Құжат бойынша жұмыс тобының жетекшісі, Мәжіліс депутаты Қанат Мусин комитет мүшелері мен заң жобасын жасаушылар алдында баяндама жасады.
«Жол жүрісі туралы» заң барлық қазақстандықтарға қатысты екені және оны қарапайым халықтың өте жиі қолданатыны ескеріліп, заң жобасы бойынша жұмыс екі жыл бойы мұқият және жан-жақты жүргізілді. Жұмыс тобының 33 отырысы өтіп, жүзден астам түзету қаралған. Нәтижесінде, 55 түзетуден тұратын салыстырмалы кесте дайындалды», – деді Қ.Мусин.
Жұмыс тобы шеңберінде көптеген түзетулер талқыланған болатын. Ендеше, қалың бұқара үшін оң әсері бар түзетулердің бірнешеуіне тоқталсақ. Мәселен, бағдаршам алдындағы «тоқтау сызығын» бұзғаны үшін айыппұл мөлшері 5 АЕК-тен 3 АЕК-ке дейін төмендетілген; мерзімі өтіп кеткен жүргізуші куәлігін ауыстырған кезде жол жүру ережесін білуге емтихан тапсыру қажет емес болды; дереу келу, өзін таныстыру, куәлігін ұсыну, радардың (қолданған жағдайда) деректерін айту, тоқтатудың себебін түсіндіру сияқты көлікті тоқтатқаннан кейін полицейдің міндеттері заң жүзінде бекітіледі.
Жұмыс тобы заң жобасына ұсынылған барлық түзетулерді қарай келе, оларды бас комитеттің отырысында талқылауды ұсынады. Айта кетейік, комитет отырысына мемлекеттік органдардың, парламенттік емес саяси партиялардың, үкіметтік емес ұйымдардың өкілдері, қоғам қайраткерлері және сарапшылар қатысты.
Нұрлыбек Досыбай,
«Егемен Қазақстан»