Айтыскер ақынның құрметіне арнайы байқау жарияланды

Айтыста ақпа, жазбада шақпа болған белгілі ақын, айтыскер Есенқұл Жақыпбековтің құрметіне арнайы байқау жарияланды. Додаға 15-35 жас аралығындағы үміткерлер қатыса алады, деп хабарлады ҚазАқпарат. Жарыс шарттарына сәйкес, қатысушы Есенқұл Жақыпбековтің сөзіне жазылған бір әнді және өз қалауы бойынша тағы бір ән орындауы керек. Бас жүлде – 500 мың, І орын – 300 мың, ІІ орын – 150 мың, ІІІ орын – 100 мың теңге. Сондай-ақ, Есенқұл Жақыпбековтің сөзіне жазылған «Жаңа ән» номинациясына арнайы жүлде 100 мың теңге тігілген. Байқауға қатысушылар 20 ақпанға дейін өтініштерін қалдыруы тиіс. Дода 23 ақпан күні өтеді. Ал келесі күні жеңімпаздарды марапаттау рәсімі, сонымен қатар гала-концерт ұйымдастырылады. Қарасай аудандық мәдениет үйінің әдіскері Гауһар Көкебаеваның мәліметінше, жарысқа Қарасай ауданының әкімдігі ұйытқы болуда. Дода тұңғыш рет республикалық деңгейде ұйымдастырылып отыр.