Құрылыс саласындағы келеңсіздіктер осындай сауал туындатады
Мемлекеттің қаржысын, қарапайым азаматтардың несібесін жымқыратын жемқорлар қашан құриды? Әлсін-әлі жаңбырдан кейінгі саңырауқұлақтай қаптайтын сыбайластарды баудай орып түсіретін науқандық шаралардың да нәтижесі көрінбейді. Бірі ұсталса, екіншісі бас көтереді. Тойымсыздық деген жаппай бойды билеп, сананы тұмшалап алды. Қалайда әйтеуір жеу керек. Ар да жоқ, ұят та жоқ, билік қолда болса түйені түгімен жұтуға бар. Бұған қазір дәлел де, шатылып жатқандардың саны да көп. Бірақ ешқайсысы тояр емес, содан жеуін де қояр емес.
Жемқорлардың сыбайласып елдің ақшасын жымқыра беретіндігі олар заңдарымыздың солқылдақ тұстарын өз мүдделеріне сай шебер пайдалана алады. Соның ең жеңіл де қарапайым жолы салынып жатқан құрылыс нысандарын қолдан қымбаттату болып отыр. Ол үшін құрылыс нысанының мерзімін жобалау-сметалық құжаттардағы жіберілген кемшіліктерге байланысты деп сәл ұзартса жетіп жатыр. Бұл сенімді тетік алтын шүмекті ашқандай шенеуніктердің түбі жоқ қалталарына қып-қызыл ақшаның есепсіз құйылуына жол береді. Сосын «алтын көрсе періште жолдан таяды» дегендей, ол шүмекті тарс бекітіп жауып тастауға ешкімнің «дәті» бара қоймайды. Қайда шашылмай жатқан Үкіметтің ақшасы, жетеді ғой дейді сыбайластар бірін-бірі сабырға шақырып.
Мәселен, Бас прокуратура бюджет қаражатын пайдалану кезінде құрылыс нысандарының құнын қымбаттату себептеріне талдау жасап көрсе 2009 жылы республикалық бюджеттен қаржыландырылатын 35 жоба бойынша құрылыс құны 20 млрд. теңгеге қамбаттапты. Ал дәл осындай жағдай 2010 жылы да орын алады. Сонан оның неліктен қымбаттағаны зерттелінеді. Сөйтсе жобалау-сметалық құжаттамалар дұрыс дайындалмайды екен. Соның салдарынан Астана қаласындағы онкологиялық диспансердің жобасы екі рет түзетілген. Нәтижесінде оның сметалық құны 2,8 млрд.-тан 7,4 млрд. теңгеге бір-ақ қарғып, 2,5 есеге артқан. Сол секілді Алматы облысында шаңғы және биатлон стадионын салу орны тапсырыс берушінің нұсқауы бойынша басқа жерге ауыстырылған. Неге ауыстырылған дейсіз ғой? Себебі, инженерлік-геологиялық жағдайлардың өзгеруіне сәйкес сметаға қосымша шығындар қосылады. Ал ол өз кезегінде нысанның сметалық құнын 9,5 млрд.-тан 17,8 млрд. теңгеге дейін көбейтті. Мұндай қулық амалдың не үшін қажет болғанын жұрт кейін түсінді.
Жалпы, біздің елімізде ақша жеудің амалы да көп. Мәселен, Алматы облысы Алакөл ауданында «СтройТэК» ЖШС балабақша құрылысын салуы тиіс еді. Алайда ол өз міндетін орындамауына байланысты, нысанның құрылысын аяқтау басқа мердігерге тапсырылады. Бұл амал, құрылыс жобасының 100 млн. теңгеден астам сомаға қымбаттауына әкеп соқтырады. Енді аталған қаражат мемлекетке келтірілген зардап ретінде «СтройТэК» ЖШС-інен өндіріп алынған шығар деп ойлайсыз ғой. Жоқ. Сыбайласқандар ондай қомақты қаржыны оңайлықпен қолдан шығара ма, аудандық әкімдік оны өндірмек түгілі, орындалмаған жұмыс түрлеріне деп қосымша қаражат есебінде аударып жіберген. Сөйтіп елдің есіл байлығының бүйірі бүріскен үстіне бүрісіп барады.
