Қайратың қайда, «Қайратым»?

Бір кездері ойыны қазақ жанкүйерлерін желпінткен «Қайрат» футбол командасының қай­та­дан аты жаңғырып, тамаша жеңістерге жетуін аң­сап жүргендер аз емес. Ендігі жерде ұлттық фут­болдың айы оңынан туған күнін арман­дай­тын­дар­дың тауы шағылмауы тиіс. Егер «Қайраттың» ойыны қаржыға тіреліп тұрса – жаңа маусымда ко­манданың бюджеті 6 миллион АҚШ дол­ла­ры­нан асады. Қысқасы, «Қайраттың» алаңсыз ойна­уы­на барлық мүмкіндіктер жасалуда. Сонымен көк­тем­­нің алғашқы кү­ні, яғни 1 наурызда Ал­маты қаласының әкім­­дігінде «Қай­рат» футбол клу­бы­на қа­тысты үш жақ­ты ке­лісім-шарт­қа қол қо­йыл­ды. Осылайша қа­ла­лық әкімдік пен «ҚазРосГаз» ЖШС өкіл­­дері футбол клу­бының бюджетіне ау­дарылар қаржының көлемін ресми құжатпен нақ­тылады. Жаңа маусымда «Қай­рат­тың» бюджеті шамамен 6 миллион АҚШ долларынан асады. Оның 700 мил­лион теңгесін Ал­­маты қа­ласы бөл­се, «Қаз­Рос­Газ» ЖШС 2 миллион дол­ларды клуб шотына аударатын болды. Сөз «Қайрат» туралы қозғалғанда мәселенің бір шеті үнемі Алматы қаласының басшыларына да барып тіреліп жататыны жасырын емес. Келісім-шарт жасасу рәсімінде сөз алған қала әкі­­мі Ахметжан Есімов өзінің жеке сайтына «Қайратқа» қатысты сауалдар жиі келіп түсетінін атады. Футболды жақсы көретін әкімнің қаланың бас футбол командасына жеткілікті түрде көңіл бөлмейді деп есептейтін жанкүйерлер сауалына орай Есімов былай деді: – Мен өз тарапымнан биыл қала әкімдігі «Қай­ратқа» көрсетер көмегін толығымен өтеді деп айта аламын. Көпшіліктің сүйіктісіне айнал­ған команда жаңа маусымға дайын. Оның барлық қарызы өтелді. Ал биылғы жылғы клубтың қоржынына түскен қаржы айтарлықтай қомақты. Ендігі мәселе, бөлінген қаржының тиісті жеріне дер шағында жетуін қамтамасыз ету. Біз бұл істі жіті қадағалаймыз. «Қайрат» командасына ел біріншілігінде 6 орыннан төмендемеу міндетін қо­йып отырмыз. Әкімнен кейін сөз кезегі тиген клубтың жаңа бас бапкері Владимир Никитенко: – Менің өмірімде «Қайраттың» орны ерекше. Бұл команда маған аса қымбат. «Қайраттың» алдағы уақытта тамаша ойын өрнегін көрсеткенін қалаймын. Біз тіпті жүлделі орындардан табы­луға да бар жігерімізді салатын боламыз. Осы мақсатпен командаға тәжірибелі ойыншыларды жинап үлгердік. Дегенмен, ел біріншілігіндегі алғашқы 6 кездесудің орны бөлек. Егер бастапқы кездесулерді сәтті аяқтасақ, жүлделі орындар үшін таласа аламыз, – деді. Жалпы, футболды сүйетін жандарға Ники­тен­коның есімі әбден таныс. Ол КСРО чемпио­натында «Қайраттың» сапында 256 ойын өткізген болатын. Оның осы жетістігі мен рекордын басқа футболшы әлі қайталай қойған жоқ. Сонымен жаңа бапкер Түркиядағы оқу-жат­тығу кездерінде  қар­сылас ретінде әдейі мықты ко­ман­даларды таң­дағанын айтып: – Жолдастық кез­десулер өте тар­тыс­ты өтті. Ко­ман­да­мыз­дың күшті ко­­­ман­далармен тең дә­­­­режеде тайталаса ала­­­­тынына көз жет­кіздік. Бұл жат­ты­ғулардың фут­бол­шы­ла­рымыз үшін пайда­сы тиді, – деді. Айтқандай, мау­сымаралық үзіліс ке­зінде үш рет оқу-жаттығу жиынын өт­кізіп, Түркия еліндегі 14 жолдастық кездесудің бесеуінде басым түсіп, үшеуінде жеңіліп, қалған ойындарда тең түскен. Осы жаттығулардың нәтижесін көрсетуге «Қайраттың» қайраты жете ме? Оның жауабы алдағы күндердің еншісінде. Бас бапкерге атал­мыш командада бірге теңбіл доп тепкен тәжі­рибелі спортшы Сергей Стукашов көмектеспек. Қазірге алматылықтар үшін Алматы «Қай­ра­тына», кіші футбол командасына қатысты үлкен жаңалық – кезінде Пеле ойнаған, Бразилияның әйгілі «Сантос» командасымен жолдастық кездесуі деп айтуға болады. Мини-футболдан әлемнің жұлдызды командасына айналған «Сантос» ко­ман­дасымен қарсыласу – алматылық «Қай­рат­қа» үлкен сын болып тұр. Спорт саласындағы осы бір айтулы оқиғаға орай, 7 наурызда Балуан Шолақ атындағы Спорт сарайында баспасөз мәслихаты өтпек. Спорт са­ласына қалам тербейтін әріптестеріміз әлемнің екі дүркін үздік ойыншысы атанған «Сантостың» шабуылшысы Фалькаомен және осы команданың бас бапкері Фернардо Фереттимен сұхбаттаса алады. Журналистермен кездесуге кіші «Қайрат­тың» жетекшілері де келмек. Ал өткен ғасырдың аты әлемге мәшһүр болған футболшысы Пеле «Сантос» пен «үлкен» футболда 18 жыл ойнаған. Бразилияның ең мық­ты клубтары қатарында «Сантос» командасының қазіргі көшбас­шы­сы жоғарыда атап өткен Фалькао болып табылады. Алматылықтар тағатсыздана күтетін бұл жол­дастық кездесу қыз-келіншектердің мерекесінен кейін іле-шала, 9 наурызда өтпек. Айнаш ЕСАЛИ. Алматы.