Еуроодақтың еліміздегі өкілдігінің жетекшісі Траян Христеаның айтуынша, Еуроодақ Қазақстанда азаматтық қоғамның дамуына жан-жақты ықпал етіп келеді.
– Қазақстан орташа табыс деңгейі бар елдердің қатарына қосылғандықтан, 2014 жылдан бастап қаржыландыру шаралары тоқтатылған болатын. Алайда, Орталық Азия мемлекеттеріне бағытталған 2014-2020 жылдарға арналған аймақтық бағдарламаның аясында ынтымақтастық пен қаржы бөлу жұмыстары жалғаса береді. Мәселен, ұйымның Қазақстандағы өкілдігі «жасыл» экономикаға арналған бірқатар жобаларды іске асыру үшін 7,1 миллион еуро бөлді, – деді Т.Христеа.
Осы шара барысында Еуроодақтың жергілікті өкілдігі қаржыландыратын 9 жоба таныстырылды. Аталған 9 жоба Қазақстандағы сот реформасын қолдау бағдарламасы, Демократия мен адам құқықтары саласындағы еуропалық құрал, Үкіметтік емес ұйымдарды және жергілікті мемлекеттік басқаруды дамыту бағдарламасы сынды үш тақырыпты қамтиды. Осы жобалар үшін ұйым тарапынан барлығы 3,15 миллион еуро көлемінде қаражат қаралыпты.
Траян Христеаның айтуынша, аталған жобалар халықтың әл-ауқатын жақсартуға, азаматтық қоғамның ұлттық және жергілікті деңгейде саяси үнқатысуларға белсене атсалысуына ықпал етуі тиіс. Мұның барлығы «100 нақты қадам» аясындағы институттық реформаларды жүзеге асыруға сай келеді.
Жалпы, 1991 жылдан бергі аралықта Еуропалық одақ тарапынан біздің еліміздегі 350 жоба үшін 180 миллион еуро көлемінде қаржы бөлініпті.
Арнұр Асқар,
«Егемен Қазақстан»