Ардагерлерін ардақтады

Кеше Бас Прокуратурада Жеңіс және Отан қорғаушылар күніне арналған салтанатты жиналыс болып өтті. Ұлы Отан соғысында шайқасқан және тылда жеңісті жақындатуға көмектескен прокуратура органдарының 19 ардагері мерекелік іс-шараның құрметті қонақтары ретінде қатысты. Еліміздің Бас Прокуроры Асхат Дауылбаев ардагерлерді Же­ңіс­тің 66 жылдығымен құттық­тап, май­дан­дағы және тылдағы ерліктері үшін оларға терең алғыс сезімдерін жеткізді. Барлық ұр­пақтар үшін 9 мамыр біздің хал­қымыздың Отанға деген шексіз сүйіспен­шілі­гінің, қаһармандығы мен ерлігінің мәңгілік белгісі ретінде қалатын ерекше жарқын мереке, деді ол. Прокуратура қызметкерлерінің жартысына жуығы сұрапыл со­ғыс­қа аттанса, олардың көпшілігі майдан даласынан оралмады. Көп­теген ардагерлер тыл еңбек­керлері ретінде соғыс кезінде аса қажетті жұмыстарды істеп, аянбай тер төкті. Терең құрмет және ризашы­лық белгісі ретінде Бас Прокурор соғыс ардагерлері мен тыл еңбек­керлеріне ведомстволық наградалар мен құнды сыйлықтар тапсыр­ды. Ардагерлер өздерінің жас әріп­тестерін құттықтап, про­курор­лардың жас буынына Отан үшін от кешкендерді есте сақтап, соларға лайықты қызмет істеуді, проку­рор­лық кәсіптің жақсы дәс­түр­лерін сақтауды және дамы­туды тіледі. Отан қорғаушылар күніне орай Қазақстан Республикасы Пре­зи­ден­тінің Жарлығымен Бас Прокурор Асхат Дауылбаевқа 2-сыныпты мем­­лекеттік әділет кеңесшісі сы­ныптық шені және Бас Проку­рордың орын­басары Берік Асы­ловқа 3-сыныпты мемлекеттік әді­лет кеңесшісі сынып­тық шені тапсырылды. Мінсіз қызмет еткендері және заңдылық пен құқық тәртібін қам­тамасыз етуге үлес қос­қан­дары үшін Бас Прокурор прокуратура орган­дарының 82 қызмет­керіне ведом­стволық наградалар табыс етті. Ардагерлердің Астанадағы мере­келік бағдарламасында «Отан қор­ғау­шылар» монументіне гүл шоқ­тарын қою рәсімі, Бейбітшілік және келісім сарайын­дағы мерекелік концертке қатысу және елор­даның көрік­ті жерлерін аралау жоспар­ланған. «Егемен-ақпарат».