Шаппай бер шабыткер

Елімізде ХХХІІ республи­ка­лық жас орындаушылар байқауы мәреге жетті. Бұл жолы да П.Чай­ковский атындағы Алматы му­зыкалық колледжінің студенттері жеңісті орындардан табы­лып, өз оқу орындарының кәсіби дең­гейін көрсетті. Білім және ғылым министрлігі ұйымдастырған байқауда ал­ды­мен пианистер мен ішекті аспапта ойнайтындар Астана қала­сында жарысқа түсіп, осы кол­ледждің 4-курс студенті Антон Маркелов бас жүлдені жеңіп ал­ған болатын. – Скрипкашылар арасында жүрген байқау барынша салмақ­ты болды. Мен үшін Антонның жеңісі заңдылық та сияқты. Өйткені, ол белсенді шығарма­шы­лық иесі ғана емес, педагогпен жеңіл үндесе алатын му­зы­кант, – дейді ұстазы Нұрлан Сағымбаев. Осылайша бас жүл­деге лайық атанған Антон Маркелов байқауда Фауст опера­ла­рынан, Мендельсон шығармала­рынан үзінділер орындап, Құр­ман­ғазының Е.Үсенов өңдеген «Төремұратын» өз деңгейінде паш етті. Аталмыш колледждің альт­шілері де өз шеберліктерімен та­нылғанын айта кеткен жөн десек, байқау дипломанттары қата­рында Жанна-Мари Жа­қып­бе­ко­ва, контрабасшылар – Нияз Үле­кешов пен Бекжан Исмаилов бар.  Бар болғаны 2 жыл ға­на контрабаспен айналысып жүр­ген Бекжан үшін респуб­ли­калық бай­қаудың дипломанты атану – айтарлықтай табыс. Ал өзі өлең жазып, көп ізденетін Нияздан да ұстаздары үлкен үміт күтеді. Сондай-ақ, әр кезеңдегі ком­по­зиторлардың шығармаларын нақышына келтіре орындап жүр­ген  колледж шәкірттері, форте­пи­а­ношылар – Шахноза Матназарова мен Нәзігүл Арыстамбе­ко­ва­лар­дың да аты осы байқауда ерекше аталды. Классикалық музыка сала­сы­ның келешегін айқындайтын жас орындаушылардың республи­ка­лық байқауы жаңа есімдерді жаң­ғыртып қана қоймай, бүкіл сән-салтанатымен, ауқымды­лы­ғы­мен де есте қалмақ. Айнаш ЕСАЛИ. Алматы.