Ынтымақтастық пен қауіпсіздік жолындағы 10 жыл

Кеше Астанада өтетін Шанхай Ынтымақтастық Ұйы­мы­ның мерейтойлық Саммитіне арналған «Шанхай Ын­тымақтастық Ұйымы – ынтымақтастық пен қауіпсіздік жо­лындағы 10 жыл» жинағы мен «Қазақстан: ел мен жер» атты фотоальбомның таныстырылымы өтті. Биыл  ұйым құрылғанына 10 жыл то­луына орай  елордамыз Астанада ШЫҰ-ға мүше елдер Мемлекет басшылары ке­ңе­сінің отырысы өтетіні белгілі. Дү­ние­ге келген күнінен бастап, аймақтағы тыныштық пен қуаттылық, сенім мен ынтымақтастық бағытында бірлесе тіршілік етіп жатқан ШЫҰ әлемдік қоғам­дастық  алдында пікіріне құлақ түрер іргелі ұйымға айналғаны аян. Міне, осы ынтымақтастыққа толы 10 жылды құ­жат­тармен сөйлеткен жинақ «Шанхай Ынтымақтастық Ұйымы – ынты­мақ­тас­тық пен қауіпсіздік жолындағы 10 жыл» деп аталыпты. Онда ұйым құрылғалы бері қабылданған негізгі құжаттардың топтамасы беріліп, оны парақтаған жан ынтымақтастықтың қалайша негізі қала­нып, жемісті жұмыстың қандай құжат­тарға сүйеніп жасалғанын ұғады. Таныстырылымда жұртшылық на­зары­­на ұсынылған енді бір дүние – «Қазақстан: ел мен жер» атты фотоальбом болды.  Халқымыздың бүгінгі ты­ны­сы оның спорттық, мәдени-әлеуметтік жетістіктері, экономикадағы табыстары – осының барлығы көркем фотосуреттермен безендірілген альбомда  ұлттық нақыштармен қатар, Қазақстанның бай табиғаты негізінде  көрініс тауыпты.  Еліміздің бүгінгі тынысы жайында сыр шертетін фотоматериалдар өзге түгіл қазақстандықтардың өзін елеңдеткендей. Шанхай Ынтымақтастық Ұйымының Бас хатшысы  Мұратбек Иманалиевтің айтуынша, мерейтойлық Саммитке арна­лып шығарылған осы танымдық материалдар іс-шараға қатысушы барлық деле­гаттарға таратылатын көрінеді. Анар ТӨЛЕУХАНҚЫЗЫ.