Екіжақты кездесулер өткізді

Мемлекет басшысы Нұрсұлтан Назарбаев шет ел инвес­тор­лары кеңесінің 24-ші пленарлық отырысының аясында бір­қатар екіжақты кездесулер өткізді, деп хабарлады Қа­зақ­стан Республикасы Президентінің баспасөз қызметі. Президент Еуропа Қайта құру және даму банкінің (ЕҚДБ) президенті Т.Мировты қабылдады. Тараптар екіжақты ынты­мақ­тастық мәселесін, сондай-ақ ЕҚДБ-нің Астанада өтетін оты­рысының күн тәртібін талқы­лады. * * * Мемлекет басшысы «Эни» корпорациясының бас атқарушы директоры Паоло Скаронимен кез­десу өткізді. Кездесу бары­сын­да инвестициялық ынтымақ­тас­тық және компанияның Қазақ­стандағы жобаларды іске асы­руын қатысты бірқатар мәселелер тал­қыланды. – Президент мырзамен кездесу кезінде біз «Қашағанды» қоса алғанда, өте жақсы прогресс бай­қалатын барлық жобалар бой­ын­ша пікір алмастық. Бұл жоба бой­ынша алғашқы мұнай шамамен 2012 жылғы желтоқсанда, немесе екі-үш айдан кейін алынады деп күтілуде. Біз сондай-ақ «Қарашы­ға­нақ» жобасын талқыладық. Біз­дің компания жобаға алғашқы кез­ден қатысты. Ол өте жақсы дамуда. Газ өңдеуді ұлғайту үшін кен орындарына одан әрі зерттемелер жүргізу күтілуде. Біз «Эни» мен ҚМГ арасындағы ын­тымақтастық туралы келісімнің қазіргі мәртебесін талқыладық. Келісімде мұнай өңдеу, газ өңдеу, сондай-ақ Каспий теңізіндегі құрылыс жобалары тәрізді бірнеше бағыт қарастырылады. Президент бізді барлық бағыт бойынша қолдады. Өз тарапымнан мен Нұр­сұлтан Назарбаевты біздің ынтымақтастығымыздың одан әрі дамуына мүмкіндік беретін пре­зиденттік сайлаудағы табыс­ты жеңісімен құттықтадым. Ке­ңес­тің бүгінгі пленарлық оты­рысында біз Қазақстанды индустриялан­дыру және жаңғырту тақырыбын талқыладық. Соңғы жылдары үл­кен жұмыстар атқарылды, алайда алда әлі де көп істер бар. Бәрі де Қазақстанның дұрыс жолда келе жат­қанын түсінеді және ел бой­ын­ша өте үлкен прогресс байқа­лу­да. Бүгінгі кеңеске қатысқан барл­ық әріптестер Қазақстанды индустрияландыру және жаңғыр­туға қатысуға өздерінің әзір екендіктерін және өз үлестерін қосуға дайын екендіктерін қуаттады, – деді П.Скарони журналистерге арналған брифинг барысында. * * * Нұрсұлтан Назарбаев «ТелиаСонера» компаниясының президенті және бас атқарушы дирек­то­ры Ларс Нибергпен кездесті. Кез­десу кезінде екіжақты ынты­мақ­тастық мәселелері талқыланды. – Біз ұялы байланыстың ор­нын толтыру және мәліметтер беру жылдамдығын одан әрі арт­тыру мәселелерін талқыладық. Біз Қазақстанда 10 жылдан астам уақыт жұмыс істейміз және жақ­сы нәтижелерге жеттік. Біз осын­да қалыптасқан бизнес ортадағы сенімділікті шын мәнінде бастан өткердік. Қазақстанда инвести­ция­лық бағдарламаны жал­ғас­тыру үшін бізде көптеген перспективалар бар деп білемін, – деді Л.Ниберг журналистерге арналған брифинг кезінде. * * * Мемлекет басшысы «Метро Кэш энд Кэрри» компаниясының басқарма төрағасы Франц Мюллерді қабылдады. Тараптар екі­жақ­ты ынтымақтастықтың жай-күйі мен перспективаларын талқылады. – Метро Групп Қазақстанда 2009 жылдан бері жұмыс істейді. Біз елде 5 қойма-дүкен тұрғыз­дық. Бүгін біз оларды ұлғайту жө­ніндегі жоспарымызды, сон­дай-ақ қазақстандық жұмыспен қамту бойынша шетелдік инвестор ретіндегі мүмкіндіктерімізді талқыладық. Елдің дамуы үшін индустрияландыру жөніндегі Пре­зиденттің бастамасы өте ма­ңызды екені шүбәсіз. Қазақстан үшін жергілікті деңгейде ғана емес, халықаралық деңгейде де елдің айтарлықтай бәсекеге қабілетті­лі­гі маңызды болуы тиіс. Сондай-ақ, индустрияландыру барлық үде­рістерді қоса алғанда, инфра­құ­рылымды, білікті жұмыс күшін жақсартуға қатысты болмақ, – деді Ф.Мюллер журналистерге ар­нал­ған брифингте. * * * Президент «Ресей Сбербанкі» ААҚ-тың басқарма төрағасы Герман Грефпен кездесу өткізді. Кездесу барысында инвестициялық ынтымақтастық мәселесі, сон­дай-ақ Шетелдік инвесторлар кеңе­сінің пленарлық отырысы ке­зінде қозғалған мәселелер тал­қыланды.