Мұсылман әлемінің бірлігі

Кеше Тәуелсіздік сарайында Ислам Конференциясы Ұйы­мы Сыртқы істер министрлері кеңесінің 38-ші сессиясы өз жұ­мысын бастады. Оған 1,6 млрд. халқы бар Азия, Африка, Еуропа және Оңтүстік Америкадағы мұсылман мем­ле­кет­те­рі­нің 56 елінен 1200-ге жуық делегат, бақылаушы жеті елден, әлем­дік беделге ие басқа да халықаралық ұйымдардан өкілдер қатысты. Сессияда Қазақстан Республикасының Президенті Нұрсұлтан Назарбаев құттықтау сөз сөйледі. Жұмыр жердің төрт құрлы­ғын­да 57 мүше мемлекеті бар, әлем­дегі ең ірі үкіметаралық аймақтық ұйымдардың бірі Ислам Конференциясы Ұйымына 1995 жылы мүшелікке енген Қа­зақ­стан мұсылман әлемінде бо­лып жатқан саяси, экономикалық, мәдени және гуманитарлық үде­ріс­терге белсенді араласуды өзі­нің сыртқы саясатындағы ма­ңыз­ды векторының бірі ретінде қа­растырып келеді. Сондықтан да Қазақстан ИКҰ-дағы төрағалығы тұсында «Бейбітшілік, Ынты­мақ­тас­тық және Даму» деген тек ислам әлеміне ғана емес, әлемді жа­сампаздыққа жұмылдыратын ұран­ды ұстанатынын мәлім еткен. БҰҰ-дан кейін мүшелерінің саны жағынан екінші орындағы осы халықаралық ұйымның төр­аға­лық тізгіні былтырғы жылы Тәжік­стан­да болса, ал биыл оның бас­шы­лығына біздің еліміз келіп отыр. Еліміз тәуелсіздігінің 20 жыл­дығы қарсаңында ИКҰ-ға төр­аға­лықты қабылдап алатын Ұйымның 38-ші сессиясының Тәу­елсіздік са­райында өткі­зі­луін­де де символи­ка­лық мән жатқандай. Жиын қасиетті Құран Кә­рім­нің құдіретті үнімен ашылды. Астана қаласы «Нұр Астана» ме­шітінің бас имамы Қалижан Заң­қоев бауырымыз қоңыр дау­сы­мен құранды мақамдап жеткізгенде, барша мұсылман мүддесі бір арнаға тоғысып, ислам рухы биіктеген. Мұнан кейін Тәжік­стан Сыртқы істер министрінің орынбасары Низомиддин Зохидов Ислам Конференциясы Ұйы­мы­ның гүлденуіне үлесін қосып жүрген ұйымға мүше мемлекеттерге алғыс білдіретінін, гумани­тар­лық, саяси және экономика­лық салалардағы қарарлардың қабылдануы ислам әлемінің одан әрі қарай дамуына барынша септігін тигізетінін айта келіп, сессияға қатысушы мемле­кет­тер­дің ресми делегацияларын, ай­мақ­тар бойынша сөз сөйлейтін баяндамашыларды таныстырып өт­кеннен кейін, өздерінің өкі­лет­тік мерзімінің аяқталғанын мә­лім­деді. Ислам Конференциясы Ұйымының құрылғанына 40 жыл толса, осы жылдар аралығында ұйым көп жұмыс атқарды. Мұ­сыл­ман әлемінің дамуы үшін ағымдағы атқарылатын істерге қоса, бүгінгі әлемде орын алып отырған түрлі экономикалық, қаржы дағдарысына қарсы және де исламофобияға қарсы бірқатар жұмыстарды жүйелі жүргізіп келеді. Бүгінгі Сыртқы істер ми­нистрлерінің кеңесі Орталық Азия мен Қазақстанның дамуына айтарлықтай септігін тигізеріне сенім мол. Барлығымыз күші­міз­ді біріктіре отырып, алға қойған мақсаттарға жетеміз деп ойлай­мыз. Ал осы ұйым құрылғалы бері дәл бүгінгідей кең ауқымды бас қосу алғаш рет өтіп отыр. Біз өз төрағалығымыз тұсында Алла тағаладан мұсылман әлемінің да­мып, өркендеуін тілейміз, дей келе, төрағалық тізгінін Қазақстан Сыртқы істер министрі Е.