Серпінді жобаларға сенім мол

Индустрияландыру картасы ел өміріне тың серпін беруде. Облыстардың өздеріне тән экономикалық келбеттері жаңаруы да орын алуда. Іске қосылып жатқан жаңа зауыттар мен комбинаттар, жаңартылған жылу қазандықтары туралы айту оңай болғанымен, іс жүзінде жүзеге асырылуына бөлінген қаржыдан бөлек қаншама ерік-жігер бар. Үдемелі индустриялық-ин­но­вациялық бағдарламаға бөлі­не­тін қаржы көлемі артып келеді. Соған сәйкес салынатын зауыт пен құрылыс нысанда­рының қам­ту ауқымы мен жоба көлемі де ұлғая түсуде. Үкіметте өткен селекторлық кеңесте ай­тылған жобалар ауқымын төмен­дегі деректерден де байқауға болады. Селекторлық кеңесте сөз бол­­ған, өткен жылы іске қосыл­ған 152 жобаның ішінде 30 кәсіпорын жо­балық қуатына еніп, өндіріске кірісті. Бұл оған салынған қаржының ақталғаны деген сөз. Ал қалған жобалар­дың кейбірі маусымдық сипаты және басқа да мәселелер бойын­ша қатаң бақылауда тұр. Олар­­дың да іске қосылатын күні алыс емес. Судың да сұрауы бар де­мек­ші, бөлінген қаржының ба­қылауы болмайды емес, болады. Төрт жоба сәуір-мамыр айла­рын­да іске қосылады деп кү­тілуде. Премьер-Министрдің орын­­басары – Индустрия және жаңа технологиялар министрі Әсет Исекешев жо­балардың іске қосылу мерзімі тоқ­талуы, үзілуі мен ауыстырылуына облыс әкім­дерінің орынбасарлары дең­ге­йінде жауап беретіндей мә­селе қарастырылып жатқан­дығын жет­­кізді. Бұл өз кезегінде бақы­лау­дың барлығын білдіріп, нем­құрай­дылықты болдырмайды. Биылғы жылдың индустрия­ландыру картасының бюджеті екі еседей артып отыр. Картаны үй­лестіруге арнайы бекітілген Әсет Исекешевтің айтуынша, 2011 жы­лы индустрияландыру картасына құны 715 млрд.теңге болатын 71 жоба бекітілген көрінеді. Оған тартылатын инвестиция көлемі де аз емес. Ол 1,5 трлн.теңгеге дейін жетеді деп болжанып отыр. Егер сәтін салып, бұл жобалар нақты іске асырылып жатса, бо­ла­шақта 18,6 мың жұмыс орны уақытша ашы­лып, кейін олардың 18,5 мыңы тұрақты жұмыс ор­нына айнал­мақ. Алғашқы жарты­жыл­дықта құны 50 млрд.тең­ге­дей болатын 11 нысанның іске қо­сылуы күтілуде. Газетіміздің алдыңғы санда­рында жазғанымыздай, 2011 жыл­­дың еншісіндегі ірі әрі маңы­зы жоғары нысандар саны – 12. Оларға 330 млрд. теңгедей қаржы бө­лініпті. Іске қосылғаннан кейін 6 мың жаңа жұмыс орны ашы­латын болды. Олардың қата­рында Шарын өзеніндегі Мойнақ ГЭС-і (жел­тоқсан айында), “Жа­ңа­өзен-Түрі­кменстанмен шекара” темір жол учаскесі (қа­раша) және Жетіген-Қорғас темір жол желілері, Ақбай алтын фабрикасының өнімділігін арт­тыру (маусым) жо­балары бар. Павлодар облы­сын­дағы “Таман” ЖШС жаңа қуатты жүк вагон­дарын шығармақ. Ал ақпан айы­ның еншісіндегі жоба бойынша “Шеврон Мұнайгаз Инк.” кор­порациясының металл­плас­тика­лық құбыр шығару за­уы­­ты іске қосылды. Шілде айын­да Маң­ғыстау облысында “Қазақ­стан Каспиан Оффшор Индастриз” ЖШС-де теңіз металл өнім­дері өндірісін жолға қою жос­парланып отыр. Ал ежелден жеңіл өнер­кәсіптің негізі болған Семей өңі­рінде былғары-тері өнімдерін өндіретін “СКМК” ЖШС комби­наты іске қосылмақ. Наурыз айының соңына дейін индустрияландыру картасы ша­ғын және орта бизнес жобаларын есепке ала отырып, бірқатар жобалармен толықтырылмақ. Әзір­ше облыстардан 300-ден астам өтініш түсіп үлгерген. Оның ішін­де 206-сы биылғы 2011 жыл­ғы жобалар бойынша, ал 70-і жыл­дың алғашқы жарты­жыл­ды­ғында іске қосылатын болады. Елімізде атқарылып жатқан жұмыстар, әсіресе, индустрия­ландыру саласында қолға алы­нып жатқан істердің нәтижесі дағ­­дарыстан кейін еңсемізді кө­теруге, сондай-ақ халқымыз­дың әл-ауқатын жақсартуға үлкен кө­мегін тигізбек. Мүмкін, дәл қазір салынған қаржыны ақтама­ған­мен, уақыт өте келе өзінің толық қуатын игере ала­тын­дығына сенім кәміл. Өйткені экономиканың негізін құрайтын орта және ша­ғын бизнес сек­то­рын, сондай-ақ өнер­кәсіп өндірісін құнттау ұтым­ды қадам екенін уақыт көрсетіп келе жатыр. Газ бен мұнайға ғана сену емес, сонымен қатар эконо­ми­камыздың барлық сек­тор­ла­ры қатар дамыса, болаша­ғы­мыз бұлыңғыр бол­май­ды. Қара алтынға маман­дан­ған экономика­лық келбетімізден өзге келбет қалыптастыру өте ма­ңыз­ды. Тек атқарылып жат­қан іске халық тарапынан немқұ­рай­­дылық бол­ма­сын деңіз. Қыруар қаржы са­лып, үлкен серпінмен атқарылып жатқан жұмыстардың көлемін көре отырып, оны жүзеге асыру­шылар ел болашағына үлес қосып жат­қандықтарын есіне ала жүрсе нә­тиже де сапалы болмақ. Венера ТҮГЕЛБАЙ.