Бірлескен жұмыс жалғасады

Қазақстаннан ЕҚЫҰ Парламенттік Ассамблеясының Вице-президенті Қасым-Жомарт Тоқаев БҰҰ-ның Женевадағы бөлімінің жаңа Бас директоры болып тағайындалды. Ол – бұл лауазымдағы Азияның тұңғыш өкілі. «Тоқаев мырза Парламенттік Ассамблея қызметіне аса құнды үлес қосты және өз елі мен ай­мақ мүддесін көтеретін ма­ңызды дауысқа ие болды. Біздің көп­тарапты үнқатысуымызға ол қосатын қомақты үлес жетіспейтін болады, бірақ біздің білуімізше, ол жаңа лауазымда бейбітшілік пен тұрақтылықты қолдау жөніндегі ауқымды мәселелер бойынша жұмысты жалғастыра береді», – деді ЕҚЫҰ ПА Президенті Петрос Эфтимиу. Өзінің жаңа лауазымында То­қаев мырза БҰҰ Бас хатшысы Пан Ги Мунның Қарусыздану кон­ференциясы жөніндегі жеке өкілі болады. Қазақстан өзінің яд­ролық қаруларынан 90-жыл­дары бас тартқан болатын. «ЕҚЫҰ Парламенттік Ас­сам­блея­сындағы Қазақстан де­легациясының Басшысы ретінде Тоқаев мырза өзін көптарапты дипломатияның сенімді жақ­таушысы ретінде көрсетті. Біз онымен бірлескен жұмыстың жалғасатынына және біздің ортақ күн тәртібіміз бойынша БҰҰ-мен ынтымақтастығымыз тереңдей түсетініне сенеміз»  деді ЕҚЫҰ ПА Бас хатшысы Спенсер Оливер, деп хабарлады Парламент Сенатының баспасөз қызметі.