Адамзат баласының тұрмыс-тіршілігі үшін ең қажетті салалардың бірі болып табылатын жол мен көліктің атқарар рөлінің, олардың уақыттың талабы мен сұранысына сәйкес келуінің өте маңызды болып табылатынын айтып жатудың өзі артық. Осы жол мен көлік арқылы халықтың барыс-келіс қатынастарымен бірге олардың өзге де мұқтаждықтары мен қажеттіліктерінің өтелуі аталған саланың дами түсуімен тікелей байланысты десек жаңылыспаймыз. Бұл тұрғыда Көлік және коммуникация министрлігі соңғы жылдары айтарлықтай игі жұмыстар атқарып келеді.
Аталған министрліктің берген мәліметтеріне сүйенсек, соңғы жиырма жылдың көлемінде көлік саласында жалпы құны 1,5 трлн. теңгені құрайтын 57 жоба жүзеге асырылуда екен. Сонымен бірге халықаралық қаржы институттарынан 644,95 млрд. теңге көлемінде займдар тартылған. Көлік-коммуникация кешенінің негізгі көрсеткіштерінің өсуі соңғы 10 жылдың ішінде біршама деңгейге жеткен. Мәселен, тасымалданған жүктердің көлемі 1,3-тен 2,2 млрд. тоннаға өссе, жолаушы тасымалы 1,8 есеге көтерілген. Ал жүк айналымы 1,4 есеге, сонымен қатар жолаушы айналымы 2 есеге жоғарылаған.
Ішкі жалпы өнім құрылымындағы көлік саласының үлесі 2010 жылы 2009 жылмен салыстырғанда 7,5 пайызға өссе, көліктегі еңбек өнімділігі 13 пайызға артқан. Биыл еліміздің 2020 жылға дейінгі стратегиялық даму жоспары жүзеге асырыла бастады. Онда еліміздің үдемелі индустриялық-инновациялық дамуының негізгі бағыттары бекітілген-ді. Сонымен қатар 2010 жылдың қыркүйегінде 2010-2014 жылдарға арналған көлік инфрақұрылымын дамыту туралы жаңа салалық бағдарлама да қабылданған. Аталмыш бағдарлама шеңберінде жалпы құны 2,8 трлн. теңгені құрайтын 58 инфрақұрылымдық жоба жүзеге асырылмақ. Олардың қатарында, «Батыс Еуропа – Батыс Қытай» халықаралық көлік дәлізін қайта салу «Қорғас-Жетіген» және «Өзен-Түркіменстанмен мемлекеттік шекара» темір жол желілерін салу секілді маңызды жобалар да бар. Бұл жобалардың қай-қайсысы да ел игілігі үшін жасалып жатқан игі жұмыстар екені айқын. Бұйыртса, еліміз тәуелсіздігінің 20 жылдығына орай биылғы жылдың желтоқсанында жоғарыда айтылған жобаларды пайдалануға беру жоспарланып отыр. Осынау ірі жобаларды қамтитын бағдарламаның басты мақсаты, көлік-коммуникация кешенінің негізгі көрсеткіштерін ілгері дамыту мен көлік бойынша жалпы қосымша құн көрсеткішін 63 пайызға өсіруді қамтамасыз ету екен.
«Мықты бизнес – мықты мемлекет» ұранын жүзеге асыру мақсатында мемлекеттік органдардың барлығына бақылаудың жалпыға бірдей қағидаттары мен ережелері бекітілген. Кәсіпкерлерге әкімшілік қысымды азайту үшін көлік саласында рұқсат беру құжаттарының көлемі 2 есеге кемітілген.
Әлеуметтік модернизациялау жөнінде сөз қозғай отырып, Жолдауда білім беру саласын реформалау қажеттілігіне баса назар аударылды. Осыған орай Көлік және коммуникация министрлігінің алдында қазіргі таңда ерекше сұранысқа ие азаматтық авиация және теңіз көлігі үшін мамандарды дайындау міндеті тұр. Мамандардың жеткілікті болуы сол саланы жедел дамытудың төте жолы.
