Міне, осы айтқан «Ел-Класико» қызығы Қазақстан чемпионатының 10-турында «Астана Арена» стадионында өтті. Бұл ойында «Қайраттың» елордадан үш ұпай арқалап қайтатын мүмкіндігі бар еді. Матчтың бірінші таймында есеп ашып, соңғы минуттарға дейін ұтыс тізгінін қолға ұстап тұрған. Бірақ, бұл жолы жеңіс бұйырмады. Исламбек Қуаттың алыстан теуіп кіргізген әдемі голына кездесудің 87-минутында астаналық Срджан Граховац дәл сондай мерген соққымен жауап берді. Сөйтіп, «Астана» өзін өкшелегендермен арадағы төрт ұпай алшақтықты сақтап қалды. Ал «Қайрат» болса, турнир кестесінде бір саты төмен сырғып, Павлодарда «Ертісті» 1:0 есебімен тізе бүктірген «Ордабасыға» жол берді.
Бұл турда ойда жоқ жерден «Тобылдың» 1:0 есебімен сағын сындырған «Ақжайық» алғашқы алтылықтың арасына келіп қосылды. ФИФА-дан алты ұпайын қайтарып алған «Атырауға» жан бітті дерсің. Мұнайшылар осымен қатарынан екінші жеңісіне қол жеткізді. Бұл жолы олар «Қайсарды» 1:0 есебімен жеңіп, Сыр бойының футболшыларын Қызылордаға құр қол қайтарды.
Турдағы айта кететін бір жаңалық – көш соңындағы «Шахтер» биылғы маусымдағы алғашқы жеңісін тойлады. Кеншілер «Оқжетпестің» қақпасына жауапсыз екі гол соқты. Бірақ осыған қарамастан, «Шахтер» бұрынғыша ең соңғы орында келеді.
Оныншы тур «Ақтөбе» клубындағы ахуалдың оңып тұрмағанын көрсетті. Осыдан екі жыл бұрын ғана жүлдеге таласып жүрген команда бүгінгі күнде көш соңындағылардың қатарын көбейтті. Бұл турда ақтөбеліктер өз алаңында «Тараздан» айласын асыра алмады.
Оныншы турдың нәтижелері мынадай болып тіркелді:
«Оқжетпес» – «Шахтер» – 0:2 (0:1), Тәттібаев, 20 (0:1). Тәттібаев, 71 (0:2). «Ақжайық» – «Тобыл» – 1:0 (0:0), Сергиенко, 76 (1:0). «Атырау» – «Қайсар» – 1:0 (0:0), Максимович , 49 (1:0). «Ертіс» – «Ордабасы» – 0:1 (0:0), Фонтанельо, 74 (0:1). «Астана» – «Қайрат» – 1:1 (0:1), Қуат, 34 (0:1). Граховац, 87 (1:1). «Ақтөбе» – «Тараз» – 1:1 (0:1), Фещук, 24 (0:1). Байтана, 57 (1:1).
Сұрмергендер арасындағы бәсекеде әзірге өзгеріс жоқ: Жерар Гоу («Қайрат») 9 голмен топ бастап келеді. Жуниор Кабананга («Астана») 5 доппен екінші орында тұр.
11-турдың ойындары 6 мамырда өтеді. Бұл күні мына командалар өзара кездесіп, күш сынасады: «Тараз» – «Оқжетпес», «Қайсар» – «Ақтөбе», «Тобыл» – «Астана», «Шахтер» – «Ертіс», «Ордабасы» – «Ақжайық», «Атырау» – «Қайрат».
Қайрат ӘБІЛДИНОВ,
«Егемен Қазақстан»
