«Нұржол» жасыл бульварында өтетін III халықаралық «AstanaArtFest-2017» арт-фестивалі нағыз өнер көрмесі деуге лайық. Мұның елорда тұрғындары мен қонақтарының ең сүйікті шараларының бірі болатынына сенімдімін. Бұл байқауға екі жылда әлемнің 10 мемлекетінен 78 мың суретші қатысса, оны тамашалаған көрерменнің саны жарты миллионнан асып кетті», деді басқарма басшысы. Оның сөзінше, фестивальға дүние жүзінен келген қылқалам шеберлерімен қатар, дизайнерлер, архитекторлар, музыканттар мен режиссерлер қатысады. Дайын туындылар 1 маусымнан бастап орнатыла бастайды, ал фестивальдың ашылуы 10 маусымға белгіленген.
Жалпы ЭКСПО-2017 көрмесі барысында 647 мәдени шара өтеді екен. «Мәдени-көпшілік шаралар қалада жаз бойы ұйымдастырылады. Жоспарланған дүниелер түрлі форматта өтпек. Онда концерттер, көрмелер, отбасылық шаралар, театрландырылған және цирк қойылымдары болады. Ал көрменің ашылу және жабылу салтанаттары «Бәйтерек» монументі маңында, қалалық алаңда және Студенттік саябақта орнатылатын үлкен LED-дисплейлер арқылы тікелей эфирде трансляцияланады», деді Б.Мажағұлов.
Елордада өтетін, жарты әлем көз тіккен үш айлық жиын аясында Қазақстанда алғаш рет КВН жазғы кубогы өтеді. Үлкен Александр Масляковтың қатысуымен бақ сынасатын жайдарманшылар қатарынан соңғы жылдардағы жоғары лига чемпиондарын да көреміз. Олар – «Азия Микс», «Камызяк», «Пятигорск» командалары. Сондай-ақ, сахнаға «Казахи» КВН құрама командасы да шықпақ. Болат Мажағұловтың айтуынша, 1 шілдеде өтетін КВН жазғы кубогы 300 млн көрермені бар «Первый канал» эфирінде трансляцияланады. Шара билетінің құны әзірге келісілмегенімен, осы аптаның соңына дейін нақтыланып, тиісті ақпарат жарияланатын болады.
Баспасөз мәслихаты барысында басқарма басшысы 15 шілде күні Италияның музыкасын сүйіп тыңдайтын тыңдармандар үшін «Сан-Ремо жұлдыздары – Астанада» атты фестиваль өтетіндігін мәлімдеді. Сонымен қатар, маусым айының үшінші жартысында «Бәйтерек» монументі алдында қазіргі заманғы этностық музыканың «TheSpiritofAstana» атты фестивалі ұйымдастырылмақ. Оған Африка, АҚШ, Македония, Грузия, Венгрия, Ресей, Қазақстан, Башқұртстан, Бурятия және Тува елдерінен музыкалық топтар шақырылған. «Астана күнін тойлау қазақстандық эстрада жұлдыздарының концертімен бастау алады. Елордалық концерт залдарында «МузАРТ», «Дервиши» топтарының және Секен Тұрысбек пен Алтынбек Қоразбаевтың жеке кештері ұйымдастырылады», деді Б.Мажағұлов.
Жаздың үш айында қала саябақтарында «Саябақтың жеті кереметі» атты шара өтеді. Қазақ ертегілерінің, танымал мультфильмдер кейіпкерлерінің, диснейлік роботтардың қатысуымен 7 тақырыптық бағдарлама көпшілік назарына ұсынылады. Жалпы алғанда, саябақтарда балалар мен ересектерге арналған мыңнан аса ойын-сауық шарасы ұйымдастырылады. Демалыс күндері қала маңындағы тұрғын алаптарда қазақстандық әртістер мен елордалық шығармашылық ұжымдары «Думанды Сарыарқа» концертін қояды. Сонымен қатар, жазда «Астана жұлдызы» ұлттық кәсіби музыкалық сыйлығын табыстау салтанаты өтеді. Шараға отандық эстраданың танымал өкілдері қатысады және «Үздік жыл орындаушысы» анықталады.
Ұйымдастырушылар тарапынан білгеніміздей, барлық концертке билеттер қала кассаларында және www.koncertyastany.kz сайтында сатылады. Ал ЭКСПО-2017 халықаралық көрмесі барысында өтетін шаралар туралы толық ақпарат кестемен бірге www.astanaday.kz сайтында жарияланады.
Асхат РАЙҚҰЛ,
«Егемен Қазақстан»