Жақында Қазақстан Республикасы Мемлекеттік орталық музейінде «ФОТОӨНЕР» қоғамдық бірлестігі, «Bank «RBK» АҚ және «Қазақстан» ҰТРК, Алматы қаласының әкімдігінің қолдауымен Қазақстан Республикасы Тәуелсіздігінің 25 жылдығына арналған «Тәуелсіздік тағылымы» атты фотокөрме ашылды.
Еліміздің тәуелсіз 25 жылының жарқын да айшықты мезеттері күнде көз алдымыздан өтіп жатқанымен, соның бәрін байқай береміз бе, бір сәт тоқтап, ой жіберіп қараймыз ба... Ал зымыран уақыт аялдамай өтіп жатыр. Енді сондай елеулі де елжіретер, жанға жағымды көріністерді байыппен тамашалай аламыз. Қазақстанның үздік фотограф суретшілері осынау тәуелсіздік жылдарда түсірген тартымды, кестелі де көрнекті суреттер көрмесіне келіңіз. Жай көз елей бермейтін тылсым сәттерді фотограф зерделі көзбен дөп басып, айтулы заманымыздың көркем шежіресін жасаған хас шеберлігіне таңданасыз, тамсанасыз. Отанымыздың берекелі белестеріне, халқымыздың жасампаз істеріне, туған жеріміздің тіл жеткізгісіз сұлулығына сүйсініп, мерейіңіз өсері анық.
Фотокөрме тәуелсіздік жылдарындағы отандық фотожурналистер мен тілшілердің баспа беттеріндегі қоғамда болған оқиғалар мен еліміздің рухани өмірін таныстырып насихаттайды.
Фотожурналистиканың ардагері Нұрманбет Қизатов: «Сұлулық деген сиқыр, суретші де, ғайыптан әдемі әсерін, жинақтап жүрген фотосуретші де соның сиқырлы сырын ашуға ұмтылады. Міне, фотожурналистер де еліміздің 25 жылдық тойына өз өнерлерін ұсынып отыр», дейді. Сол ардагер ағаның ұлағатты сөзіне арқаланамыз, еңсемізді тіктейміз.
Бұл көрмеге Қазақстанның 25 жетекші фототілшісінің (Мұрат Мәмбетов – фоторепортер және документалист, Шүкір Шахай – Қазақстан туралы бірнеше фотоальбомның авторы, Сайлыбай Майлыбаев, Ерлан Омаров, Ермек Сарбасов және т.б.) 100-ге жуық фотожұмыстары қойылды, сондай-ақ, Елбасының тұңғыш жеке фотографы Иосиф Будневичтің, фотожурналист Александр Устиненконың жұмыстары орын алған.
Аталмыш көрме қоғамды тәуелсіздік жылдарында отандық журналистердің фотонысандарында бейнеленген еліміздің шынайы мемлекеттік, қоғамдық және рухани оқиғаларымен таныстырады.
Сапарбай ПАРМАНҚҰЛОВ,
«Егемен Қазақстан»
АЛМАТЫ