Ел мерекесіне – берекелі тарту

Ол өңірлік жалпы өнімнің 8 пайыздық өсімімен өрнектелмек

Қазақстан Республикасының Президенті Нұрсұлтан Назарбаев дүйсенбі күні жұмыс бабындағы сапармен Ақмола облысында болды. Мемлекет басшысы мен Президент Әкімшілігінің Басшысы Аслан Мусинді және Премьер- Министрдің бірінші орынбасары Өмірзақ Шөкеевті облыс әкімі Сергей Дьяченко қарсы алды. Астаналық облыс Қазақстан Тәуелсіздігінің 20 жылдық мерейелі мерекесіне өміріміздің бар­лық саласындағы серпінді та­быс­тарымен жақындап келеді. Мемлекет басшысының эконо­ми­ка­ның 7 пайыздық өсіміне қол жеткізу, ел тұрғындарының емен-жарқын тіршілігін қамтамасыз ету жөніндегі тұтқалы тапсыр­ма­ла­рын мүлтіксіз орындаудың ал­ғы­шарттары қалыптасып, сүбелі жемісін бере бастады. Бірінші жар­тыжылдықтағы үдемелі индус­трия­ландыру жобаларының аяқ алысын сараптаған облыс бас­шы­лығы жыл соңына дейін өңірлік жалпы өнім өсімін 622,5 миллиард теңгеге жеткізіп, 8 пайыздық өсімді еңсеруді діттеп отыр. Оған толық негіздер бар. Индустрия секторындағы индекстік бағам бойынша Ақмола облысы (138,9 пайыз) Астана қаласынан (144,9 пайыз) кейінгі екінші орынға көтерілгені осының айғағы. Осыдан тура бір жыл бұрын, Елбасы Н.Назарбаевтың қаты­суы­мен іске қосылған «Алтын­тау-Көкшетау» ЖШС алтын айы­ру фабрикасы кәсіпорынның өн­дірістік қуатын 2,7 есеге арт­ты­рып, алтын өндіру көлемін 5,9 тоннаға жеткізді. Сондай-ақ, өңір кәсіпорындарында, өткен жыл­мен салыстырғанда, жоғары сұ­ра­ныстағы подщипник дайындау 1,6 есеге артып, 382 «КамАЗ» жүк көліктері құрастырылды. Ин­дустрияландыру картасына ен­гізілген ірі жобалар қата­рын­дағы «Арыстан» ЖШС әртүрлі көлемдегі полиэтилен құбыр­ла­рын шығаруды 7,4 есеге көбейт­се, «ЕНКИ» серіктестігі керами­ка­лық кірпіштерді тұтыну­шы­лар­ға 1,7 есе артық жөнелтті. Ақмолалықтардың аграрлық сек­торды әртараптандыру қадам­да­рына құлшына кіріскені бай­қалады. Елбасының тік­ұша­ғы­ның Зеренді ауданындағы «Щучье сүт зауыты» ЖШС мал бор­дақылау кешеніне қонуының да өзіндік мәні бар. Табиғаты та­мыл­жыған Мәлік Ғабдуллин ауы­лында қысқа мерзімде 2500 ірі қараға арналған бүгінгі күннің талабындағы 8 бордақылау алаңы­нан тұратын ферма бой көтерді. Шаруашылық басшысы Серікбай Садықовтың баяндауынша, мақ­сат «Астана қаласының айнала­сын­дағы азық-түлік белдеуін қам­тамасыз ету» инвестициялық жобасын іске асыру. Серік­тестіктің талдамалары мен негіздемелерін қолдаған «Агронесие корпорациясы» АҚ 1 миллиард 45 миллион теңге қаржы бөліп отыр. Былтыр Солтүстік Америкадан «Абердин ангус», «Герефорд» тұқымды 644 бас мал жеткізілсе, үстіміздегі жылғы мамыр айында 165 асыл тұқымды мал алынды. Оның 30-ы бұқа, 132-сі құнажындар екен. «Түлік төлімен өседі» демекші, Көкше табиға­тын жерсінген сиырлардан қазір­дің өзінде 542 бұзу алыныпты. Қайта түлеген ауылдың әлеу­меттік ахуалы жақсарғанын фер­ма­дағы 42 малшының айлық ең­бекақысы 40 мың теңгеден ас­қа­нынан пайымдауға болады. Ел­басы Нұрсұлтан Назарбаев биыл осы тектес сиырлардың 1000 басын сатып алуды жоспарлаған серіктестіктің серпінді қадам­да­ры өзгелерге де жұғысты бо­луына тілек қосты. Зерлі Зеренді биыл да ырыз­ды­ғын төгіп тұр. Мемлекет бас­шысы бел омыраудан келетін егін алқаптарындағы, майлы да­қыл­дар өскініндегі, шабындық­тар­да­ғы еңбек ырғағына жақсы баға­сын беріп, ертеңгі сын сағат­тар­дағы уақыт өлшемінен қалып қой­мауды еске салды. Бұл орайда тәжірибелі басшы Талғат Ескендіров жетекшілік ететін көп са­лалы «Зеренді Астық» ЖШС намыс туын биік көтеретініне сенімді. Жыл сайын 33 мың гек­тарға дән себетін шаруашылық былтырғы қолайсыз жылдың өзін­де әр гектардан 12 центнерден өнім жинаған. «Зеренді Астық» өзі құрылған 1998 жылдан бастап барлық егістік алқапта гербицидтерді пайдалану арқылы «нөлдік» технологияны қолданып келеді. Биылғының түсімі, диқандар ашып айтпағанымен, еселеп ар­та­тындығын 4 механикалық қыр­ман­ның, 6 астық