Қа­зы­хановқа тапсырды. Министр сессияға қатысушы қонақтарға алғыс білдірді. Биыл­ғы жыл Қазақстан үшін саяси оқиғаларға толы жыл болды. Ел Тәуелсіздігінің 20 жылдық мерекесі осынау тарихи оқиғамен тұспа-тұс келіп отырғанын айт­қан министр Африка, араб және Азия елдері тобының өкілдеріне сөз беруді жөн көріп отырғанын мәлімдеп, алғашқы сөзді Малай­зияның Сыртқы істер министрі Дато Сри Анифа Аманға берді. Қонақ ұйым төрағасының аты­на, делегация мүшелеріне ри­зашылығын білдіре келіп, «Бү­гінгі сессияда біздің делегацияға үлкен құрмет көрсетіп, сөз беріп отырғандарыңыз үшін алғысым­ды білдіргім келеді. Мұндай ха­лықаралық ұйымның мінбесінен сөз сөйлеу елге, сол елдің өкіліне көрсетілген зор құрмет деп білемін» деді. Қазақстанды ұйымға төрағалық етуімен құттықтай келе, осы отырысты өте жоғары деңгейде ұйымдастырғаны үшін алғысын білдірді. Делегация мү­шелері Қазақ елі тарапынан көр­се­тіліп жатқан қонақжайлық дәс­түрлерге ризашылықтарын жеткізді. Ислам Конференциясы Ұйы­мының қазіргі әлемдік саясатта атқаратын өзіндік рөлі бар. Және Сыртқы істер министрлері кеңесінің өткен жылғы төр­аға­сы­на да және Ислам Конферен­ция­сы Ұйымының Бас хатшысының қызметіне де ризашылығымызды білдіреміз. Э.Ихсаноғлыға ұйым­ның беделін көтерудегі еңбегін айрықша атап өткіміз келеді. Бүгінгі әлемдегі жағдайлар мен оқиғалар біздің және басқа да халықаралық ұйымдардың рөліне басқаша көзбен қарауды талап етеді. Ислам Конференциясы Ұйы­мы әлемде болып жатқан оқиғалардың барлығына белсенді түрде араласып отыруы қажет деп ойлаймын. Және олардың әр­қайсысының шешілу жолдарына қатысты өз ұсыныстарымызды да білдіріп отыруымыз керек. Жал­пы әлемдік деңгейдегі мұндай ша­қыруларға ислам әлемі қа­шан­да дайын болуы тиіс деп ойлай­мын. Бұл ретте менің отаным да өз үлесін қосуға қашанда даяр деп аяқтады сөзін малайзиялық мейман. Келесі кезекте төраға сөзді Оман Сұлтанатының Сыртқы істер жөніндегі мемлекеттік министрі Юсуф бен Алауи бен Аб­даллаға берді. Ол тек өз елінің атынан ғана емес, бүкіл араб әлемі атынан сөз алғанын айтты. Біз Астана қаласының сұлулы­ғы­на тәнті болдық. Қазақстанда болғанымызға өте қуаныштымыз. Мұндағы ғажайып сәулет ескерт­кіштерінің әрқайсысында Пре­зи­денттің қолтаңбасы мен идеясы жатқанына қанық болдық. Мұн­дай басшысы бар елге ұйым төр­ағалығының тізгіні тиген уақытта ИКҰ жетістіктерге жете беретініне иманымыз кәміл. Және бүгінгі конференцияның да жемісті бо­ла­рына сеніміміз мол. Оман Сұл­танаты ұйым жұмысына өз үле­сін қоса беретін болады, деді Абдалла. Мұнан соң модератор қара құрлық өкілі, габондық әріптесі Франкофонии Рафаэль Нгазуз мырзаға сөз берді. Біз бүгін әсем шаһарда жиналып отырғанымыз­ды құрмет тұтамыз. Мен Африка елдерінің атынан осы кон­фе­рен­цияның