Қыр астындағы қарбалас

Шуақты көктем солтүстік өңірге де жетіп, қырдағы қарбалас көбейе түскен. Диқандар дала жұмыстарын сапалы атқаруға тас-түйін кіріскен. Күзгі жауын-шашынның, қыстағы қардың молдығы көңілге қуаныш үмітін ұялатқанымен, тұқымды қашан жерге сіңіргенше тыным табар емес. Олар жылдағы дәстүр бойынша жауапты науқан алдында келелі міндеттерді анықтау, шешу жолдарын белгілеуге арналған жиынға қатысуға да уақыт тапты. Оған аудан әкімдері, ірі агроқұрылым басшылары шақырыл­ға­нын естіп, «е, бәсе» десті. Ауыл шаруа­шылығы министрлігінің жауапты хат­шысы Евгений Аман бастаған басқарма, корпорация жетекшілері келгенін жақ­сылыққа жорыды. Салиқалы басқосу бас­талар алдында Погодин орыс драма театры алдында ауылшаруашылық тех­ник­алары мен Солтүстік Қазақстан ауыл шаруашылығы тәжірибе стансасы ұсын­ған дәнді, майлы және жемазықтық да­қы­лдары көрмесі ұйымдастырылды. Отан­дық автомобильдер мен мәшине жасау кәсіпорындарының өнімдері де көрсетілді. Кеңейтілген кеңесті облыс әкімі Серік Біләлов ашып, Ел­басы Н.Назарбаевтың ха­лыққа арнаған Жол­дау­ында ауыл шаруа­шылығын дамытуға зор мән берілгенін, еңбек өнімділігін, мал шаруа­шы­лығының экспорт­тық әлеуетін арттыру, азық-түліқ қауіпсіздігін қамтамасыз ету басым бағыттар болып қала беретінін атап өтті. «Би­ылғы көктемгі тұқым себу науқанын ойдағы­дай атқаруға Үкімет та­ра­пынан жан-жақты қол­дау көрсетіліп отыр. Арзандатылған бағамен дизель майын жеткізу, несиелеу, өсімдік шаруашылығын субсидиялау ша­ралары шешім тапты. Қалған жұмыс­тар­дың ойдағыдай атқарылуы өзімізге бай­ла­нысты», деді Серік Сұлтанғазыұлы. Агроөнеркәсіп кешенін дамыту және көктемгі дала жұмыстарын өткізу мәселе­леріне арналған кеңейтілген жиында облыс әкімінің орынбасары Айдарбек Сапаров баяндама жасап, алдағы міндеттер жайлы айтып берді. Биылғы егістік алқап 4 миллион 532 мың гектарды құрап отыр. Оның ішінде дәнді дақылдар – 3,9 миллион гектар. Бұдан тысқары майлы, жем­азық, дәнді-бұршақ дақылдарын көбейту көзделген. 2 миллион алқапқа қар тоқ­татылып, 3,3 миллион гектар жерге ылғал үнемдеу технологиясы қолданылған. Қажетті 546 мың тонна тұқым себу кон­дициясына жеткізілген. Облыстың агро­өнеркәсіп кешенін қолдауға 6,6 миллиард теңге бөлінсе, 4,8 миллиарды – өсімдік шаруашылығына тиесілі. Бір миллиард теңгеге 131 техника алынып, көктемгі дала жұмыстарының 70-75 пайызы осы за­манғы кешендермен атқарылатын бола­ды. Соңғы 4 жылда сыйымдылығы 283 мың тонналық 14 элеватор іске қосылды. Тағы 4 астық қабылдау пункті салынуда. Кеңесте сөз алған «Азық-түлік келі­сім-шарт корпорациясы» АҚ-тың бас­қарма төрағасы Бейбітхан Қаб­дыр­ах­манов ауыл шаруашылығы саласын не­сиелеу талапқа сай жүргізіліп жатқа­нын, биыл 39 миллиард теңге бөлін­генін, Қызылжар өңірінен 4 миллиард теңгеге ұсыныс түскенін, бұл әлі аздық ететінін жеткізді. Ол бір тонна астықтың сатып алу бағасы 25 мың теңгеге белгіленгенін, түпкі бағаны рынок анықтайтынын мәлімдеді. «А.Бараев атындағы астық шаруашылығы ғылыми-өндірістік орта­лы­ғы» РМК директоры Жексенбай Қас­қырбаев, «Қазгидромет» РМК агрометеорология департаментінің директоры Сәкен Байшоланов, тағы басқалары жаздағы ауа райына қатысты мәліметтер беріп, болжамдар білдірді. Диқандар алдында Ауыл ша­руа­шылығы министрлігінің жауапты хат­шысы Е.Аман сөйлеп, солтүстік­қазақ­стан­дықтардың егін себу науқанына тың­ғылықты дайындалғанын, ендігі міндет көктемнің әр күнін тиімді пайда­ланып, үлкен жауапкершілікпен атқаруға тірелетінін жеткізіп, сәттілік тіледі. Өмір ЕСҚАЛИ. Солтүстік Қазақстан облысы.