Қазақстан – керемет нәтижелер күтіп тұрған ел

Жақында канадалық профессор, тарих ғы­лым­дарының док­торы Франк Альбоның Ас­та­наның 20 жылдық мерейтойына және ЭКСПО-2017 ха­лық­аралық маман­дандырылған көрме­сіне арналған «Астана: Аңыздар, Архитектура және Тағдырлар» атты кітабы жарыққа шықпақ. Осы кітапты жазу барысында ғалым біздің елде бірнеше мәрте қонақ болды, оның тарихы және тәуелсіз Қазақстанда жүзеге асырылған әлеу­меттік-экономикалық рефор­ма­лар туралы білді. Прези­­дент Нұрсұлтан Назарбаев Қазақстан халқына Үндеу жария­лап, билік тармақтары арасында (Президент, Парламент және Үкі­мет) өкілеттіктерді қайта бөлу жоспары туралы хабарлады. Онда Конституция мен кейбір заңдарға өзгерістер енгізу қарастырыл­ған. Біз Үндеуге орай пікірін біл­мек оймен ғалымға бір-екі сұрақ қойған едік.    – Сіз бұл бастаманы қалай бағалайсыз? – Тарихқа көз жүгіртсек, демокра­тияға қол жеткізу жолында әр ел әр түрлі кезеңдерден өткенін көруге бола­ды. Еуропаға, тіпті, Канадаға нағыз демократиялық қоғам құру үшін айтар­лықтай ұзақ жылдар, кей жағдайда ғасырлар керек болды. Ал бар-жоғы 25 жыл ішінде Президент Н.Назарбаевтың көреген бастамаларының арқасында Қазақстанда демократияны дамыту бағытында үлкен қадамдар жасалғаны таңғаларлық құбылыс. Конституциялық реформалар жасау туралы таяуда көтерілген баста­ма Пре­зиденттің алысты болжа­ған көрегендігі мен керемет бастама­шыл­дығын ғана емес, оның көп жыл бұрын мұндай маңызды мемлекеттік шешімдердің ашықтықты талап ететіні туралы уәдесін орындағанын көрсетеді. – Бұл үдеріс Қазақстан қоғамына қалай ықпал етеді деп ойлайсыз? – Билік өкілеттіктерін басқа билік тармақтарының, халық өкілдерінің арасында қайта бөлу әрқашан оң ықпал етеді. Мен бұл өзгерістерді тағатсыздана тоса­мын, себебі, Қазақстанның дамуын ұзақ жылдан бері бақылап келемін. Дер уа­қытында қабылданған осы шешім керемет нәтижелерге жол ашады деп білемін. Әңгімелескен Арнұр АСҚАР, «Егемен Қазақстан»