Ұрпақтар жалғастығы

Алматыда Жамбыл атындағы қазақ мемлекеттік филармониясында «Нұр Отан» ХДП-ның, республикалық «Ақ орда» қозғалысы мен Қонаев атындағы халықаралық қордың ұйымдастыруымен «Қонаев және қазіргі Қазақстан»  деген  тақырыпта алқалы жиын өтті.  Ұлы тұлғаның жүз жылдығына арналған  биылғы   шараның беташар бастамасына  Дінмұхамед Қонаевпен бірге  қызметте серіктес болған, бүгінде айтулы ел ақсақалдары, зиялы қауым, марқұмның туған-туыстары,    өнер иелері, мұғалімдер мен студенттер  қатысты. Туған елі мен жеріне адал қызмет етіп, ширек ғасырға жуық басшылық қызметте жүріп Қазақ­станның өсіп өркендеуіне, бола­ша­ғына өлшеусіз еңбек сіңірген аса көрнекті мемлекет және қоғам қай­раткері Дінмұхамед Қонаевты қа­шан­да республика жұртшы­лы­ғы бір сәт ұмытқан емес. Жыл са­йын артында қалған қара орман қазағы туған күні мен дүниеден қайтқан күнін атап өтуді дәстүрге айнал­дыр­ған. Бір айта кетерлігі, Ди­мекеңнің 100 жылдық мерей­тойы Қазақстан тәуелсіздігінің жиырма жылдығы­мен тұспа-тұс келуінде де үлкен мән жатқандай. Ал тәуел­сіз­діктің 20 жылдық та­рихы тікелей Елбасымен етене бай­ланысты екенін жақсы білеміз. Содан да шығар, жиында сөй­ле­ген екі заманның куә­герлері осы екі ұлы тұлғасын қазақ елінің кешегі, бүгінгісімен сабақтас­ты­ра оты­рып, ойларын ортаға салды. Жиынды ашқан халықаралық Қонаев қорының құрметті президенті, мемлекет және қоғам қай­рат­кері Сұлтан Жиенбаев Димаш Ахметұлының азаматтық қасиет­тері­не, ел үшін сіңірген еңбегіне тоқ­тала келе, қазақ халқы ар­ман­даған тәуелсіздіктің маңызына ба­ға бере кетті. Сонымен қатар Ди­мекеңнің Н.Назарбаевты жо­ға­ры басшы қызметтерге таға­йын­дап, келешегінен көп үміт күткен сенімі ақталғанын, тәуелсіздіктің елең алаңындағы қиын уақыт­тарда сындарлы саясатының ар­қа­сында халықты қысқа мерзімде дағдарыстан шығарып, бүгінде елі­міздің әлемдік аренада абы­ро­йын өсіріп, басқаларға үлгі болып отырғанын тілге тиек ете келе көпшілікті сайлауға қатысып, дұрыс таңдау жасауға шақырып, ақсақалдық танытты. Ал Дінмұхамед Ахметұлының туған қарындасы Роза Ахметқызы ол кісінің өмірінен естеліктер айта келіп, Қазақстанның өсіп, өр­кен­деуіне барын салып, Ота­нын жа­нын­дай сүйгенін жастарға сон­ша­лықты әсерлі жеткізді. «Димаш Ах­метұлын қашанда еске алып, есімін ардақтауда елімізде ауқымды жұ­мыс­тар атқарылды, атқарылып та келеді. Енді жүз жыл­дығын да сондай дәрежеде атап өтеді деген ой­да­мын» дей келе, Роза Ахметқызы Қонаевтар әу­летінің атынан Мемлекет бас­шы­сына алғысын білдіріп, қазақ халқы да, Димекең де армандаған тәуелсіздіктің Президент Н.На­зар­баевтың есімімен егіз ұғым еке­нін айтып, жиналғандарды сай­лауға қатысуға шақырды. Аға буынның атынан сөз алған мемлекет және қоғам қайраткері, Қонаев атындағы халықаралық қордың вице-президенті, еңбек ардагері Кеңес Аухадиев әңгімені әріден бастап, Димекең Қазақ­станды 25 жыл басқарғанда са­бырлы мінезімен, терең ойымен ел­ экономикасының өсіп, мә­де­ниетінің гүлденіп, жастардың білімге жеткен кезі екенін бүгінгі ұрпақтың есіне салды. «Біздің ұрпақпен қатар бүгінгі Елбасы да Димекеңнің тәрбиесін көріп өскен азаматтың бірі. Сонау Теміртауда жұмыс істеп жүргенде танып біліп, үлкен үміт артқан Димекең оны 1979 жылы ҚОПК хатшысы етіп тағайындады. Ди­мекеңнің де зейнеткерлікке шы­ғатын уақыты жақындап, жаңа заман, жаңа ғасыр келді. Тәуелсіз елдің тұңғыш Президенті Н.На­зарбаевқа өтпелі кезеңдегі қиын­шылықты жеңу оңайға түспеді. Экономикада да, саясатта да өз­ге­ріс болып жатқан кезде ақылға са­лып, Н.