ұйымдастырылу дең­гейі­не жоғары баға беріп, ризашы­лы­ғымызды жеткізсек деймін. Және өз елімнің Президенті атынан Қа­зақстанға алғыс жеткізуді мәр­те­бе санаймын. Сіздердің елдеріңіз жасап жатқан жұмыстарға біздің басшымыз өте жоғары баға береді. Және Қазақстанның ұйым жұ­мысына серпін берерлік әрекет­те­рін толық құптайды. Бүгінгі іс-шара барысында көптеген мәсе­ле­лер талқыланады. Барлық ислам әлемі өңірлерінің көкейкесті мәселелері көтеріледі. Алдымыз­да тұрған күрмеуі қиын мәсе­ле­лерді бірлесе шешуде ары қарай­ғы ынтымақтастықты жалғас­ты­ру үшін біз қолдан келгеннің бә­рін жасай береміз. Мұсылман ум­масы үшін осы алға қойған міндеттерді орындау үлкен төзім­ді­лікті, білімді қажет етеді. Африка елдерін дамыту жөнінде қабыл­да­ған ұйым бағдарламасына ал­ғысымды білдіремін. Алда әлі де шешілмеген көп мәселе бар. Со­ған байланысты біз сол мемлекеттерді, олардың үкіметтерін осы бағытта жүйелі жұмыс істеуге шақырамыз. Ұйым отырыс шең­берінде үлкен жетістіктерге қол жеткізе береді деп ойлаймын. Мұндағы қабылданған шешімдер конференцияға қатысушы елдер арасындағы ынтымақтастықты же­тілдіре түседі деген ниеттемін. Сахара өңірінің ұйымға қаты­су­шы елдері осы отырыс бары­сын­да қабылданатын шешімдердің ке­лешекте зор рөлі болуын қа­лай­ды деді габондық министр. Сенегал Республикасының ар­найы елшісі Абдоу Фалл Сенегал Президентінің ұйымға жол­да­ған құттықтау сөзін жеткізді. Сіз­дердің алдарыңызда сөз сөйлеу мен үшін үлкен құрмет деп білемін. Қазақстанның қонақжай­лы­ғына алғысымды айтамын. Ал­ды­мызда тұрған мақсат-міндет­тер­ді жүзеге асыру үшін осы залға бір кісідей жиналып отыр­ған ұйым мүшелеріне де алғыс айтқым келеді. Біз өз жұмы­сымызды әрі қарай жаңа мақсат­тарға құруымыз керек. Бола­шақ­та алдымыздан шығатын жаңа дағдарыстардың алдын алу және оларға қарсы тұрып, тойтарыс беруде бірлесе қимылдағанымыз жөн. Жалпы, қай кезде де күрделі мәселелерді шешуде бірлесе қи­мылдаған маңызды. Енді, мен шешілмеген мәселелерге тоқтал­сам деймін. Мәселен, Палес­ти­наға бай­ланысты жасалынып жат­қан жұмыстар, коалициялық үкімет құру жөніндегі мәселені айтқым келеді. Бұл елдің халқы қабыл­дан­ған шешімдерге үлкен үміт­пен қарауда. Олар Израиль мен Палестина арасындағы шиеленіс әділ шешіледі деп үміт артады. Біз өзі­мізбен ұжым шеңберінде әріптес елдермен ынтымақ­тас­тық­ты те­реңдетуге әрдайым бейілдіміз. Біздің құрлықтағы әріп­тес­терімізді қолдау мақсатында Президентіміз қаржы ресурста­рын бөліп отыр. Ол білім беру, денсаулық сақтау, тұрғын үймен қамтамасыз ету сияқты әлеу­мет­тік халыққа қажетті салаларға жұм­салмақ. Ал инвестициялық қар­жының молаюы түрлі қиын­шы­лықтарға тап болған елдерге таптырмас қолдау. Және біз жаңа технологиямен, озық тәжірибе­мен алмасуды басты ұстанымның бірі ретінде қарастырып, және оған жан-жақты қолдау көрсе­те­міз. Ал ол өз мәнінде әлеуеттің жоғарылауына қуатты әсерін тигізеді. 