Еліміздің денсаулық сақтау жүйесін жақсарту және мыңдаған отандастарымыздың өмірлерін сақтап қалу мақсатында өзекті мәселелердің бірі көліктік медицинаны дамыту екені айтпаса да түсінікті. Осы ретте өткен жылы жаңа әлеуметтік жоба – «Денсаулық» атты екі арнайы мамандандырылған медициналық-диагностикалық пойыздар республикамыздың түкпір-түкпірін араласа, биыл 3 медициналық пойызды аттандыру жоспарлануда. Уақытылы медициналық қызмет көрсетуді қамтамасыз ету үшін 16 тікұшақты және аэрожұмылғыш госпитальдарды жұмылдыру қажеттігі де министрлік қаперінде.
Жолдауды жүзеге асыру мақсатында автомобиль жолдары комитеті республикалақ маңызы бар автожолдардағы апатты жағдайларды толық сараптаудан өткізіп, жалпы ұзақтығы 1,7 мың шақырым болатын ең қауіпті 16 учаскені анықтаған. Бұл жерлерде жылына шамамен алғанда 450 адам жарық дүниемен қоштасады екен. Бұл жол-көлік оқиғаларынан қаза болған адамдар санының 36 пайызын құрайды. Сол себепті де жол бойында дәрігерлік- құтқару пункттерін орналастыру қартасын жасау қажет. Сонымен қатар, мәселені түбегейлі шешу мақсатында жол-көлік апаттары жиі болатын жалпы ұзақтығы 2,3 мың шақырым автомобиль жолдарын 2015 жылға қарай 1-ші техникалық категорияға өткізу жоспарлануда.
Көліктің барлық түрлерінде жылына 3 мың адам, соның 97 пайызы автокөлік апаттарында қаза болып жатқандықтан, биылғы жыл басында заңнамалық негізде бірқатар іс-шаралар қабылданған. Олардың қатарында қалааралық жолаушы тасымалдарын лицензиялау мен техникалық бақылауды сапалы жүргізу жұмыстары бар. Сондай-ақ, автобус жүргізушілерінің қажетті еңбек өтілін 3 жылға дейін ұзарту сынды шаралар да назарда тұр.
Тұрғындардың өзін-өзі жұмыспен қамту мәселесін көлік саласы бойынша жүзеге асыру үшін көліктік инфрақұрылымды дамыту жобаларында қосымша жұмыс орындарын құру ерекше маңызға ие. «Батыс Еуропа – Батыс Қытай» транзиттік автодәлізін қайта салу мен «Қорғас-Жетіген», «Өзен-Түркіменстанмен шекара» темір жол желілерін салу жобаларында жүргізіліп жатқан жұмыстарға жергілікті тұрғындарды тарту одан әрі жалғаспақ. Жалпы алғанда, барлық жобаларға биылғы жылы 60 мыңға жуық адам тартылмақ.
Жоғарыда аталған халық үшін атқарылып жатқан және атқарылуға тиіс жұмыстар өз жемісін бермей қоймайтыны айдан анық. Қолға алынып жатқан жобаларға жергілікті тұрғындарды жиірек тарту, бұл жұмыссыздық мәселесін шешудің де алғышарттары іспетті. Сонымен бірге, жұмысшылардың жоба аяқталар тұсқа дейін салада белгілі бір кәсіпті меңгеріп алуларына мол мүмкіндік туғызбақ.
Жол-көлік саласында атқарылып жатқан ауқымды істердің қай-қайсысы да кезек күттірмейтіні хақ. Өйткені, мұның барлығы да сайып келгенде, отандастарымыз бен келешек ұрпақ игілігі үшін жасалып жатқан шаруалар болып табылады.