Тақырыпқа қатысты арнайы баяндаманы Ш.Шаяхметов атындағы тілдерді дамытудың үйлестіру-әдістемелік орталығының директоры Ербол Тілешов жасады. Ол Тілдерді дамыту және қоғамдық-саяси жұмыс комитетінің мемлекеттік тапсырысымен өткен жылы іске қосылған «Тіл әлемі» порталы мен «Emle.kz», «Termincom.kz», «Atau.kz» сынды сайттардың бүгінгі қызметі мен техникалық жетілдіру жайы, қоғамға тигізіп жатқан пайдасы туралы айтып, әлеуметтің пікірін әңгімеге арқау етті.
Сондай-ақ, талқылау барысында сөз алғандар латын әліпбиіне көшу жайын қозғағанда, мәселені асыра саясиландырудың қажет еместігін түсінуге шақырды. Сонымен қатар, әліпби ауыстыру әрекетінде алыс-жақын көрші елдердің тәжірибесі де мұқият зерттеліп, зерделену қажеттігі атап көрсетілді.
«Бәріне уақыт төреші. Өзбекстан мен Түрікменстан, Әзербайжан елдерінің жүріп өткен жолын саралау біз үшін өте маңызды. Мәселен, латынға көшкен өзбек ағайындар 24 жыл ішінде неліктен 3 рет реформа жүргізуге мәжбүр болды. Осындай жағдайлар бізді терең ойлануға жетелейді», – деді С.Абдрахманов.
Баяндамашы таныстырған сайттар оқырмандар игілігіне айналып отырғанын атап өткен депутат Анар Жайылғанова баяндамашы таныстырған жобалар, әсіресе, шетелдегі қазақтар үшін қолайлы болатынын тілге тиек етті. «Әсіресе, қазақ тілінің құрылымы мен құндылығын танып, білуде шетел қазақтары «Emle.kz» сайтын кеңінен пайдаланып отыр екен. Мұндай жобалар Елбасының күні кеше ғана жариялаған мақаласын тұщынып оқу үшін де орасан зор мүмкіндіктер беруде», – деді ол.
Сонымен қатар, әліпби ауыстыру мәселесінде ертеректе қолданыста болған латын таңбасына негізделіп жасалған әліпбилеріміз де назардан тыс қалмаса деген тілектер айтылды. Атап айтқанда, депутат Шаймардан Нұрымов қолданыста болмаса да, осы кезге дейін құрастырылған әліпбилердің бір-екі таңбасынан өзгесі мәселені еш күрделендірмейтіндігіне тоқталды.
Отырыс соңына қарай қатысушылар ұсыныс, пікірлерін білдіре келіп, Мемлекет басшысы атап көрсеткен латын әліпбиіне көшуді толық қолдайтынын атап өтті. Игілігі мол мұндай бастамаға қоғамды жаппай жұмылдырып, түрлі ұлт пен ұлыстың өкілдерін ұтымды іске ұйытуда Қазақстан халқы Ассамблеясының бағыт-бағдарлары нақтыланды.
Нұрлыбек ДОСЫБАЙ,
«Егемен Қазақстан»