Сол сияқты құрылыс жүргізуде ақша жеудің қарапайым амалы оның салыну уақытын қасақана ұзарту болып табылады. Мысалы, Алматы қаласындағы перинаталдық орталықтың құрылыс мерзімін мердігер созбалаңға салуына байланысты, оның жобалау-сметалық құжаттамасы 2008 жылдан бері үш рет қайта есептелген. Соңғы қайта есептеуден кейін нысанның құны қосымша 1,6 млрд. теңгеге өсіп шыға келді. Міне, қалтаға қосымша түсетін елдің есіл қаржысы деген осы. Оны аз десеңіз Өскемен қаласындағы «Восток» стадионын қайта жаңғырту мерзімі үш рет ұзартылған. Осының салдарынан, үш жылдың ішінде келісім-шарт сомасы 188 млн. теңгеден 427 млн. теңгеге дейін өскен. Түк бітірмей-ақ, ақша жасаудың жолы осы. Мұндай жанды ауыртатын оқиғалар бірді-екілі болса кемшілік тез түзетілер деп көнесіз ғой, бірақ құзырлы органның анықтауы бойынша ондай деректер республиканың басқа да өңірлерінде байқалып жатуы алаңдатпай қоймайды.
Жергілікті бюджет есебінен қаржыландырылатын нысандардың қымбаттауына негізсіз жүргізілген мемлекеттік сараптау, жобалау шешімдерінің бірнеше мәрте өзгертілуі, әкімшіліктің жобалауға түсетін бюджеттік бағдарламаларды сапасыз әзірлеуі себеп болып отыр. Соның ішінде қамбатшылыққа кінәлі болғандарды, яғни мемлекеттік сараптау органы мен жауапсыз үй салушыларды және жобалау ұйымдарын тиісті мемлекеттік мекемелер арқылы материалдық жауапкершілікке тарту немесе сол келеңсіздіктердің алдын алу жұмыстары жүргізілмейді. Оның неге жүргізілмейтіні тағы түсінікті. Мәселен, Алматы облысы, Қарасай ауданында 300 орындық мектептің құрылысы жоба бойынша 597,2 млн. теңгені құраған екен. Кейін орындау жұмыстары жүргізіле бастағанда жер асты суының тереңдігі жобада көрсетілгендей бес метр емес, екі метр деп анықталған. Соның салдарынан жобалау-сметалық құжаттар дұрыс дайындалмаған деген желеумен қаржыландырылу көлемі тағы да қосымша 24,4 млн. теңгеге ұлғайып шыға келеді. Бірақ мемлекеттің ақшасы осыншама шығындалып жатса да Қарасай ауданының әкімдігі аяқ астынан қосымша «қыруар қаржы түсірген» жобалаушыны жазаға тартуды ұмытып кетіпті.
Мемлекеттік органдар «Мемлекеттік сатып алу туралы» Заң талаптарын бұзғандықтан құрылыс мерзімі негізсіз ұзартылып, соның салдарынан оның құны да еселеп қымбаттай түседі. Аталған заңның 39-бабында жабдықтаушы үшін негізгі таңдау болып табылатын және сапаның бұлжымас жағдайында мемлекеттік сатып алу туралы бекітілген шартқа енгізілетін өзгерістердің толыққанды негізі көрсетілген. Алайда, тапсырыс беруші аталған бап талабын бұза отырып, мемлекеттік сатып алу шартының міндетті орындау мерзімін ұзарту бөлігіне заңмен көзделмеген өзгерістерді енгізеді. Бұл, әлбетте, құрылыстың қымбаттауына әкеп соқтырады. Мұндай жағдайдың кезінде мүмкін болған сыры республикалық және жергілікті бюджетті пайдалану ережесінің 92 тармағына сәйкес аймақтық қазынашылық бөлімшелерінде тіркелген шартқа атқарылатын жұмыстың мерзімі өзгерген кезде қосымша келісімдерді тіркеу көзделген еді. Соны әркім өзінше пайдалана білді. Бірақ бұл құжат қазіргі күні күшін жоғалтты. Алайда, мемлекеттік сатып алу шарттарына заңмен көзделмеген негізде өзгерістерді енгізуге сыбайлас жемқорлардың әлі де заңдардың осал тұсын сәтті пайдалана білуі мүмкіндік тудыра бермек.
