Динаның домбырасы

Домбыраны 1939 жылы шебер Арыстан Ермеков жасаған. Атақты күйші өзі тұтынған бұл құнды жәдігерді кейіннен музыкатанушы Болат Сарыбаевқа сыйға тартады. Қазір Ұлттық музейдің Қазақстан тарихы залында тұр. 9 жасында «домбырашы қыз» атанған Дина Нұрпейісова жасы 90-нан асып қайтыс болған. Күйші-композитор, қазақ музыка мәдениетінің аса көрнекті қайраткері, Қазақ КСР Халық артисі Дина Нұрпейісова Батыс Қазақстан облысының Жаңақала ауданы­на қарасты Бекетай құмы деген жерде дүниеге келген. «Дина 1870 жылы өнерде алғаш тұсауын кескен ұстазы Құрманғазы Сағырбайұлымен кез­деседі. Жас таланттың домбырада ойнауын қадағалап, бағыт-бағ­дарын байқаған дәу­лескер күйші одан бо­ла­шақта үлкен өнер иесі шығатындығына көзі жетіп, өзінің батасын берген екен. Дина Нұрпейісованың домбырада орындаушылық өнеріне қайран қалған композитор Ахмет Жұ­банов: «Дина ұзын да сүйріктей саусақтарымен домбыра пернесінде, сағағында небір алшақ пернелер аралықтарын ешбір мүлтіксіз алады. Симфония сазындай сиқырлы әуен 62 та­мырыңды бойлата, шымырлата, буырқана небір әсерге түсіреді» деген екен», дейді Қазақстан тарихы бөлімінің ғылыми қызметкері Ғалия Ақпан­бекова. Жетпістен асқан ша­ғын­да Дина Кенже­қызы күйлерін нотаға түсіріп, күйтабаққа жаз­дырып, 2 рет Одақ деңгейіндегі байқауға қатысқан. 1937 жылы халық өнерпаздарының республикалық сайысында бірінші жүлде алған Дина Нұрпейісова, 1939 жылы Мәскеуде ұй­ымдастырылған Бүкіл­одақтық х­а­лық аспаптары орын­дау­шыларының байқауында, ал 1944 жылы 83 жасында Орталық Азияның бес респуб­ликасы арасында Ташкент қаласында өткен өнер додасында жүлделі орындарға қол жеткізгені тарихтан белгілі. Айгүл СЕЙІЛОВА, «Егемен Қазақстан» Суретті түсірген Орынбай БАЛМҰРАТ, «Егемен Қазақстан»