2011 жылдың маусымынан 2012 жылға дейін қаржы бөлеміз, бұл қаржының қолдауымен өт­кізілетін басты шаралар исламо­фо­бияны еңсеруге жұмсалатын болады. Сондай-ақ ислам емес мем­лекеттердегі мұсылмандық­тан шошудан арылтуға, түптеп келгенде, мұсылман әлемінің игілігі үшін қызмет еткіміз келеді. Біздің бәрімізді ислам діні ор­тақтастырып отыр. Ал исламофобиямен күресте біз бірізділік танытып, ортақ үдеден шығуға тиіспіз. Алла тағала біздің осы міндетіміздің орындалуына жет­кізгей деп ойын тиянақтады ол. Баяндамашылардың ұсыныс-пікірлеріне алғысын жеткізген Ер­жан Хозеұлы делегация бас­шы­ларын ел Президенті Нұрсұл­тан Назарбаевпен бірге естелік ұжымдық суретке түсуге ша­қыр­ды. Осы рәсімнен кейін сөз Ислам Конференциясы Ұйымының Бас хатшысы Э.Ихсаноғлыға тиді. Ислам Конференциясы Ұйы­мы­ның Бас хатшысы Экмеледдин Ихсаноғлы Қазақстан Президенті Нұрсұлтан Назарбаевқа, делегация басшыларына, министрлерге қарата айтқан сөзінде өзінің Ислам Конференциясы Ұйымы Сырт­қы істер министрлері кеңесінің 38-ші сессиясына қатысу құр­ме­тіне ие болғанына алғысын жеткізді. «ИКҰ Сыртқы істер министрлері кеңесі 38-ші сессиясының ашылу салтанатында сөз сөйлеу – үлкен мәртебе. Бұл конференция қазіргі заманға сай әрі әдемі қала – Астанада ұйымдастыры­лып отыр. Мен осы орайда, Қазақстан Үкіметі мен Қазақстан халқын ел тәуелсіздігінің 20 жылдық мерейтойымен құттық­тай отырып, қонақжайлығы үшін ризашылығымды білдіремін. Ха­лық­аралық сахнадағы өзінің са­лиқалы саясаты арқасында Қа­зақ­стан өзінің мұсылмандық бол­мысын сақтап қана қоймай, жа­ңа­ру жолына бет алды. Бұл – қа­зіргідей күрделі кезеңде Қазақ­стан­ның мұсылман өркениетінде көшбасшылық тізгінді қолына алуға дайын екендігінің бір көрі­нісі. Президент Нұрсұлтан На­зар­баевтың көреген саясаты­ның негізінде бұған қол жеткізуге болады деп ойлаймын», деді  Э.Ихсаноғлы. Ислам Конференциясы Ұйы­мы­ның Бас хатшысы өзінің баян­дамасында ұйым Қазақстанның күш-жігері негізінде бірқатар ауқымды жұмыстарды атқар­ға­нын атап өтті. «ИКҰ үлкен жол­ды артқа қалдырды. Оның ықпал-әсері тек ұйымға мүше елдерге ғана емес, халықаралық сахнаға да сезілді. Өңірлік және халықаралық дәрежедегі көп­те­ген маңызды құрылымдар біздің Ұйымға қызығушылық танытып, ынтымақтастық байланыс орнату ниетін білдіріп отыр. Ұйымның Жарғысында көзделген міндеттер мен 2005 жылы Саммитте қа­был­данған шешімдер негізінде біз ИКҰ-ның беделін жандандырып, оның маңызын одан әрі артты­руға мүмкіндік алдық. Мен мы­на­ны сеніммен айта аламын: Қа­зіргі таңда ИКҰ халықаралық сах­надағы өзінің орнын мықтап белгілеп қана қоймай, халық­ара­лық ұйымдармен бірлесе, көп­те­ген ауқымды шаруалар атқарып келеді», деді Ұйымның Бас хатшысы. Экмеледдин Ихсаноғлы сессия барысында халықаралық климат шеңберіне сәйкес, мұсыл­ман­дық Уммаға қатысты бірқатар ескертулеріне тоқталып