Бұл кәдімгі өзіміз ішіндегі суын ішіп, лақтырып тастай беретін пластик құтылардың қақпағы. Күнделікті өмірде қолданатын заттардың барлығы да қажетті, қалдықтарды тастауға болмайды. Олардың бәрінің де өз бағасы бар дейді еріктілер. Акция барысында оқушылардың жинаған пластик қақпақтарының салмағы 6 күнде 38 килоға жетіп, саны 15 мың 780 болыпты.
Қайырымдылық шарасының мақсаты – ауыр науқасқа шалдыққан баланың жеке есеп шотына ақша аудару. Ұраны – «Қақпақ жинай берсек – ауру балалар саны азаяды!». Бірінші болып Павлодардағы №17, №24 мектептердің шәкірттері мен ата-аналар қауымы қолдап, белсенділік танытты. Жиналған қақпақтар қайта өңдеуге жіберіледі. Одан түскен ақша бір күндік болса да науқас баланың еміне жұмсалды.
– Бұл шара біздің оқушыларымызды мейірімділікке тәрбиелейді. Екіншіден, еріктілер айтқандай, қалдықтардың да, қақпақтардың да күнделікті тұрмыста қажеттігін біліп өседі. Қалдықтан дүние жасап шығаратын шетелдердегі тиімді тәжірибе, осылай біздің өмірімізге де енуде, – дейді қалалық оқу бөлімінің қызметкері Балжан Әділханова.
Айтса айтқандай-ақ, мейірімділіктің үлкен-кішісі жоқ. Жан жылуы деген осы. Оқушылар мектепте мониторинг өткізіп, күн сайын ақпараттық қабырғаға қанша қақпақ жиналғаны жөнінде хабарлап отырады. Осы шара барысында қақпақ жинаушы белсенді сыныптар аталып өтеді. Ал ең белсенді оқушылар еріктілер тарапынан марапатталады.
Фарида БЫҚАЙ,
«Егемен Қазақстан»
Павлодар