Азиада-2017. Қазақстан құрамасы командалық есепте төртінші орында келеді

Жапонияның Саппоро қаласында өтіп жатқан VIII қысқы Азия ойындарының алтыншы күні аяқталды. Осы уақыт аралығында командалық есепте Жапония құрамасы 56 медалімен (19 алтын, 19 күміс, 18 қола) көш бастаса, екінші орында Оңтүстік Корея келеді. Олардың еншісінде 14 алтын, 14 күміс, 14 қола бар. Ал үштікті Қытай құрамасы түйіндеп тұр. Аспанасты елінің спортшылары алты күннің ішінде 9 алтын, 8 күміс, 7 қола жүлде жеңіп алды. Ал Қазақстан құрамасы әзірге төртінші орында келеді. Осы уақыт аралығында жерлестеріміз барлығы 19 медальға қол жеткізді. Оның бесеуі – алтын, алтауы – күміс, сегізі – қола. Айта кетейік, бүгін ел қоржынына биатлоншыларымыздан Ян Савицкий (12,5 шақырым) күміс, Галина Вишневская (10 шақырым) алтын, параллельді могул жарысында Юлия Галышева алтын, фристайлшы Дмитрий Рейхерд жұптық могул жарысында қола, шаңғы эстафетасында ерлеріміз күміс, шаңғымен трамплиннен секіру жарысында Марат Жаппаров қола медаль салды.