өтті. «Бү­гін­де мұсылман әлемі өзінің тұ­рақтылығы мен дамуына, гүл­де­нуіне кері әсер ететін күрделі жағдайлармен бетпе-бет келіп отыр. Өкінішке қарай, біздің Ум­маның кейбір бөлшектері әлі күн­ге дейін ішкі тұрақтылық пен ынтымақтастыққа айтарлық­тай зәру. Бұл аумалы-төкпелі мерзімдегі қиындықтарды жеңу үшін ауадай қажет. Мұсылман әлемі өзінің тарихын айқын­дай­тын кезеңді басынан өткеруде. Ал ол біздің халықтардың мақ­сат-мүддесін көздейтін іс-ша­ралар үдерісін жеделдету қа­жет­тігін тағы бір нықтай түседі. Олар құқықтық тәртіп, адам құ­қы­ғы, ұлттық үнқатысуды қам­та­масыз ету аясында жүзеге асы­рылуы тиіс. ИКҰ-ның Жарғысы және 10 жылдық мерзімдегі іс-қимыл бағдарламасы біркелкілік және жаңару қағидаттарын бас­шы­лыққа алып келеді. Бұл екі құ­жат та мұсылман әлемі алдында тұрған өзекті мәселелердің шешілуіне ықпал ететін ең бір оң­тайлы іс-шаралар негізінде әзірленген. Осы бір мүмкіндікті пайдалана отырып, мұсылман елдерінен Ұйымның 10 жылдық іс-қимыл бағдарламасына тағы да сүйеніп, оларды жүзеге асыруды жеделдету қажеттігіне баса назар аударғым келеді. Жақында Сол­түс­тік Африкада орын алған оқи­ғаға сүйене отырып, мен Тунис пен Египеттегі ішкі халықаралық төңкерістің әсерінен орын алған демократиялық өзгерістерге тоқ­тал­ғым келеді. Таяу күндері осы елдерге жасаған сапар нәти­же­сіне сәйкес, бұл өзгерістердің бо­ла­шақта құқықтық тәртіп пен де­мократияны, экономикалық даму­ды нығайта түседі деп сенім білдіргім келеді. Ливиядағы дағда­рыс­ты да белгілі бір дәрежеде шешуіміз қажет. Біз Ливия хал­қының құқықтық тәртіпті ор­нықтыру тұрғысындағы заңы және талаптарымен келісеміз әрі мой­ындаймыз. Өткен аптада жоғары деңгейдегі делегация өкілдерін осы елге жіберіп, азаматтардың арасындағы зорлық-зомбылықты тоқтатып, керісінше гуманитар­лық көмекке мүмкіндік беру қа­жеттігіне шақырдым. ИКҰ Сирияның кейбір қалаларында орын алып жатқан бейберекетсіздік пен тәртіпсіздікті үреймен әрі қорқынышпен бақылап отырады. Біз бұл елді ұлттық үнқатысуға, сондай-ақ зорлық-зомбылықты, халық пен тәртіп сақшылары арасындағы қақтығыстарды тоқ­тату мақсатында Сирияның үкі­меті жариялаған реформаларды жүзеге асыруды жеделдетуге шақырамыз. Ал Йеменде орын алған оқиғалар ішкі дағдарысты ұлттық үнқатысу арқылы шешіп, қауіпсіздікті сақтау мен биліктің бейбіт жолмен мемлекетке өтуін қамтамасыз ету қажеттігін тағы бір дәлелдеп берді. Біз Бахрейндегі ұлттық консенсусқа қол жеткізу үшін қажетті бүкіләлемдік, ұлттық үнқатысуды қолдаймыз. Осы орайда, Бахрейн тарапына ашық үнқатысудың маңызды­лы­ғы жөнінде тағы да айта келе, бұл өз кезегінде осы елдің жо­ға­ры мүддесін көздейтінін жеткізгім келеді», деді Э. Ихсаноғлы. Келелі жиын кезінде осындай бірқатар мұсылман елдеріндегі қалыптасқан күрделі жағдайлар жайына тоқталған Ұйым Бас хатшысы Палестина елінде орын алған оқиғаларды да назардан шығармады. «Палестинадағы