ЕҚЫҰ байқаушылары тіркелді

Кеше Орталық сайлау комиссиясы алдағы президенттік сайлаудың демократиялық жолмен жүруін байқауға келген Еуропадағы қауіпсіздік және ынтымақтастық ұйымы (ЕҚЫҰ) Демо­кра­тиялық институттар және адам құқықтары жө­нін­дегі бюросының (ДИАҚБ) ұзақ мерзімді мис­сиясының байқаушыларын тіркеу туралы қаулы қабылдағанын жариялады. ДИАҚБ-ның ұзақ мерзімді миссиясы бай­қаушыларының тізімін Сыртқы істер министрлігі ұсынған екен. Дипломатиялық Елші дә­ре­жесі бар Даан Эвертс мырза бастаған байқау­шылардың саны – 44 адам. Олардың бәрінің де байқаушылық қызметтен тәжірибесі бар. Орталық сайлау комиссиясының қабыл­даған шешіміне сәйкес, енді олардың бәріне тиісті пішіндегі куәліктер берілетін болады. Осы куәлік олардың Қазақстан аумағындағы барлық сайлау учаскелерінің жұмысын байқауына құқық береді. Байқаушылар сайлау үдерісінің барысында демократиялық құндылықтардың қатаң сақталуын қадаға­лай­тын болады. Мұның өзі президенттікке кандидаттардың барлығына бірдей тең құ­қылы жағдай жасалуына мүмкіндік туғы­зады. Халықаралық тәжірибеге сәйкес жасалып жатқан бұл жұмыстар еліміздегі сайлау үдерістерінің барынша ашық, мөлдір болуын қамтамасыз ету үшін қажет шаралардың бірі болып табылады. Жақсыбай САМРАТ.