Һакан Аридемирдің айтуынша, Конгрестің мақсаты – ға­лымдардың зерттеу жұ­мыстары мен аймақ мәселелеріне қатысты жаңа тұжырымдарын, пікірлерін жинақтап, бұл мәселелерді ше­шу әдістерімен, тәсілдерімен бө­лісу үшін жыл сайын өткі­зілетін бірыңғай орталыққа айналу болып табылады. 2016 жыл ЮНЕСКО тарапынан «Қожа Ахмет Ясауи жылы» ретінде жарияланған болатын. Осы тұрғыда конгрестің тағы бір мақсаты – Қожа Ахмет Ясауи мен оның шәкірттері жүріп өткен жол бойынша конгресті Африка-Еуразия аймағындағы қалаларда ұйымдастыру. Ясауи ілімі мен хикметтерінің қа­нат жайып, тараған жері, ру­хани ілімнің бастау-бұлағы Қазақстан болғандықтан және ұлы ойшыл қазақ даласында жерленгендіктен, алғашқы конгресті Алматыда өткізу ұй­ғарылған. Һакан Аридемирдің мәліметіне қарағанда, Ясауидің шартарапқа ілім таратқан 100 мыңға тарта шәкірті болған. Сол себепті конгресс жыл сайын Африка-Еуразия аймағының әр түрлі қалаларында өткізіледі деп жоспарланып отыр. Тап осындай шараның 2017 жылдың сәуір айында Испанияда өтетіні белгілі болды. Сөз алған спикерлердің ай­туынша, Африка-Еуразия Конгресі әлеуметтану сала­сының ғалымдарына, мемлекет билеушілеріне, шешім қабылдаушыларға, жеке сектор мен инвесторларға пайдалы болмақ. Халықаралық Африка-Еуразия зерттеулер конгресіне әлемнің түрлі аймақтарынан үлкен қызығушылық танытылуда. Конгреске Түрік Респуб­ликасының Алматы қала­сындағы Бас консулы Рыза Каған Йылмаз, Қожа Ахмет Ясауи атындағы Халықаралық қазақ-түрік уни­верситетінің өкілетті кеңес төр­ағасы, профессор, доктор Мұ­са Йылдыз, Қожа Ахмет Ясауи атындағы Халықаралық қазақ-түрік университетінің өкілетті кеңес мүшесі, профессор, доктор Мұхидтин Шимшек, Биледжик Шейх Едебали университетінің ректоры профессор, доктор Ибраһим Таш, Еуразия ғылыми-зерттеу институтының директоры доцент, доктор Невзат Шимшек, Думлупынар уни­верситеті әлеуметтік ғы­лымдар институтының дирек­торы доцент, доктор Ниязи Курназ және басқа да елдерден 150-ге жуық ғалым қатысып, саясат, экономика, әлеуметтану, тарих мәселелері бойынша түрік, ағылшын, француз, неміс, орыс тілдерінде пікір алмасып, өз жобаларын таныстырды. Айгүл АХАНБАЙҚЫЗЫ, «Егемен Қазақстан» АЛМАТЫ