Ассимиляциядан қашуға шақырды

Түркия премьер-министрі Реджеп Тайып Эрдоған Германияда тұратын өзінің 2,5 миллиондық қандасын неміс қоғамына интеграциялануға ұмтылуға шақырғанымен, ассимилияциядан қашқан жөн деген ұстанымын ашық білдірді. Ол бұл мә­лім­демесін Дюссельдорфта 10 мың түрік өкілімен кездесуде жасады. Түрік үкіметі басшысының сөзіне қарағанда, неміс түріктері өздерінің шыққан тегін ұмытпаулары тиіс. Сондай-ақ балаларын бірінші кезекте түрік тіліне, содан кейін барып қана неміс тіліне үйретулері керек. Және де Германияда тұратын түріктер тарихи отанына орал­ғы­лары келсе, оларға барынша жағдай жасауға күш-жігер жұмсалатын болады. Бұл үндеу неміс тарабының наразы­лы­ғын туғызып жатыр. 30 МЛРД. ДОЛЛАРЫНА ТОСҚАУЫЛ ҚОЙДЫ АҚШ қаржы министрлігі Ливия лидері Муаммар Каддафи мен Ливия үкіметінің иелігіндегі 30 миллиард долларлық есеп-шот­ты жауып тастады. Ливия басшылы­ғы­на осыншама қаржы қайдан келді дейтін бол­сақ, елде мол мұнай және газ қоры бар. Бүгін­де осы байлық билікке қарсылардың қолына көшіп үлгерген. М.Каддафидің өзі болса, халықтың көбі мен жағында дегенді көлденең тартып, биліктен оңайлықпен кететін сыңай танытпай отыр. Осы аралықта елдің шығыс бөлігі толықтай оппозицияның бақылауына алынған. Билікке қарсылар бүгінде ел астанасы Триполиге шабуыл жасауға дайындыққа мықтап кіріскен тәрізді. Және де олар М.Каддафиді тағынан тайдырмай тыншымауға бел буғандай. ХАЛҚЫНЫҢ НАРАЗЫЛЫҒЫ АРТЫП КЕЛЕДІ Сұрау салынған ресейліктердің 49 пайызы елдегі жағдайға көңілдері толмайтынын білдіріп, наразылық акцияларына шы­ғ­уға кетәрі емес екендіктерін мәлімдеген. Мұндай мәлімет қоғам­дық пікір қоры жүргізген сұрау салулар нәтижесінде белгілі болған. 2010 жылдың соңынан бері елдегі жағдайға көңілдері тол­майтындар саны 17 пайызға артқан. Өйткені, 26 желтоқ­сандағы жағдай 32 пайызды құраған екен. Ал 13 ақпандағы сұрау салулар бұл көрсеткіштің 44 пайызға дейін өскенін көрсетсе, бүгінде 49 пайызға жетіп жығылған. Ресей тұрғындарын қымбатшылық, материалдық жағдайдың нашарлауы алаңдатып отырса керек. САУДИЯ БАХРЕЙНГЕ 30 ТАНК КІРГІЗДІ Сауд Арабиясы Бахрейнге 30 танк жіберген. Бұл ауыр техникалар аралдық Бахрейнді материкпен жалғастыратын король Фахдтың 25 шақырымдық дамбасы маңын­да көзге түскен. Куәгерлердің сөздеріне қарағанда, жеңіл көліктер біраз уақыт бойы танктерге жол беруге мәжбүр болған. Бұл жөнінде Египеттің Al-Masry Al-Youm газеті жария етті. Атал­ған басылым Саудия әскери техникасының Бахрейнге енуі бұ­рын-соңды болмаған оқиға екенін атап көрсетеді. Ал Бахрейнде күні бү­гінге дейін елдегі азшылық болып табылатын сүнниттен шыққан король әулетіне қарсы шииттердің наразылық акциясы жалғасып жатыр. ҚАРУЫ ҮШІН ҚАРЖЫ ТАЛАП ЕТТІ Ресей сыртқы істер министрі Сергей Лавров Ливия Ресейге қару-жарақ сату бойынша орындалған барлық келісім-шарттар үшін, БҰҰ Қауіпсіздік Кеңесі қойған шектеулерге қара­мастан, барлық ақшаны төлеуі тиіс деп мәлімдеді. С.Лавров Қауіпсіздік Кеңесінің санкциясы елдегі қалыптасқан жағ­дайға орай орынды қабылданғанын атап өтті. Біз көріп отырған жағ­дайда осындай шешім қабылданбағаны түсініксіз болар еді, деді Ре­сейдің бас дипломаты. Бірақ Ресей санкция қабылданғанға дейін орын­далған барлық келісім-шарттың төленгенін үзілді-кесілді талап етеді. РАХМОННЫҢ ҰЛЫ КОНТРАБАНДАМЕН КҮРЕСЕДІ Тәжікстан президентінің үлкен ұлы Рустам Эмомали басшы­лық қызметке тағайын­далды. Оған контрабандамен және кедендік ережелерді бұзумен күрес жөніндегі басқарма тізгіні сеніп тап­сырылды. Бұл лауазымның кеден қызметіне тікелей қатысы бар. Жаңа басшы қазірдің өзінде басқарма қызметкерлеріне таныстырылып үлгерілген. Бұған дейін Р.Эмомали инвестиция жөніндегі мемлекеттік комитетте жұмыс істепті. Онда ол шағын және орта кәсіпкерлікті қолдау жөніндегі басқармаға жетекшілік еткен көрінеді. Тәжікстан президенті Эмомали Рахмонның жеті қызы және екі ұлы бар. Бір қызы да мемлекеттік қызметте, яғни ел сыртқы істер министрінің орынбасары екен. БАС КЕДЕНШІ – ҚОС АЗАМАТТЫҚ ИЕСІ Қырғызстан парламентінің депутат­тары ел кеден қызметінің басшысы Қуаныч­бек Кулматовтың отставкаға кетуін талап етті. Олар шенеуніктің Ресей азаматы да болып табылатынын, осыған байланысты оның жоғары мемлекеттік лауазым иеленуге құқы жоқ екенін көлденең тартты. Қырғызстанның бас кеденшісінің атына наразылықты «Республика» (билеуші коалицияға кіретін фракциялардың бірі) фракциясынан депутат Тынычтық Шайназаров негіздеп берді. Ол қолында Ресей федералды миграциялық қызметінің деректері бар екенін жария ете келіп, Кулматовтың Ресей азаматы болып табылатыны анық екенін атап көрсетті. Депутаттың талабын оппозициядағы «Ата Мекен» фракциясының лидері Өмірбек Текебаев та қостады. ҚЫСҚА ҚАЙЫРЫП АЙТҚАНДА: • Стокгольм халықаралық зерттеулер институтының сарап­шылары Минск М.Каддафи режімін қару-жарақпен қам­тама­сыз етті деп күдіктенетінін жария етті. Оларда күдіктерін айғақтайтын бірқатар дәйектер бар көрінеді. • Үндістан соты 2002 жылдың 27 ақпанында 59 адамның өліміне соқтырған пойыз өртін ұйымдастырған 11 қыл­мыс­керді енді ғана өлім жазасына кескен үкім шығарды. Тағы 20 қылмыскер өмір бойы түрмеде отыратын жазаға кесілді. • Иранда оппозиция лидерлері Мир-Хосейн Мусави мен Мехди Карруби тұтқынға алынды. Олардың зайыптары да түрмеге қамалған. Аталған оппозиционерлер бұған дейін үй қамағында ұсталып келген болатын. Интернет материалдары негізінде әзірленді.