Қазақстан жетістіктерінің декларациясы таныстырылды

Бүгін  Парламент палаталарының бірлескен отырысында «Тәуелсіздіктің 25 жылдығы Қазақстан жетістіктерінің декларациясы» жобасы жария етілді. «Қазақстан Республикасы Тәуелсіздігінің 25 жылдығы декларациясы өте маңызды тарихи кезеңге арналған құжат. Осы уақыттың ішінде барлық жетістіктер мен табыстар ең алдымен, Тұңғыш Президентіміз, Елбасымыз Нұрсұлтан Әбішұлы Назарбаевтың ерен еңбегінің жемісі. Сонымен бірге әрқашан да Президентімізге қолдау көрсетіп, тірек болып келе жатқан халқымыздың береке-бірлігінің нәтижесі. Сондықтан Парламентте осы тарихи құжатты қарастыру - ол келе жатқан Тәуелсіздік мерейтойының ерекше маңыздылығын көрсетеді», деді ҚР Парламенті Мәжілісінің төрағасы Нұрлан Нығматулин. Аталған құжаттың жобасын Мәжіліс депутаты Қуаныш Сұлтанов таныстырды. Бірлескен отырысқа Премьер-Министр Бақытжан Сағынтаев, ҚР Мемлекеттік хатшысы Гүлшара Әбдіқалықова, ҚР Президенті Әкімшілігінің басшысы Әділбек Жақсыбеков, сондай-ақ Конституциялық кеңестің, Жоғарғы соттың және Орталық сайлау комиссиясының төрағалары, Үкімет мүшелері, Республика Президентіне тікелей бағынатын және есеп беретін мемлекеттік органдардың басшылары, Парламент палаталары аппараттарының жауапты қызметкерлері қатысты. Динара Бітікова, "Егемен Қазақстан".