Жетімдері мен жесірлерін жылатпаған ел емес пе едік?

Қазіргі таңда Қазақстанда 46 мыңнан астам бала түрлі себептермен ата-ананың қамқорлы­ғын­сыз қалып отыр. Соңғы он жыл­дан бері жетім балалар шетелдіктерге асырап алуға беріліп жатыр. Ресми мәліметтерге қарағанда, алты мыңнан астам бала шет ел асқан, оның 5308-і АҚШ азамат­тарының үлесіне тиіпті. Олардың көпшілігінің бүгінгі тағдыры не болып жатқаны белгісіз. Өкінішке қарай, қатыгез, қа­ныпезер ата-анасымақтар көбею­де. Әйтпесе ең қымбаттысы, көзі­нің қарасы, өмірінің жалғасы, бауыр еті – баласын перзент­ханаға немесе қоқыс жәшігіне тірідей қалдыруға қалай жүрегі дауалайды?! Торғай екеш торғай да балапанын қорғайды. Сонда кім болғанымыз?! Тарихта талай тауқыметті өт­кер­ген біздің халқымыздың ба­сын­да мұндай сұмдық бұрын-соң­ды болып көрмеген. Егер қа­йық­тағы екеудің біреуі өлу керек болса, сөз жоқ, кәрі кетіп, жас қал­ған. Шыңғыс Айтматовтың «Теңіз жағалай жүгірген тарғыл төбет» атты хикаятында бір үйлі жан өзін-өзі теңізге лақтырып, қайық­та қаршадай ғана бала қалып, сол бала бүтін бір ұрпақтың жалғасы болып еді ғой. Алайда, бүгінгі таңда керісінше, тастанды сәбилер, шет елдерге сатылған балалар санының күн­нен күнге арта түсуі, қыз­дары­мыздың жеңіл жолға салынуы, «көкек әкелердің» көбеюі барлы­ғымызды да толғандыратын өзек­ті мәселеге айналып отыр. Бола­шақ ұрпақты осынау қасіретті індеттен қалай сақтап қаламыз? Қазақстан шет елге бала беру жағынан әлемде үшінші орын ала­ды екен. Бұл тоналғандық емей немене? Осы ретте Әлихан Бөкей­ханның: «Ұлым деп ой­лай­тын ел болмаса, елім деп еңі­рей­тін ұл қайдан болады?», деген сөзі еріксіз еске түседі. Ежелден жетімін жылатпаған ел емес пе едік? Ендеше, бүгінгі таңда жетімдерге сұ­рауы жоқтай, қатыгез қабақ таны­туы­мыздың сыры неде? Қазақстандағы байлықтың көп­тігі сонша, Менделеев кестесіндегі элементтердің бәрі бар екенін әлемге паш етіп жатырмыз. Әрине, бұл – бәрімізге мақтаныш. Солай бола тұра, жетімдерге келгенде қаражат жетпейді деп аузы­мызды қу шөп­пен сүртеміз. Осы тұста Махамбеттің: «Жетімдерге жем бердім, Жесірлерге жер бердім», деп қайырым­ды­лық­қа, мейірімділікке шақырғанын естен шығармайық. Екіншіден, Үкі­мет қамқорлыққа зәру балалар мен шетелдіктер асырап алған сәбилердің жағдайын реттейтін, жетім балаларды тұрғын үймен, жұмыс орнымен қамтамасыз етуді қарастыратын заң жобасын да­йын­даса, сауапты бір іс атқарғаны болып шығар еді. Розақұл ХАЛМҰРАДОВ, Мәжіліс депутаты.