Қайта оралған коммунистік сенбілік

Кеше Астанадағы ҚКХП-ның қалалық комитеті орналасқан Бейбітшілік көшесінің бойында кезектен тыс президенттік сайлау қарсаңында коммунистік сенбілік ұйымдастырылды. Бұл шараға Коммунистік халықтық партияға мүше азаматтар ұйытқы болды. Қолына күрек ұстап, қаланы күл-қоқыс пен қардан тазарту үшін сенбілікке шыққан азамат­тар­дың бірі – Ғабдолла Зарипов. Еңбек өтілі 58 жылды иектеген қария Коммунистік партия қата­ры­на 50-ші жылдары қосылған екен. Жасы 86-ны еңсерсе де, қарттың жүрісі ширақ, қимылы епті көрінді. «Біздің сенбілікті ұйымдастырудағы мақсатымыз – өзге партияларға үлгі көрсету. Олар­дың да осындай игі шара­лар­ды атқаруына мұрындық болу. Бүгін біз бір кісідей жұмылып, осы сенбілікке қатысуға келдік. Сол арқылы қаланың тазалы­ғы­на, көрікті болуына үлес қоспақ ниеттеміз», – деді ардагер коммунист. Сондай-ақ, ол бүгінде Коммунистік халықтық партия көтер­ген бастамаларға халықтың көп бөлігі қолдау көрсетіп отырға­нын, бұл халық­шыл­дар үшін өте маңызды рөл атқа­ра­тынын айтып өтті. «Біздің бағдар­ла­ма­ларымыз – ел тұрғындарын жұмыспен қам­туға, қарттардың зейнетақы­ларын көтеруге, бір сөзбен айт­қанда, ха­лық­тың әлеуметтік әлеуе­тін жақсартуға ба­ғыт­талуы­мен құнды», – деді Ғ.Зарипов. Аталған шараның басы-қа­сында жүрген жандардың ай­туын­ша, бұл бастама сайлауалды үгіт-насихат жұмыстарының соң­ғы күндеріне орайластырылып отыр екен. «Бүгінгі сенбілікке 35 адам жиналды. Олардың ара­сында біздің ардагерлер, партия­ның қалалық комитетінің мүше­ле­рі және сайлауалды науқанына қолұшын беріп жүрген жастар да бар. Бұдан кейін Желтоқсан кө­шесі мен Жеңіс және Республика даңғылдарына да барып, сол жерлерде де сенбілік өт­кіз­бекпіз. Сенбілік – біздің партия атынан сайлауға түсіп отырған Жамбыл Ахметбековтің алдағы саяси нау­қанға қатысты сай­лауалды науқанының соңғы шараларының бірі. ҚКХП-ның орталық штабы да бізге осындай сенбілік өткізу жөнінде ұсыныс айтқан болатын», – деді ҚКХП Астана қалалық комитетінің бірінші хатшысы Ұмсындық Байзақова. Ләйла ЕДІЛҚЫЗЫ. Астана. --------------------------- Суретте: халықшыл коммунистер сенбілікте.