Ортақ келіссөзге ынталылық

Мемлекеттік хатшы Қанат Саудабаев Астана төрінде өтіп жатқан Ислам Ынтымақтастық Ұйымы Сыртқы істер министрлері кеңесінің 38-ші сессиясына қатысуға келген бірқатар делегация басшыларын қабылдады. Қанат Бекмырзаұлы ең әуелі Ұлыбритания және Солтүстік Ир­ландия Біріккен корольдігі деле­га­циясының басшысы, қазіргі Консервативті билік партия­сы­ның тең төрайымы баронесса Саида Уорсимен кездесті. Басқосу кезінде Мемлекеттік хатшы Астанада ұйымдастырылған ислам әлеміне қатысты ауқымды жиын­ның маңыздылығына тоқталды. «Қазақстан Президенті сессияға қатысушыларға арнаған сөзінде ислам Уммасы алдында тұрған түйткілді мәселелерді нақты атап көрсетті. Сондай-ақ, сол мәселе­лерді шешу жолдарына да тоқ­талған еді. Бұл, ең алдымен, ислам қоғамдастығын жандандыру. Екіншіден, ислам әлемі елдерінің бай табиғи ресурстарын халық­тың әлеуметтік жағдайы мен тұрмыс-тіршілігі жолында тиімді пайдалану. Ал үшіншіден, Шы­ғыс пен Батыс арасындағы үн­қатысуды нығайту және дамыту. Біздің ел өзінің тәжірибесі ар­қы­лы осы төңіректегі мәселелерді шешуге күш салып келеді. 20 жыл бедерінде Қазақстан Прези­дентінің салиқалы саясаты арқа­сында ел ішіндегі тұрақтылық, бейбітшілік пен келісім сақталып келеді. Елімізде 46 конфес­сия­ның 130-дан астам этнос өкілдері тұрады. Сондықтан, біз бұрынғы Кеңес Одағы елдерінің ішінде осындай ұстамды саясатты жүр­гізіп келетін елдердің бірі екенімізді мақтан тұтамыз. Сол сая­саттың арқасында мемлекетте ешқандай шиеленіс орын алған жоқ. Бұл – біздің елдің бола­шақтағы дамуының негізі», деді Қанат Саудабаев. Ал Саида Уорси «Ислам Ын­тымақтастық Ұйымы» Сыртқы істер министрлері кеңесінің 38-ші сессиясында мұсылман әлемі­мен және мұсылман емес әлемнің түрлі қоғамдастығының өзара қоян-қолтық жұмыс істеп, ынты­мақтастық орнатуы тұрғысында айтылған ой-пікірге қосы­ла­ты­нын жеткізді. «Мен Ұлыбритания министрлер кабинетінің министрі болғаныммен, діни сенімім жағынан мұсылманмын. Бұл осындай ынтымақтастықтың қа­жет­тілігін дәлелдейтін мысал­дар­дың бірі», деді ол. Қанат Саудабаев Ядролық қару-жарақты таратпау жөніндегі Ұйымның Дайындық комиссия­сының атқарушы директоры Тибор Тотпен де кездесті. «Ядролық қаруды таратпау және ядролық қауіпті сейілту бағытында жұмыс атқаруда белсенділік көрсетіп жүр­ген азаматпен, шынайы до­сы­мызбен жүздесу біздің көңі­лімізге әрдайым жылылық ұяла­тады. Сіз басқаратын Ұйыммен біз­дің көп жылдан бергі ынты­мақ­тастығымыз өз нәтижесін береді. Сіз Қазақстан Президенті­нің осы мәселе төңірегіндегі бас­тамаларын үнемі қолдап келесіз. БҰҰ Бас Ассамблеясы Қазақстан Президентінің 29 тамызды Семей полигонының жабылған күні деп жариялаған Жарлығы туралы арнайы қарар қабылдағаны белгілі. Бұл күн бүгінде Ядролық сынақтарға қарсы іс-шаралардың халықаралық күні болып бекітілген. Менің ойымша, бұл – біздің ортақ жеңісіміз. Биылғы жылы осы күнді жай ғана атап өтпей­міз. Бұл жыл Семей сынақ поли­гонының жабылғанына 20 жыл толуымен де есте қалады. Осы­ған орай, биылғы жылдың қазан айында Астанада «Ядролық қару­сыз әлем» деген тақы­рып­пен ха­лықаралық форум өтеді. Оған әлем­нің түкпір-түкпірінен ядро­лық қарусыздану қозғалысы ба­ғы­тында жұмыс атқарып жатқан азаматтар келеді. Сәті түскен кезде сізді Мемлекет басшысы аты­нан осы ауқымды шараға ша­қырамын. Болашақта өзіміздің екіжақты ынтымақ­тас­тығымызды нығайта түсеміз деген ойдамын», деді Қанат Саудабаев. Тибор Тот өз сөзінде Ислам Ынтымақтастық Ұйымына мүше елдердің 90 пайызға жуығы біз­дің Ядролық қаруды таратпау жөніндегі келісімімізге қол қой­ған. Енді 4 ел осы келісімге қол қоймақ. Биылғы жыл Семей сы­нақ полигонының жабылғанына 20 жыл толуымен ерекшеленеді. Сондай-ақ, биыл біздің ортақ келісімге қол қоюымызға 15 жыл толмақ. Ядролық қарусыздану ба­ғытындағы бастамалары жа­ғы­нан Қазақстан көшбасшылық тізгінді ұстап келеді. Астанада өте­тін «Ядролық қарусыз әлем» ха­лықаралық форумы аясында біз өзіміздің ынтымақтастығымызды одан әрі жалғастыра береміз деген ойдамын», деді Т. Тот. Бұл күні Мемлекеттік хатшы Еуропа Кеңесі Парламенттік Ассамблеясының төрағасы Мевлют Чавушоғлымен де кездесті. Кездесу барысында тараптар Н.Назарбаевтың бастамасы бой­ын­ша жасалған «Еуропаға жол» мемлекеттік бағдарламасын жү­зеге асыру, осы бағыттағы жұ­мыс­тарды Еуропада жандандыру жөніндегі мәселелер бойынша пікір алмасты. «Еуропа Кеңесімен арадағы байланысымыз жыл өткен сайын жаңаша жанданып, өзгеше қар­қын алып келеді. Бұл ретте сіз­дердің қолдауларыңыз негізінде жүзеге асып отырған парла­мент­аралық байланыс өлшемінің ма­ңы­зы зор. Қазақстан үшін даму­дың еуропалық векторы айрықша маңызға ие басымдықтардың бірі. Қазақстан Президентінің бас­тамасымен қолға алынған «Еу­ропаға жол» мемлекеттік бағдар­ламасы – соның айғағы. Сондай-ақ, өткен жылы еліміздің ЕҚЫҰ-ға төрағалық етуі мен ұйым саммитін өткізуі де халықаралық қоғамдастықтың Қазақстан әлеу­меттік-экономикалық, қоғамдық-демократиялық салалардағы сая­са­тын объективті мойындаудың бір көрінісі. Сондықтан, біз Еуропа әлемімен байланысымызды жалғастыра беретін боламыз. Еуропа Кеңесі мен Қазақстан ара­сындағы ынтымақтастық та өзінің игі нәтижесін береді деген сенімдемін», деді Қ. Саудабаев. Мевлют Чавушоғлы да Еуропа Кеңесі мен Қазақстан әріп­тестігі қос тараптың ортақ мүд­де­лерінің жүзеге асуына ықпал етеді деген ойын жеткізді. Ләйла ЕДІЛҚЫЗЫ.