оқи­ғалар күні бүгінге дейін біз­дің айрықша алаңдаушылығымызды ту­ғы­зып отыр. Израильдің Иерусалимге басқыншылық жасауы әлі күнге дейін біздің Уммамыздың қасиеті мен киесіне қауіп төн­діріп келеді. Соңғы уақытта Израиль тарапының мұ­сылманның қасиетті мекенін күштеп қосып алуы және Палестина тұрғын­дары­ның жекеменшігі мен мү­ліктеріне қол салуы жаңаша қар­қын алып келеді. Яғни, мұндағы жағдай тұйыққа тіреліп отыр. Сондықтан, біздің ен­дігі міндетіміз – палес­тина­лық­тардың осы мәселе тура­сындағы шешімін қолдап, созылмалы қақтығыстар­ды оңтайландыруға қол жеткізуіміз қажет. Мен ИКҰ-ға мүше барлық елдерді Палестинаның 1956 жылға дейінгі шекарасын та­нуға және мойындауға шақы­ра­мын», деді бұл турасында ол. Бұдан кейінгі кезекте Бас хатшы ИКҰ-ның ғаламдық тұр­ғы­да маңызы бар және өзіндік рөлі белгіленген ұйым екендігін атап өте келе, болашақта Ауған­стандағы жағдайды ретке келтіруге айрықша мән беру қажет­тігін тілге тиек етті. «Біз Ауған­стандағы күрделі жағдайларды оңтайландыру бағытында жұ­мыс­ жүргізудеміз. Бұл ретте, бүгінде Палестина мен Ау­ған­стан ара­сындағы өзара байла­ныс­тың да­мып, өзгеше кейіпке еніп келе жатқанын атап өткім келеді. Жақында мен Иракта болып, мемлекеттің жоғары лауазымға ие өкілдерімен кездестім. Бұл сапардың басты мақсаты – ИКҰ мен Ирак арасындағы байланыс деңгейін Ирактағы ұлттық келісімге қол жеткізу мен өзара ынтымақтастық негізінде көтеру болды», деді Э. Ихсаноғлы. Бас хатшы Сомалидегі жағдайды да назардан шығармады. Бұл ретте ол ИКҰ мүшелерін Сомали мемлекетіндегі жағдайларды оң үде­рістерге жетелеу бағытындағы іс-қимылда­рын ширықтыруға ша­қырды. ИКҰ Бас хатшысы өзінің сө­зін­де Түркия мен Кипр арасын­да­ғы жағдайды ретке келтіру, Армения, Әзербайжан, Косово елдеріндегі орын алып отырған оқи­ға­лар бұл елдердегі жағдайларға бейжай қарамауды қажет ететінін атап өтті. Ол сөз арасында ислам Умма­сының мүддесіне әлемдік тұр­ғы­да да мән беру қажеттігін назардан шығармады. «Бұл ретте біз әлемдік лидерлермен байланыс орнатудың тың көздерін іздеуіміз қажет. Мен өткен жылдың сәуір айында Вашингтонға сапармен барып, Президент Обамамен және АҚШ-тың ресми тұлғала­ры­мен кездестім. Біз кездесулер барысында ислам әлемін алаң­да­тып отырған көптеген мәселелер жайын сөз еттік. Ал Лондонға барған сапарымда Ұлыбрита­ния­ның премьер-министрімен жүз­дес­тім. Бұл жерде ИКҰ мен Ұлы­британия арасындағы түрлі сала­дағы байланыстар мәселесі сөз болды. Брюссельге барған сапа­рым­да да осы жәйттер негізге алынды. Мұндай қадамдардың барлығы ислам әлемі үшін ауадай қажет», деді бұл турасында ол. Ұйымның бас хатшысы қоз­ғаған ең бір өткір мәселелердің бірі исламофобия төңірегінде өр­біді. «Исламофобия ислам әлемі үшін күн тәртібінен түспей тұр­ған өзекті проблема. Ғаламдық тұрғыдан алып қарағанда, біз осы құбылыстың кері әсерін байқап келеміз. Қазіргі таңда