Елді елең еткізген елік

Қысы қаһарлы Шығыста мұндай жайттарға жергілікті жұрттың еті үйренген, көп таңғала бермейді. Десек те, «ауылға елік кіріп кетті» дегенде еріксіз елең еттік. Мұны бізге Тарбағатай ауданының Ақсуат ауылын­да тұратын ардагер әріптесіміз Хамза Сәтиев хабарлады.  – Аңшылардан қашты ма, ит-құстан үрікті ме екен, бақ­шамызға елік кіріп кетті. Қоршаудағы темір торға соғы­лып, жараланып қалыпты. Ұстап алып, жеке қораға қамап, шөп беріп, үш-төрт күн бақтық. Бетін­дегі қаны кетіп, жарасы жа­зылғандай болған кезде ауылдың сыртына Тана мырза ауылы жақтағы шабындыққа апарып, далаға босатып жібер­дік, – дейді әріптесіміз. Хамза Сәтиевтің айтуынша, екі көзі мөлдіреп тұрған түз тағысы балалардың қолынан босап шыға салысымен зымырай жөнеліпті. Шамамен жүз метрдей жерге барғаннан кейін тоқтап, артына бұрылып, сәл қарап тұрыпты да, ен даланы бетке алып, қалың шиге барып сіңіп кетіпті. «Қорада тұр­ғанда еліктің қасына барып, шөп салып, басынан сипап, суретке түсіп, бауыр басып қалған немерелерім Иман­ғали мен Айзере: «Әлгі елік далаға қашып бара жатып бізге бұрылып, «сау болыңдар» деді ғой», деп мақтанады», деп аяқтапты Хамза Сәтиев ағамыз бізге жолдаған шағын хабарын. Елік дегеніңіз жануардың ішіндегі сұлуы ғой, шіркін!  Артына бұрылып қарағаны, періште көңіл балалар мен кең пейілді журналист-отағасына жеткізген алғысы шығар. Өзінен гөрі жұрттың қамын көп ойлайтын журналист қауымы шынында да аңқылдаған, алғаусыз халық қой. Түз тағысы да сірә, соны сезген болар. Азамат ҚАСЫМ, «Егемен Қазақстан» Шығыс Қазақстан облысы  Суретті түсірген Хамза СӘТИЕВ