Саяси науқан барысымен таныстырды

16 наурызда Орталық сайлау комиссиясының төрағасы Қуандық Тұр­ғанқұлов қазақстандық және шетелдік бұқаралық ақпарат құралдарының өкіл­дерімен брифинг өткізіп, Қазақстан Республикасының кезектен тыс прези­денттік сайлауын өткізуге дайындық барысымен таныстырды. ОСК төрағасының хабардар еткеніндей, сайлаушылар тізімін жасау – сайлау комиссияларының маңызды міндеттері­нің бірі. Бұл шара жыл бойы жүргізіледі. Жыл ортасында және жыл соңында жергілікті атқарушы органдардан сайлау­шы­лар­дың тізімдері алынған. Сайлау күні тағайындалған соң, сайлаушылардың тізімін нақтылау бойынша жұмыстар жүр­гізілді. Бүгінде елімізде көші-қон үде­ріс­тері белсенді жүріп жатыр. Астана мен Алма­тыда жаңа үйлер салынуда. Сондық­тан сайлаушылар тізімін жасауға баса назар аударылып отыр. 13 наурызда жергілікті атқарушы органдар cайлау­шылар тізімдерін сайлау комис­сияларына жолда­ды. Осыған байланысты еліміздің әрбір тұрғыны 18 наурыздан бастап сайлау­шы­лар тізімімен таныса алады. Орталық сайлау комиссиясының бас­шы­сы 19 наурызда еліміздің барлық өңір­лерінде сайлауды ұйымдастырушылармен семинар-кеңестер өткізу шаралары аяқта­латынына да тоқталды. Осыған дейін ОСК Астанада республикалық семинар-кеңес ұйымдастырды, деді ол осы туралы. Мұндай семинарлар 19 наурызға дейін еліміздің барлық аймақтарында өткізіледі. Бұл жиындарға Орталық сайлау комис­сиясының мүшелері мен ОСК орталық аппаратының қызметкерлері қатысуда. Бү­гінде аумақтық сайлау комиссия­ларының мәжілістері дауыс беру күніне әзірлік шараларына байланысты өтіп жатыр. Ал 18 наурызда біз Астана қа­лалық сайлау ко­миссиясының сайлау күніне дайындығын тыңдаймыз. Бұл ша­раларға жергілікті ат­қарушы органдар мен ішкі істер орган­дары­ның қызмет­керлері де қатысуда. Қуандық Тұрғанқұлов, сондай-ақ президенттікке кандидаттардың БАҚ-тарда үгіт материалдарын жариялауда заңнама талаптары сақталып отырғанын атап өтті. Оның айтуынша, Орталық сайлау комис­сиясы президенттікке кандидаттардың мате­риал­дарының бұқаралық ақпарат құ­ралдарында жариялануына мониторинг жүр­гізіп отыр. Кандидаттардың электрон­ды ақпарат құралдары мен баспасөз беттеріндегі материалдары мерзімі мен көлемі бойынша бірдей жарияланып келеді. Орталық сайлау комиссиясы аумақтық және учаскелік сайлау комиссиялары үшін ақпараттық-әдістемелік және бағыт-бағдар беретін материалдарды дайындау ісін толық аяқтады. Президенттікке кандидаттан бастап, сенім білдірілген адамдарға дейін білулері тиіс 30-ға жуық кітапша мен 8-ден астам плакат дайындады. Бұған қоса тағы 23 ролик шығарған. Сонымен қатар, бірқатар БАҚ Орталық сайлау комиссия­сына арнайы бет арнап отыр. Онда тү­сін­діру, ақпараттандыруға қатысты мәлі­меттер мен сайлау барысына байланысты өзге де ақпараттар жариялануда. ОСК төрағасы президенттіктен үміт­керлер Мэлс Елеусізов пен Ғани Қа­сымовтың үгіт билбордтарын орналастыру жайында Орталық сайлау комиссиясынан көмек сұрағанынан да хабардар етті. Президенттікке кандидаттар М.Елеусізов пен Ғ.Қасымов Орталық сайлау комиссиясынан Алматы мен Астана қалаларында және еліміздің бірқатар облыс орталықтарында өздерінің сайлауалды үгіт жұмыстарын жүргізу үшін сыртқы жарнама мен билбордтар орналастыруға көмек көрсетуді сұрады, деді ОСК басшысы. Алайда, осы шараны жүзеге асырушы мекемелер бұл жұмысты біршама ұзаққа созып жіберді. Астана мен Алматыда және бірқатар облыс орталықтарында бұл кандидаттардың жаңа билбордтары мен жарнамалары орна­лас­ты­рылатын болады. Қ.Тұрғанқұлов брифинг барысында ОСК-ға түскен арыз-шағымдарға да тоқ­талды. Оның келтірген мәліметтері бой­ынша, осыдан үш күн (16 наурыз) бұрын «Лайықты тұрғын үй» қоғамдық ұйы­мынан 136 өтініш түскен. Бұл өтініштер – Орталық сайлау комиссиясының құ­зырына жатпайтын мәселелер. Өтініштер банк пен құрылыс мекемелерінің және жеке тұл­ғалар арасындағы дауға бай­ла­нысты. Өті­ніш беруші 136 адам өздерінің мәселелері шешілмесе, дауыс беруге келмейтіндіктерін айтқан. Ал ОСК басшы­лары бұл аза­маттарға өздерінің құқық­тарын өздері шек­теп отырғандықтарын жеткізген. Әлисұлтан ҚҰЛАНБАЙ.