Малға бай Мойынқұм кәсіпорындарға да кенелді

Мойынқұм мыңғырған малымен ғана бай емес, бүгінде өркендеген өнеркәсібімен де басқалардан мойны озып тұр. Оған осы өңір­ден бірінен кейін бірі салынып жатқан ірі кә­сіпорындардың менмұндалаған мұна­ра­лары куә. Өткен жылдың аяғында мұн­да цемент өндірумен шұғыл­да­на­тын «Мыңарал тас ком­па­ниясы» ЖШС өңірдегі аса ірі це­мент зауытын іске қосқан бо­латын. Сөйтіп алғашқы қар­қынмен 35 мың тонна цемент өндіріліп, сатылды. Бірақ кейбір себептерге байланысты зауыт жұмысы екі айға тоқтап қалды. Бұл, әрине, құлаққа жағымсыз жәйт. Әсіресе, облыс аумағынан «Батыс Еуропа–Батыс Қытай» автомагистралы салынып жат­қан кезде пайдалануға жаңа ғана берілген цемент зауы­ты­ның тоқтап тұруы ешқандай ақылға сыймайтын іс болатын. Осы жобаға Мыңарал цементін мүмкіндігінше мол өткеруге күш салып отырған ЖШС мен облыс басшылары мәселеге жауапкершілікпен қарауының ар­қа­сында түйін шешіліп, зауыт сәу­ір айының алғашқы күнінен бастап толық қуатында жұмыс іс­тей бастамақшы. Сөйтіп ал­дын-ала жа­сал­ған жоспар бойын­ша биыл барлығы 250-300 мың тонна цемент өндіріліп, өткеріл­мек. «Мыңарал тас компаниясы» ЖШС сонымен бірге, өнімдерін облыстан тыс жерлерге де шы­ғар­мақ. Ол үшін өз тасымал құ­рал­дарын пайдалануды көздеген кәсіпорын бүгінге дейін 95 вагон сатып алса, енді 130 вагонды күтіп отыр. Бүгінде «Мыңарал тас компа­ниясы» ЖШС-да 500 жұмысшы еңбек етеді. Күн жылысымен олар­дың саны бұдан да арта түс­пек. Демек жұмысшыларға жағ­дай жасау – жауапты міндеттердің бірі. Сондықтан болар, қазір мұн­да үш қабатты 6 үй салынып жа­тыр. Олар күзге дейін зауыт жұ­мыс­шыларының игілігіне ұсынылмақ. Ал индустриялық-инновация­лық даму бағдарламасы шеңбе­рін­де қолға алынған Хантау цемент зауыты құрылысының тоқ­тап тұрғанына жылдан асқан. Жа­қында бұл мәселенің түйіні де шешімін тапты. Бұған дейін 70% дайын болған зауыт құ­ры­лысы енді одан әрі жанданбақ. Жоба бойынша Хантау цемент зауыты жыл аяғына қарай өз өнімін шығара бастайды. Мойынқұмдағы Қияқты ауылының маңында гранит цехы да жұмыс істеуде. Оның иесі «Аль-Басар» ЖШС болып табылады. Цех қазір бордюр шығарумен айналысуда. Мінеки, аты аңызға ай­нал­ған «малшылар маршалы» Жа­зылбек атамыздың тұсында ақ­тылы қойларымен аты шыққан Мойынқұм өңірі енді ел-жұртының байлығын заман та­лабына сай алып кәсіпорын­дарымен де кенелтуде. Бұдан индустрия игілігінің шалғай ауылдарға да жете бастағанын анық байқауға болады. Көсемәлі СӘТТІБАЙҰЛЫ. Жамбыл облысы, Мойынқұм ауданы, Мыңарал ауылы.