Елді жайлаған осындай келеңсіз көріністерден кейін жемқорлықтың жұлыны үзіледі деген үмітіміз алыстай түсетін секілді. Өйткені жең ұшынан жалғасқан жемқорлардың арамызда шайқала басып жүргені осы жүрген. Абай атамыз айтқандай, егер қолда закон қуаты болса ең әуелі сол ұрты мен мұрты майланып, миығынан мырс-мырс күліп жүрген нағыз арамзалардың аяғын аспаннан келтіріп, әшкерелеуге болар еді. Бірақ сыбайлас жемқорлықты әшкерелегенде заң да солқылдақтық танытады. Оған себеп құрылыс нысандарының сметалық құндарын талдағанда тағы да қайран қаражаттың қолды болғаны байқалды. Мысалы, 1200 орынға арналған бір үлгідегі 26 мектеп құрылысының құны 1,2 млрд. теңгеден 2,8 млрд. теңгеге дейін белгіленіп, айырмашылығы 2,5 есені құраған. Және мұндай жағдай, айлық есептік көрсеткіш, үстеме шығыстардың, пайдаланылатын құрылыс материалдарының біркелкі болуына қарамастан орын алып отырған. Сөйтіп, осындай заң бұзушылықтарды жіберген «Мемлекеттік сараптама» республикалық мемлекеттік кәсіпорын филиалдарының 7 директоры мен директор орынбасарлары, Шу ауданының әкімі және осы ауданның құрылыс бөлімінің бастығын тек қызметтерінен босатумен ғана тоқтаған. Оған қоса Оңтүстік Қазақстан облысында құрылыс саласына жетекшілік ететін 6 жауапты қызметкер де түк болмағандай жұмыс орындарынан өз еркімен босатылыпты да қойыпты. Ал осындай сылап-сипау шараларымен жемқорлық тыйыла қойса жақсы ғой.
Тыйылмайды. Өйткені, жемқорлық жеті басты айдаhардай бір басы кесілсе екінші басы өсіп шығып бір-біріне ауыса береді. Мәселен, Астана қалалық прокуратурасының талдауы көрсеткендей, жемқорлықтың тыйылмауы көптеген жағдайда жемқорлардың жауапкершілікті сезінбеуінен туындайды дейді. Үстіміздегі жылдың бірінші тоқсанында елорда соттарында 19 адамға қатысты сыбайлас жемқорлық санатына жататын 12 қылмыстық іс қаралған. Сонда байқасаңыз, ауыр қылмыс санатына жататын сыбайлас жемқорлық қылмыстардың басым көпшілігін, жоғарыда айтқанымыздай, тек лауазымды қызметкерлер жасаған. Бірақ заң бәріне ортақ дегенімізбен, олардың жетеуі ғана бас бостандығынан айырылса, жетеуі шартты түрде сотталып, ал біреуіне тек жеңіл-желпі айыппұл ғана салынған.
