Жаңа кәсіпорын

Бүгінгі ғылым мен өндірістің қатар дамуы қай саланың болмасын бәсекеге қабілеттілігін арттыратыны анық. Мал өнімдерінің сапасы таразы басына түскен­дік­тен, шаруалар озық технологияны пайдалануға батыл бет бұрған. Төрт түлік және құс етінің сапасы мен экологиялық тазалығына үлес қосқан өндіріс орнының жұмысы осылай алға басты деуге болады. Іле ауданы Боралдай кенттік округінің өндірістік аймағына орналасқан «Кормовик – Евротехнология» серіктестігі төрт түлік мал мен үй құстарына қажетті азықтық қоспа дайындаумен айналысатын бірден-бір кәсіпорын саналады. Жылдық қуаттылығы 10 мың тонна. Бұл кәсіп­орын үдемелі индустриялық-инновациялық бағ­дар­­лама аясында құлашын кеңге жайған. Қазірдің өзінде голландиялық технологиямен жарақ­тан­ды­рылған зауыт өнімдерін Жетісу өңірі, Жам­был, Оңтүстік Қазақстан және Шығыс Қазақстан об­лыс­­тары­ның шаруалары тапсырыспен алуда. Дай­ын­далған дәрумендер мал мен құсқа белгілі ре­цепт­пен дайындалады. Содан соң құты ыдыс­тарға, пакеттерге салынып, тұтынушыға жөнел­ті­ле­ді. Сондай-ақ, жеке тапсырыс берушілердің тілектері де назардан тыс қалмайтынын айтқан жөн. Инновациялық технологияны енгізген кәсіп­орын өнімі еліміздің құс фабрикалары, бордақы­лау алаңдары мен тауарлы-сүт фермаларында үлкен сұранысқа ие. Зауыт әрбір ауылша­руа­шы­лық құрылымдарына ғылыми негізделген азық дайындаса, құрамажем микроэлементтерге, дәру­мен­дер­ге бай. Негізінен қоспалар мал­дың күйін жақсартады. Аталған қос­паның ірі қара мен жылқының, қаз, үйрек, үндік, тауық, балықтың тез же­тілуі мен салмақ қосуына ерекше әсері бар. Ал осында дайындалған ар­найы қоспа бұзау мен құлынға, қо­зыға қажетті аналық сүтті алмастыра алатынын да айтқан жөн. Кәсіпорынды іске қосуға 200 млн. теңгедей қаржы жұмсалыпты. Азық­тық қоспа жасауға шикізаттың бір бөлігі Еуропадан әкелінсе, бір бөлігі елімізде дайындалады. Дәл осындай өнім шығаратын кәсіпорын елімізде осы «Кормовик» қана. Сондықтан өнім өткізуде еш  кедергі жоқ, керісінше сұраныс көп. – Бүгінгі басқару жүйесі зауыт жұ­мы­сын толығымен қадағалауға мүм­кіндік береді. Жалпы, мұндағы технология голландиялық әдіспен басқа­ры­ла­ды. Бәрі автоматтандырылған. Адам күші аз жұмсалады. Мен технолог берген азықты компьютерге сала­мын. Арнайы бағдарлама барлық жұ­мысты өзі атқарып шығады. Нәти­жесінде біз сапалы өнім аламыз, – дейді серік­тестіктің өндіріс­тік меңгерушісі Самат Шамбаев. Зауыт өзін жан-жаққа таныту үшін 400 тонна өнім шығаруды межелеген. Ал түскен сұранысқа қарай толық қуатты­лық­қа көшетін күндер де алыс емес. Күмісжан БАЙЖАН, Алматы облысы.