Әбішұлы елімізді жаңаша құрды. Енді, міне, Тәуелсіз­дігі­міз­дің биыл жиырма жылдығын тойлап отырмыз»,–деді ол. Ұрпақ сабақтастығы, ұрпақ жал­ғас­тығы дегеніміз осы болар, жиын­ға келер алдында Диме­ке­ң­нің ет-жақын туыстары, ел аға­ларымен бірге марқұмның басына барып, құран бағыштап, тәу етіп қайтқан рес­пуб­ликалық «Ақ орда» қоз­ға­лы­сының төрағасы, «Нұр-Отан» ХДП хат­шы­сы Қай­рат Сатыбалдыұлы ұлы тұл­ғаны өзін­ше зерттеп жүр­генін, «өт­кен­сіз болашақ жоқ» деген қағиданы ұстанатынын алға тартты. Сон­дай-ақ Димаш Ах­мет­ұлы барлық саналы ғұмырын, күш-қуатын, жі­герін еліне жұмсағанын, әрі ұла­ғатты ұстаз, үлкен тәрбиеші бол­ғанын айта келіп, алдағы ме­рей­тойды халық болып лайықты өткізуге шақырды. – Димекең туралы кезінде Елбасымыз: «...Аса көрнекті мемлекет және қоғам қайраткері Дін­мұ­ха­мед Ахметұлы Қонаев­тың да тарих­тың төрінен орын алары дау тудыр­майды. Димекең – өз за­манының перзенті болған тұлға. Қонаев есімі Қазақстан халқымен бірге жасары анық, ақиқат. Ол кісі бәрімізге ұстаз болған ұлы адам» деп жазды. Мемлекет бас­шысы осы сөзін дәлелдеді де. Димаш Ахметұлы қайтыс болған соң Лениногор полиметалл комби­на­тына, ҚР ҰҒА-ның тау-кен инсти­туты­на, Алматы қаласындағы К.Маркс кө­ше­сіне ол кісінің есімін берді, бас­қа да бастамаларға ұйыт­қы болды, – деді бізге берген сұхбатында Қайрат Сатыбал­ды­ұлы. Дінмұхамед Ахметұлы кезінде жастарға, әсіресе өнердегі талант иелеріне әкелік қамқорлық көр­сет­кенін үлкен сүйіспеншілікпен жеткізген екі ғасырдың куәсі, қазақтың дара туған бұлбұл қызы Бибігүл Ахметова: «Нұрекең аз ғана уа­қыт­тың ішінде елімізді биікке көтерді. Бүгінде Димаш аға­ның өсиет­терін Нұрекең орындап жатыр. Бұрын шетелге барғанда қазақ­ты ешкім танымайтын. Қа­зір бар­саң «Назарбаев» біздің тө­л­құ­жаты­мыз сияқты. Басты­сы, ел­дің ты­ныш­тығын айтсаң­шы. Алысқа бар­май-ақ Қырғыз­стан­ның өзінде не болып жа­тыр, – деп тебірене сөйледі. Сондай-ақ 40 жыл Мәс­кеу­де қызмет істеген дипломант-ардагер Сә­бит Жаданов Диме­кең­мен жиырма жыл бірге қызметтес болғанын, бұған дейін Ресей аза­маты бол­ған­дық­тан дауыс бере ал­маса, енді Қа­зақ­станның аза­­мат­ты­ғы­на қол жеткізіп, сай­лауға қа­ты­сатын қуа­нышымен бөлісті. Д.Қонаевқа арналған сал­та­нат­ты кешке осыншама халық­тың жиналғанына ризашылығын білдірген ҚХА-ның мүшесі Қа­зақбай Қасымов: «Елбасының ке­мең­гер­лік саясатының арқа­сын­да Қазақ­стан халқы Ассам­блеясы елдегі ұлттар мен ұлыс­тардың татулы­ғын дүние жүзіне паш етті» десе, ұлты грузин Валико Маткаво мырза: «Менің өмірімде Қонаев, Назарбаев есім­дері жаныма жа­қын. 1965 жылдан осында тұра­мын, бес балам бар. Басшы қыз­мет­те болдым. Осы уақыт аралы­ғында менің тарихи отанымда көптеген қиын жағдай өтті. Жеті бала тәрбиелеген ата-анам бейбіт уақытта босқын атанды. Ауыл ауылға, ағасы інісіне қарсы тұр­ды. Болмаған соң 17 ағайын-туы­сымды осында кө­шіріп әкелдім. Мұн­дағы айта­йын дегенім, дү­ниеде еркіндік пен бейбітшілікке еш нәрсе тең келмейді», деп кеңі­нен шешілді. Кеште Бибігүл Төлегенова, Ес­­­кендір Хасанғалиев, Н.Нүсіп­жанов бастаған әншілер тобы, Н.Тілендиев атындағы «Отырар сазы» академиялық фольклор­лық-этнографиялық оркестрі өнер көрсетті. ...Иә, адам өлген күні емес, ұмытылған күні өледі деген. Ендеше, бүгінгідей ел-жұртының ма­хаб­батына бөленіп, аты аңыз­ға ай­налған айтулы тұлға Дін­мұ­ха­мед Қонаевтың жарқын бейнесі әр­қашанда елінің жүрегінде сақ­та­лары хақ. Гүлзейнеп СӘДІРҚЫЗЫ.