қоймасының сақадай-сай дайындалғанынан-ақ бағамдауға болады. «Кейс», «Джон Дир», «Бюллер», «Кировец» маркалы қуатты техникалар науқан дабылы қағылар күнді тосып тұр. Сонымен бірге, серіктестік есебіндегі 285 адамның бір бөлігі асыл тұқымды мал өсіру­мен айналысса, шұжық дайын­дай­тын шағын цехтағы іс те өнікті көрінді. Мемлекет басшысы аудан әкі­мі Ербол Сағдиевтің ауыл өмі­рін­дегі өрісті қадамдардан таратып айтқан ойларына қолдау білдірді. Елбасының Көкше сапар­ла­рын­да тарихи жәдігерлер мен ерен тұлғалар аруағына зиярат ету ғадеті бар. Қасиетті Рамазан айында Біржан елі – Еңбекшілдер ауданына атбасын бұрудың ас­та­рында тәлімдік мән барын аң­ғар­дық. Аудан сонымен қатар, бүгін­гі күннің ауқымындағы елеулі сер­пілістердің бастамашысы бо­лып отыр десек, артық айтқан­дық емес. Мұнда ауданды донор­лық қадамға бастайтын «Атансор», «Өркен» темір кеніштері, «Сага Крик Голд компани» алтын өнді­рі­сі, цемент, әк, көмір өн­ді­рісі отан­дық және шетелдік әріп­тес­тер назарында тұрған өндіріс ошақтары. Бұл жолы аудан әкімі Теміржан Хамитов Елбасы мен Үкімет мүшелерін өңірдегі ең ірі ин­дус­трия­лық-инновациялық жоба ауқымындағы «Қаз Гер Құс» жауапкершілігі шектеулі серіктестігіне бастап келді. Заманалық кәсіп­орынның қаржылық блогы «Қаз Агро Финанс» АҚ 2,1 миллиард теңге несие ақшасынан және 700 миллион теңге жеке қаражатынан тұрады. Жалпы, құрылыс қолға алынған 2008 жылдан бері мұнда 2,4 миллиард теңге қаржы игерілген. Өндіріс ошағында 5,3 шақы­рым­дық электр желісі, 2,9 шақы­рым­дық орталықтандырылған су тарату қондырғылары, 12 тауық қора, сағатына 5 тонна құрама жем әзірлейтін цех, күнбағыс майы цехы, екі қабатты әкімшілік ғимараты пайдалануға берілді. Оның қайтарымы да көңілде­гі­дей. Бейнелеп айтқанда, жапан түзде 650 мекиенге арналған қуат­ты құс фабрикасы тұрғызы­лып, өнім тасқыны күн санап артуда. Қазір фабрикадағы 181 адам 580 мың құсқа күтім жасауда. Кәсіпорында 2008 жылдан бастап биылғы алты айды қос­қан­да 281,047 мың теңгенің өнімі өндіріліпті. Былтырғы жылдың өзінде Астананың дастарқан мә­зі­рін 20,8 миллион дана жұмырт­қамен байытуға мүмкіндік туса, биылғы жартыжылдықтағы көр­сет­кіш 11,3 миллион данаға жетіп отыр. Құс өсірушілер «СТ РК ИСО 9001-2009» сапа мендежменті сертификатымен жұмыс істейді. Сондай-ақ, серіктестіктің биыл жылына 1,5 тонна құс етін өндіріп, оны қайта өңдеу цехын ашуды қолға алғаны да жақсы ойларға бастайды. Мемлекет басшысы ауыл ең­беккерлерінің алдына қазақ­стан­дық­тарды өз өнімдерімізбен қам­та­масыз етумен бірге 2014 жылға қарай сыртқа 60 мың тонна ет экспорттау міндетін қойғаны белгілі. Нұрсұлтан Әбішұлы Ең­бек­шіл­дер ауданындағы Мамай ауы­лын­да іске қосылған аса ірі индустриялық-инновациялық жоба – «Kaz Beef Ltd» жауапкершілігі шектеулі серіктестігінде бол­ған­да бұл мәселені шегелеп айт­ты. Ен далаға қонақтаған үш алаң­қайлы кешенде 5000 бас ірі қара және 1000 құнажын ұста­ла­тын болады. Қазір мұнда 2500 бас ірі қара бағылуда. Ол екі бағытты: сүттік және ет өндіруді қамтиды. Мамайлықтар да аме­ри­калық «Герефорд», «Абердин ангусс» ірі қарасын өсіруге ма­манданған. Елбасы 11 орамға орналасты­рыл­ған ірі қараны күту техно­ло­гиясына ден қойды. ЖШС ди­рек­торы Нұрғали Бейсекенов, жем-шөп пен құрама азық дайын­дау­мен айналысатын «Еңбек-Бе­реке» шаруашылығының басшы­сы Асқар Қиықов, америкалық «Global Beef» компаниясының менеджері Майкл Слеттери қой­ыл­ған сұрақтарға толыққанды жауап қайтарды. Солтүстік Дакота штатынан жеткізілген 1327 құнажын мен 20 бұқа ойдағыдай қыстап шықты. Биылғы дайын­дық та мінсіз деп бағалануда. Ұжым мүшелері бүгінгі кездесуде Елбасы айтқан үнемшілдік, ресурстарды тиімді әрі толық пайдалану, өнімнің өзіндік құнын төмендету, азық-түлік молшылы­ғы мен үкіметтік қолдаудың қай­тарымын еселеу жолында ең­бектенуге сөз берді. Бақберген АМАЛБЕК, Ақмола облысы. Суреттерді түсіргендер С.БОНДАРЕНКО, Б.ОТАРБАЕВ.