исламо­фо­бия­ның деңгейі өршіп тұр. Был­тыр қыркүйекте ортақ консенсус негізінде осы күрделі мәселені шешуді көздейтін 8 тармақтан тұратын бағдарлама қабылданған еді. Оның негізінде адамдарды діни сеніміне байланысты қу­далау, қысым көрсетуге, зорлық-зомбылыққа қарсы нақты шаралар көзделген. Бұл қарар Адам құқықтары жөніндегі кеңестің 16-шы сессиясында консенсус бойынша қабылданды. ИКҰ адам құқықтары жөніндегі тәуелсіз комиссия құруды қолға алуда. Са­рапшылардан құрылған мұндай комиссия біздің ұйым қызметін дамытып, жұмысымызды жемісті ете түспек. Мен барлық елдерді осы құжатты тезірек ратифика­циялауға шақырамын. Себебі, ауыз су жетіспеушілігі, экология сынды мәселелер де біз үшін айрықша маңызды. Аурулармен күрес, полиемилит, ана мен бала денсаулығы да назарымызда. Гу­манитарлық бағытта табиғи апат­тардан зардап шеккендерге де көмек қолын созамыз. Болашақта білім саласында да ауқымды жұ­мыстарды қолға алуымыз қажет», деді Бас хатшы. Сөзінің соңында Э.Ихсаноғлы Ас­танада өтіп жатқан тарихи кеңес жай шара болып қалмай, ИКҰ алдында тұрған міндеттерді шешуге ықпал ететін жаңа қадам болса деген сенімін жеткізді. «Біз бұл жерге өзіміздің мақсат-мүд­делерімізді айқындап, болашақта оларды тәжірибе түрінде жүзеге асыру үшін келдік. Сондықтан, Ұйым аясындағы қызметімізді шынайы сенімге құрғанымыз жөн», деді Экмеледдин Ихсан­оғлы сө­зі­нің соңында. Бұдан кейін Мемлекет басшысы Нұрсұлтан Назарбаев сөз алды. (Елба­сы сөзінің толық мәтіні 1-2-беттерде жарияланып отыр). ИКҰ-ның Сыртқы істер министрлері кеңесінің 38-ші сессия­сының алғашқы күні резолюция жобасы қабылданды. 38 жыл бойына Ислам Конференциясы Ұйы­мы деген атпен белгілі ха­лықаралық ұйым елордадағы сессиядан бастап Ислам Ын­ты­мақтастығы Ұйымы болып жаңа атауды иеленді. Сонымен бірге ұйымның жаңа эмблемасы да бір- ауыздан мақұлданды. Ол жұмыр жерді аялай көмкерген жарты ай мен жер шарының кіндігіндегі барша мұсылман баласы қастер тұтатын Қағбаның қара тасын бейнелеумен ерекше сезім ту­ғы­за­ды. Жалпы осыған дейін Ислам Конференциясы Ұйымының атауы мен эмблемасын өзгерту туралы ойлар баспасөз беттерінде жиі көтеріліп жүргені белгілі. Оған себеп, биылғы жылғы мамыр айының ортасында Жидда қала­сында жоғары лауазымды тұл­ға­лардың жиналысында осы мәселе ортаға салынып, қолдау тапқан болатын. Бірақ мұны ресми түрде бекіту рәсімі Қазақ елі аста­на­сының маңдайына бұйы­руы ел өміріндегі тарихи оқиға һәм мұ­сылман өркениетінен алар Қа­зақ­стан беделі мәртебесінің тағы бір көрінісі іспетті. Сес­сияның мұ­нан кейінгі отырысы жабық есік жағдайында өтті. Ондағы көте­ріл­ген мәселелер мен қабыл­дан­ған шешімдер Астана деклара­ция­сы мен резо­люцияларында көрі­ніс табады, деді Сыртқы істер министрінің ресми өкілі Асқар Абдрахманов. Бүгін сессия өз жұмысын жалғастырады. «Егемен Қазақстанның» тілшілер тобы. Суреттерді түсірген Орынбай БАЛМҰРАТ.