Жүз жолдық жаңалықтар

Футбол. Бейсенбі күні Қа­зақстан чемпионатының пре­мьер-лигасында өнер көрсе­те­тін 12 команда кезекті ойын­дарын өткізді. Осы турдағы ең басты кездесу Астанада «Локомотив» пен «Ақтөбе» ұжым­дары­ның арасында өтті. Бұл ойында өткен жылғы ел суперкубогының иегері соңғы жылдардағы еліміздің бетке ұстар командасын 1:0 есебімен ұтты. Матч­та астаналықтар сапында жал­­ғыз доптың авторы осымен төрт ойында екі доп соққан Таңат Нөсербаев атанды. Биылғы мау­сым­да құрамына кілең мықты фут­болшыларды жинаған «темір­жол­шылар» осы кездесуден кейін чем­пиондық атақ үшін таласатын басты команда екендерін көрсет­кен сияқты.  Ал былтырғы ел чем­­пио­ны Қостанайдың «Тобыл» клубы өз алаңында Қараға­нды­ның «Шахтер» командасынан 2:1 есебімен ұты­лып қалды. Осы ойында же­ңіл­се де «Тобыл» чем­пиондық атаққа үміткерлердің бірі болып қала бермек. Басқа ойын­дар мына­дай есеппен аяқ­тал­ды. Шымкент­те «Орда­басы» «Тараз» команда­сы­нан 1:0 есебімен жеңілсе, Пав­ло­дардың «Ер­тіс» клубы керісінше, өз ала­ңында Өскеменнің «Вос­ток» ұжы­мын 3:1 есебімен жеңді. Сол сияқ­ты Талды­қор­ған­ның «Жетісу» ко­ман­дасы қызыл­ор­далық «Қай­сар» ұжы­мынан 3:0 есебімен басым түс­ті. Осы турда жалғыз тең есеппен тар­қас­қан ойын «Аты­рау» мен «Қай­рат» ара­сында тіркелді. Есеп – 1:1. Тақырыпқа тұздық: Қазақстан чемпионатының ойындары өтіп жатқан кезде халықаралық You Tube сервисінде «Тобыл.ТВ» ар­на­сы іске қосылды. Қазақ фут­болының тарихында осылайша алғаш рет қостанайлық команда ойындарын бейнетүсірілім арқы­лы көрсететін арнайы аккаунт ашты. Мұндай интернет арналар қазір Батыс Еуропаның біраз ко­мандаларында бар. Сонымен бірге олардың жеке телеарналары да жұмыс істейтіні белгілі. Мәселен, Киевтің «Динамо», Англияның «Манчестер юнайтед» тағы басқа клубтарының телеарналары тәу­лік бойы команданың жаңалық­та­рын жанкүйерлермен таныс­ты­рып оты­рады. Енді алдағы кезде біздің елімізде де осындай интернетарна ашылса деген тілегіміз бар. Ал бізге жалғыз спорт теле­ар­на­сын ашу қолымыздан келмей жат­қан­да футбол телеарналарын ашу туралы сөз қозғау әлі ерте сияқты. * * * Теннис. Қазақ теннисшісі Зарина Диас Қытайда өтіп жатқан ITF Wenshan турнирінде жарты­лай финалға шықты. Кеше ол біздің тағы бір теннисшіміз Галина Воскобоеваның алғашқы айналымда жолын ора­ған жапон Кумико Ильзимоны 6:0, 6:0 есебімен ұтты. Зарина жапон қызымен өткен аптада Қы­тайда аяқталған ITF Kunming турнирінде де кездесіп, оны 6:3, 6:4 есебімен жеңген болатын. Осы жарыста ол финалға жеткені белгілі. Енді бүгін Зарина хорват теннисшісі Ани Миржацикамен кездеседі. Зарина Диас Қазақстан теннис федерациясының қолдауы­мен үш жылдан бері Чехияда жаттығуда. Екі жылдан бері 17 жасар қызы­мыз жасөспірімдер қа­т­арынан ересектер ауылына ауыс­ты. Сол кезден бастап тә­жі­рибе жинақтап үлгерген Зарина WTA рейтингі бойынша Сесиль Каратанчева мен Галина Воскобоева сияқты отан­дас­­тарымыз­дан озып, Ярослава Шведовадан кейінгі еліміздің қыз­дар арасын­дағы екінші ракеткасы атағына ие болды. Қазір Зарина  рейтингте 153 орында тұр. Муайтай. 3 сәуір күні Ас­танадағы «Дәулет» спорт кешенінде кәсіпқойлар арасында Қа­зақ­стан Республикасы Пре­зи­­дентінің кубогы мен Тайланд королінің кубогына іріктеу жа­рыс­тары өтеді. Бес салмақ бойынша өтетін сынға Қазақстан тарапынан Ілияс Мусин (51 кг.), Жәнібек Сәдуа­қасов (54 кг.), Серік Құрмаханов (67 кг.) рейтингтік жекпе-жектерге шықса, 86 кг. салмақтағы Нұрболат Сең­гіров иран Разани Маджидимен Азия чемпионы үшін таласады. Ал 72 кг. сал­мақ­тағы Алмас Сма­ғұлов (Қазақ­стан), Алан Чапмен (Ирландия), Эрвин Ротакер (Гер­мания), Саймон Джаджин (Тай­ланд) Тайланд королі ку­богы үшін іріктеу жарысына қатысады. Дастан КЕНЖАЛИН.