Мұндай ұсақ-түйек жазалармен жемқорлар сазайын тарта ма? Әрине, жоқ. Олар тіпті өздерінің не үшін кінәлі болғанын түйсінбеуі де мүмкін. Сондықтан жанталасып ақталып жатады. Ақталған соң қайтадан үйреншікті әнге басады. Демек, нақты дәлелді сыбайлас жемқорлықпен ұсталған шенеунікті бірден тәубеге түсіру және одан өзгелердің де тәртіп алуы үшін бірден ауыр жазаға тартып, ал оның елге келтірген шығынын толықтай, тіпті екі есе асыра яғни бала-шағасының, тума-туысқандарының иеленіп, пайдаланып отырған бар дүние-мүлкінің түгін қалдырмай тәркілеу арқылы қазынаға дереу қайтару қажет. Міне, сонда ғана кез келген шенеунік жемқорлық жасау түгіл, сыбайласудан ат-тонын ала қашатын болады. Олай істемейінше жемқорлар шыға береді, оларды ұстау мен соттау да жалғаса береді. Тіпті оларды ұстау мен қамау үшін де қыруар қаржы жұмсалатынын тағы ескерген жөн.
Ал сыбайлас жемқорлықтың алдын алу және оған қарсы күрес шаралары Қазақстан тәуелсіздік алғаннан бері жүргізіліп келеді. Ол жұмыстарды атқару үшін тиісті мемлекеттік бағдарламалар қабылданды. Соңғы жылдары сыбайлас жемқорлық деректері артқан сайын оған қарсы күрес жүйелі және кешенді сипат алды. Бұл бағыттағы жұмыстар жемқорларды анықтап, оларға шара қолданумен қатар, сыбайлас жемқорлықтың алдын алуға да негізделеді. Осы мақсатта халықтың қажетті құжаттарды алу жолдары жеңілдетіліп, түрлі лицензиялар мен рұқсаттар саны қысқара түсуде. Мемлекеттік қызметшілердің ешкімге материалдық жағынан тәуелді болмай, сыбайлас жемқорлық әрекеттерге бармай, міндеттерін адал атқаруы үшін жалақысын барынша молынан көбейту кезең-кезеңмен жүзеге асырылуда. Алайда алақол шенеуніктер айылын жияр емес.
Мәселен, елордалық прокуратураның анықтағаны бойынша, Ақмола облысының соттар әкімшісінің Целиноград аумақтық бөлімшесінің аға сот орындаушысы лауазымды тұлға бола тұра, мемлекеттік қызмет пен мемлекеттік басқару мүддесіне мүлде қайшы келетін сыбайлас жемқорлық қылмыс жасауға ниеттеніп, «Сарқырама-2006» ЖШС-нің атына тіркелген Ақмола облысы, Целиноград ауданы, Қаражар елді мекенінде орналасқан жер телімдеріне тыйым салып, оны бағалауға тапсырыс бергендігін айтып жер телімдерін сатқызбау мақсатында және «Сарқырама-2006» ЖШС-нің атқару өндірісін орындаусыз қалдыру үшін оның директорынан 4 000 000 теңге беруін талап еткен. Содан оны пара алу кезінде құқық қорғау органдары ұстаған.
Мұндай мысалдар жетіп, артылады. Әрине, олардың тиісті жазасын алып, сотталып жатқандары да аз емес. Бірақ, адал жұмыс істейтін адамдар еңбегін еш қылып, одан сыбайластықпен ұсталып, түрме төсегінде қайтадан сол адал жандар салығынан шалқайып жатып ішіп, сосын мерзімі біткен соң тума-туысқандарына жиып-беріп кеткен ұрлық дүниесінің рахатын қайыра жалғастырғанынан қоғамға не пайда? Олардың арасында кезінде билікті шектен аса пайдаланып қаржыны жымқырып, одан тұтылып, содан түзелгендей болып айналып кеп, бірақ бәрін қайтадан сыпыра сиырып, қарасын мүлде батырғандары да бар емес пе? Оларды да іздеп тауып, қайтарғанша қаншама қыруар қаржы шығындалады. Одан да жоғарыда айтқанымыздай, сыбайластар жемқорлықпен ұсталды ма, бірден оның айналасындағы арам жолмен жиылған дүниесінің дәмін татқандарына дейін барынан айырылатындай қатаң үкім шығарылсын. Ол үшін заңды тетік жасалуы тиіс. Сонда сыбайлас жемқорлықпен күресудің нәтижесі болмаса, айтыңыз.
Александр ТАСБОЛАТОВ.