Фируза Шәріпова: Қаржы мәселесін шеше алмай отырмыз

Қазақстандық кәсіпқой боксшы қыз Фируза Шәріпова алдағы жоспарының күрт өзгеруіне байланысты фильмдерге түсуден бас тартқанын мәлімдеді. Бұл туралы allfight.ru хабарлады. Алғашында Шәріпованың титулды жекпе-жек өткізетіні хабарланған. «Титулды айқас үшін біраз қаржы керек болды. Ал біз әзірге демеуші таба алмадық. Оның үстіне бапкерім де ауысты. Ол кісі де менің шаршы алаңдағы күшімді байқап көргісі келеді. Сол үшін біз рейтингті ұрыс өткізу жөн деп санадық», – дейді боксшы қыз. Фирузаның бұл жолғы қарсыласы да кәсіпқой рингке жаңадан келген боксшы. «Қазіргі уақытта қарсылас табу оңай шаруа емес. Көбісі бас тартады немесе қомақты қаржы сұрайды. Дебютант дегенде тәжірибесі аз екен деп ойламаған жөн. Юлия Чернобородова үлкен турнирлерде топ жарған мықты боксшы. Кәсіпқой боксқа алғаш рет шығайын деп тұрғандықтан алты раундтан ұзай алмаймыз», – деді Шәріпова. «Соңғы күндері жоспарымыз күрт өзгеріп кетті. Қазақстаннан, Ресейден түрлі киноларға, бағдарламаларға түсу жөнінде ұсыныстар түскен. Жақында Голливудтың режиссерлерімен танысу үшін әрі кастингтерге қатысу үшін Америкаға жол жүрмек болғанбыз. Мен түсетін «Игра престолов» фильмі де болған. Бірақ бәрінен бас тартуға мәжбүр болдық. Себебі, бокс мен үшін бірінші орында. Чемпиондық жекпе-жегіме дейін жеке шаруама уақытым болмайды», – деді қазақстандық боксшы қыз. «Юлия Чернобородоваға қарсы айқасым әлем чемпиондығы үшін өтетін ұрысыма дейінгі дайындық болмақ. Ал одан кейін сәуір айында Мәскеудегі «Бокс академиясында» тағы да рингке шығуды жоспарлап отырмыз. Ол титулды жекпе-жек болуы тиіс. Жоспарымыздың бәрін қаржы мәселесі ұстап тұр. Осы іс шешілгеннен кейін тәжірибесі көп, чемпион қыздардың бірін жекпе-жекке шақырамыз. Қазірдің өзінде әлемдегі жетекші ұйымдардың бірінен рейтингі жоғары боксшылардың бірімен титулды ұрыс өткізу жөнінде алдын ала рұқсатын алдық», – деді боксшы қыз. «О баста бір компаниямен демеушілік мақсатында келісімшартқа қол қойғанбыз. Бірақ олар өз міндетін орындаудан бас тартты. Одан бөлек көптеген мекемелер қаржылай көмектесетіндерін айтқан. Бірақ бәрі сөзбен ғана шектелді. Қазір командам демеушілер іздеумен айналысып жатыр», – деді Фируза Шәріпова. Айта кетейік, Фируза Шәріпова 4 наурыз күні Юлия Чернобородовамен жұдырықтасады.