Жаңа трансформатордың қуаты он қалаға жетеді

Кентау трансформатор зауыты өзінің бастауын 1959 жылдан алады. Зауыт тарихында ең алғашқы ТМ-180/10 трансформаторы конвейерден 1960 жылдың 10 маусымында шығарылған екен. 2005 жылдан бастап «Халық тұтынатын тауарлар» аталымы бойынша «Оңтүстік Қазақстан облысының үздік тауары» марапатына ие болған КТЗ содан бері биігінен аласарған жоқ. 2012 жылы «Алтын сапа» республикалық байқауында бас жүлдені жеңіп алды. Әлемнің бірқатар мемлекеттерімен іс­кер­лік қарым-қатынастағы КТЗ жақында тұңғыш рет 80 ме­га­ваттық трансформаторды құ­растырып шығарды. – Бұл тарихи жаңалық, – дейді Кентау қаласының әкімі Әбдібақыт Мақұлбаев. – Өйткені, бұған дейін зауыт ең мықты дегенде 63 мегаватт болатын трансформаторлар дайындап келген. Егер жаңа трансформатордың қуатын байқағыңыз келсе, ол Кентау сияқты оншақты қаланы жарықпен толық қамтамасыз ете алады. Зауыт басшылығы жаңа трансформаторға қазірдің өзін­де тапсырыстар түсіп жат­қан­дығын айтады. Қазір КТЗ то­лық­тай жаңғыртудан өтіп, автоматтандырылған. Өндіріс көлемі жиырма жылда жиырма есеге өссе, өнім көлемі межелеген жоспардан асып, 11 млрд теңгеге жеткен. Былтыр экспорт көлемі 33 пайыз болса, биыл 40 пайыз болды. Тапсырыс берушілердің қатарында бұрыннан әріптес болған Ресей, Қырғызстан, Өз­бекстан мемлекеттерінен бөлек, биыл Белоруссия мемлекеті қо­сылды. Әлемдік дағдарыс жұмысы жолға дұрыс қойылған, бүгінгі күн талабымен үндесетін кә­сіп­орын үшін қорқынышты емес. Кентау трансформатор зауытының басшылығы 2017 жыл­дың ал­ғашқы айларына дейін тапсырыс алып қойғандарын айтады. Бақтияр ТАЙЖАН, «Егемен Қазақстан» Оңтүстік Қазақстан облысы