Еңселі ертеңіміз үшін таңдау жасайық

Егіндікөл ауданының тұр­ғын­дары ежелден ұйымшыл­ды­ғымен, еліміздегі оң өзге­рістерге өзіндік екпін берер белсенділігімен ерекшеленіп тұрады. Басты себеп – жақсы өмір сүру үшін жақсы еңбек етіп, жақсылықтарды өз қолы­мен жасауды мұрат санауда деп білемін. Тың көтеру жылдары осы өлкеге жас агроном ретінде жолдамамен келген мен үшін бұл тіршілік мағынасын арттырар үлкен қасиет ретінде, жігерлендіруші қасиетке ие ұғым. Өлкеміз аса маңызды өзге­ріс­тер құшағында. Ел тәуел­сіздігінің тәбәрік талап­та­ры­нан туындаған жемістерді кө­ру­дің қаншалықты қымбат та ға­ни­бет екендігін тұшыну да бақыт. Күні ертең кезектен тыс президенттік сайлау болмақ. Елімізге әйгілі төрт азамат бәсекеге түс­келі тұр. Бұл – бақталастық емес. Отанымыздың кемелдігін бай­қа­та­тын қадам деп бағалаймын. Енді жер жүзі назарындағы сай­лауымызды талап дәрежесінде өткізу ұлық парызымыз деп білемін. Ауданымызда 18 сайлау учаскесі құрылып, дауыс бере­тін­дер­дің тізімі мұқият қатталды. Со­ның 30 пайызы зейнет жасын­да­ғы азаматтар болғандықтан, ақ­са­қалдар алқасының тоғыз мүше­сінде де тыным жоқ. Сайлауалды жиналыс, кездесу, басқа да саяси шаралардың барлығына қатысып, ағалық ақыл-пайымымызды ор­та­ға салдық. Аумақтық сайлау комиссиясының төрағасы Өмірзақ Жұманға рахмет, бізді бірде-бір шарадан тыс қалдыр­майды. Жуырда аудан орта­лы­ғындағы №317 сайлау учаскесінде биыл тұңғыш рет дауыс беретін 8 жаспен кездесу ұйым­дастырылды. Мен оларға сонау қырқыншы жылдары Ақ­мола кәсіптік мектебінде оқып жүріп, бірінші рет дауыс бергенімді әңгімелеп бердім. Сайлаулардың ерекшелігін түсіндіруге тырыстым. Қызық жағдай болды. Кездесу үстінде учаске орналасқан №1 қазақ орта мектебінің мұғалімі Жандос Алиакбаров 3 сәуір күні 25 жасқа толады екен. Шараға қа­тысқан сегіз жас (аудан бой­ын­ша – 78) Жандос ағаларының туған күнін ерекше оқиға ретінде атап өтуге шешім жаса­ды. Мәселе онда емес, мәселе ертеңгі күніміздің айшықты оқиғаларға, жақсы үміттерге толы болатындығына сенімнің молдығында деп ұқтым. Жолдыбай БАЛТАБЕКОВ, ақсақалдар алқасының төрағасы. Ақмола облысы, Егіндікөл ауданы.