Кахабер Цхададзе: Бұл жолы «Астананы» жеңеміз деп ойлаймын

«Қайрат» футбол клубының бас жаттықтырушысы Кахабер Цхададзе Қазақстан Суперкубогы үшін «Астанамен» өтетін матч жайлы ой бөлісті. «Міне, жаңа маусым да басталайын деп қалды. Бұл жыл да әдеттегідей тартысты өтеді деп сенемін. Ал бүгінгі жаттығуға келер болсақ, ауа райына байланысты жоспарымызды өзгертуге тура келді. Сол үшін жаттығу жұмыстары базамызда өтеді», – деді Цхададзе. Қазақстан Суперкубогының соңғы екі ойыны дәл осы командалар арасында өткен болатын. Екеуінде де жеңімпаз команда пенальти сериясы арқылы анықталған. «Пенальти сериясына емес негізгі 90 минутқа көңіл бөлеміз. Ертең алаңға шығатын негізгі құрамды да жоспарлап қойдым», – деді ол. «Астананың» оқу-жаттығу жиындарында өткен жолдастық кездесулерінің біріне Кахабер Цхадедзенің барып көргені хабарланған. Елордалықтардың ойын мәнерінде қандай өзгерістер болған екен? «Олардың өзіндік философиясы бар. Команданың ойыны айтарлықтай өзгерген деп айта алмаймын. Бірақ оларға жаңадан Иван Маевский мен Аздрен Лулаку келді. Аздреннің ойыны ұнады. Айып алаңында барын салып ойнайды екен. Сондай-ақ, жас талант Дидар Жалмұқанды ерекше атауға болады. «Астана» қайта күшейе түскендей әсер қалдырды», – деді «Қайрат» жаттықтырушысы. Естеріңізде болса, қос команданың арасында өткен ел Кубогының финалында тоқтаусыз қар жауып, «Қайрат» өз ойынын көрсете алмаған. Алматыға міне, тағы да қар жауды. «Ауа райы бәріне бірдей. Астаналықтармен өткен соңғы ойында ауа райы кері әсерін тигізгені анық. Бірақ бұл жолы сәттілік біздің жақта болып, жанкүйерлерімізді қуантамыз деген үміттемін. «Астананы» қас дұшпанымыз деп есептемеймін. Біз тек алаңда ғана бір-бірімізге қарсыласпыз», – деді бас бапкер. Алматылықтардың сапын алдағы уақытта тағы бір шабуылшы толықтыруы мүмкін. «Қыста лайықты футболшы табу қиын. Арнайы топ осы жұмыстармен айналысып жатыр. Командаға тағы бір жоғары деңгейлі шабуылшы қажет. Ал Бауыржан Тұрысбекке келер болсақ, алаңдағы рөлін ауыстырдық. Қазір шабуыл шебінде ойнайды. Деңгейіне көңіліміз толады. Бізде бірінші немесе екінші құрам деп бөлінбейді. Әр ойыншымыз біз үшін маңызды. Кім дайын сол алаңға шығады», – деді ол. Айта кетейік, «Қайрат» пен «Астана» арасындағы матч 4 наурыз күні Алматы қаласындағы Орталық стадионда сағат 15:00-де өтеді.