Қазақстандық ардагерлермен кездесті

Ресейдегі Қазақстан елшілігінде Жеңіс күні қарсаңында дәстүрлі қабылдау өткізіліп, елші Зауытбек Тұрысбеков Мәскеуде тұратын қазақстандық ардагерлермен, Ұлы Отан соғысына қатысушылармен кездесті. Елші ардагерлерді мерейлі ме­рекемен құттықтап, халықтың қаһармандық ерлігімен, майдангер буынның теңдессіз еңбегімен қол жеткен Ұлы Жеңістің тарихи тағылымына тоқталып, осынау ортақ Жеңіске қазақстандықтар қосқан қомақты үлес жайында кеңінен әңгімеледі. «Аға ұрпақ­тың жауынгерлік ерлігі мен ай­ны­мас отаншылдығы бүгінгі таңдағы өскелең ұрпақтың Отан­ға деген сүйіспеншілігіне ұла­су­да. Сіздер Ресейде тұрсаңыздар да, тәуелсіз Қазақстанда болып жатқан түбегейлі өзгерістерді, еліміздің өркениетті өркендеу өрісін көріп, біліп отырсыздар, Елшілік жанындағы қазақ­стан­дық ардагерлер кеңесінің жұмы­сына белсене қатысып жүр­сіз­дер», деді ол. Қабылдауға қатысып, сөз сөйлеген 96 жастағы Социалистік Еңбек Ері Александр Ежевский, Ұлы Отан соғысына қа­тыс­қан, бүгінде жасы 89-ға жетіп отырған Әкімжан Мұхамед­жанов, сондай-ақ Валентин Месяц, Асқар Тұралин, Валерий Темірбаев, Гүлжәмила Нұрбекова, Қайдар Құмарбеков және басқа да ардагерлер Қазақстан мен Ресей арасындағы сан-салалы жемісті қарым-қатынастардың бү­гін­гі таңдағы даму барысы ту­ралы сүйсіне айтып, ардагерлерге ықыласпен көңіл бөліп отыр­ғаны үшін Қазақстан Президенті Н.Ә.Назарбаевқа, елшілікке ризашылықтарын білдірді. Қабылдау соңында ардагерлерге ескерткіш сыйлықтар тап­сырылды. Серікқали БАЙМЕНШЕ. Мәскеу.