Юлия Галышева: Олимпиадада жеңіске жетемін деп үміттенемін

Қазақстандық спортшы Юлия Галышева параллельді могул жарысынан кейінгі қарсыластарының деңгейі және 2018 жылға арналған жоспарлы жайлы бөлісті. «Қарсыластарымның бәрі Әлем кубогына қатысады. Деңгейлері жоғары болғандықтан, жарыс та оңай болмады. Бірақ дайындығымның арқасында алға қойған мақсатыма жеттім», – деді Галышева. «Ауа райы өте қолайлы болды. Кеше қар жауғандықтан бүгін бізге ыңғайлы болды. Ал жанкүйерлердің қолдауын сөзбен айтып жеткізе алмаймын. Бойыңа жігер беріп, жеңіске қарай жетелей түседі», – деді қысқы Азия ойындарының алтын жүлдегері. «Қарсыласым Мики Ито Алматыға келіп, екінші орын алып кеткен. Үлкен жарыстарға қатысып жүргендіктен, оңай болмады. Сондай-ақ, жаттықтырушымды ауыстырдым. Енді Олимпиадада биіктен көрінемін деп үміттенемін», – деді ол. Айта кетейік, бүгін фристайлшы Юлия Галышева параллельді могулдан Жапонияда өтіп жатқан қысқы Азия ойындарында алтын жүлдеге қол жеткізді.