Ғаламтор мүмкіндігін пайдаланған насихат

Кеше президенттіктен үміткер, Қазақстанның Пат­риоттар партиясының серкесі Ғани Қасымов «BNews.kz» ақпарат агенттігінің студиясында интернет желісінде бейне-конференция өткізді. Алдымен Ғани Есенкелдіұлы өзінің сайлауалды тұғырнамасымен танысты­рып, сайлаушылармен кездесулерінде көпшілік тарапынан айтылған тілектерге де тоқталып өтті. Содан кейін сауал­дар­ға жауап берген үміткер осыған дейінгі президенттік сайлауға түскенде, жастау болсам, қазір есейдім, бұрын «Жалғыз шапқанның дүбірі шықпас» де­гендей, жалғыз едім, ал енді осы сайлауда мені қолдаған партияластарым болды. Бұл, әрине, біздің партиямыз үшін өте маңызды. Алда парламенттік сайлаулар өткенде де партияға осы жи­наған тәжірибе көмегін тигізетін болады, деді. – Осы жолғы сайлауалды үгіт-наси­хат жұмыстарынан үміткерлердің бірі­нің бас тартуы дұрыс болмады. Осындай жағдайда қал­ған үшеуміз де теледидардан берілетін пікірталастан бас тартуымызға тура келді. Сайлауға төрт үміт­кер түскендіктен, үшеу­­міздің ғана барып жур­налистердің қой­ған сауалдарына жауап беруіміз орынсыз көрі­нетін болды, ал негізінде қай кандидатты да барлық көрермен­дер­дің тыңдауы, ой түюі қалыпты көрінер еді. Келесі жолғы сайлауда заң­намалық тұрғыда осыны бекіту қажет. Теледидардан пікірталастар міндетті түрде өткізілуі тиіс деп санаймын, – деді Ғ.Қасымов. Содан кейін өзінің кездесулер өткізгенде халықтың көңіл күйіне қатты көңіл бөлгенін айтты. Бір байқағаным, ешқашан орындалмайтын уәде беруге болмайды, ол бумеранг ретінде бетіңе қайтып соғуы мүмкін, деген Ғани Есенкелдіұлы алдын ала bnews.kz порталында үміткермен он­лайн конференция бо­ла­ды дегенге хабар­ла­нып, сұрақтарын жол­да­ған интернет пай­да­ланушылардың қойған сауалдарын да жауап­сыз тастаған жоқ. Олар да түрлі тақырыптарға бағытталған екен. Бірі – аграрлық секторды реформалау қандай ба­ғытпен жүргізілуі тиіс? – десе, екіншісі – «Бай құдай болсам дейді» дегендей, Қазақстан олигархтары құдай бола ма әлде олардың мүйіздерін қайырудың амалы бар ма, егер президент болсаңыз осылармен қалай күресер едіңіз? – деп сұрайды. Барлық сауалдарға жауап берген президенттіктен үміткер ертеңгі сайлауда елін сүйетін патриоттарға елдің сеніп дауыс беретініне өзінің сенетіндігін білдірді. Анар ТӨЛЕУХАНҚЫЗЫ. Астана.