Инвестициялар және даму министрі Жеңіс Қасымбек таныстырған аталған ратификациялық құжат Орталық Азия өңірлік экономикалық ынтымақтастығы шеңберінде «Ақтөбе – Мақат» автомобиль жолын реконструкциялау жобасын жүзеге асыруды көздейді.
«Келісімге сәйкес, Азия Даму Банкі біздің елге ұзындығы 299 километрге жуық екі жолақты автомобиль жолдарының учаскесін реконструкциялауға 240 300 000 доллар мөлшерінде қарыз береді. Ал бұл жоба аясында «Ресей Федерациясы шекарасы (Орскіге қарай) – Ақтөбе – Атырау – РФ шекарасы (Астраханьға қарай)» автомобиль жолының «Ақтөбе – Мақат» учаскесі арқылы мемлекетаралық және сауда қатынастарының кеңеюі мен тереңдей түсуіне зор мүмкіндік туады», – деді Ж.Қасымбек.
Министрдің айтуынша, аталған учаскенің іске қосылуы Каспий маңы елдері үшін Қытай, Ресей нарықтары мен Оңтүстік-Шығыс Азия аймақтарына шығуға жол ашатын көрінеді. Өйткені, осы жол «Батыс Еуропа – Батыс Қытай» көлік дәлізіне қосылатын болады, ал «Ақтөбе – Мақат» жобасы бiрнеше көзден қаржыландырылады. Айталық, жолдың 299 шақырымы – Азия Даму Банкi есебiнен, 156 шақырымы – Ислам Даму Банкi есебiнен жөнделедi. Естеріңізге сала кетейік, Қазақстан мен Азия Даму Банкi арасындағы Қарыз туралы келiсiм 2016 жылы 7 желтоқсанда жасалған болатын. Жоба бойынша асфальт төсеу, 11 көпiр салу, 149 су өткiзгiш құбыр мен 2 жол өтпесiн салу жоспарланған. Жоба 2017-2021 жылдар аралығында iске асуы тиiс.
Министрдің сөзіне қарағанда, келiсiмшарттарға сәйкес, Азия Даму Банкі Ақтөбе мен Мақат елдi мекендерiнiң арасындағы ұзындығы 299 км-ге жуық екi жолақты автомобиль жолдарының учаскесiн реконструкциялауға жұмсалатын болжамды шығындар сомасы 273 млн 065 мың АҚШ долларын құрайды. Оның iшiнде АДБ-нiң қарызы – 240 млн 300 мың АҚШ долларын, республикалық бюджеттен қарызды бiрлесiп қаржыландыру 32 млн 765 мың АҚШ долларын құрайды. Аталған сомадағы АДБ қарызы Қазақстанға 5,5 жылдық жеңiлдiктi кезеңдi қоса алғанда, 18 жыл өтеу мерзiмiмен берiледi.
Осы күні Жеңіс Махмұтұлының таныстыруымен палата мақұлдаған тағы бір құжат – «Қазақстан Республикасының Үкіметі мен Ресей Федерациясының Үкіметі арасындағы авиациялық іздестіру және құтқару саласындағы ынтымақтастық туралы келісімді ратификациялау туралы» заң жобасы болды. Ресеймен авиациялық іздестіру және құтқару саласындағы ынтымақтастық туралы үкіметаралық келісімде әрбір тарап өзінің іздестіру және құтқару ауданында тәулік бойы кезекшілікті жүзеге асыратын авиациялық іздестіру-құтқару қызметтерін қамтамасыз етеді деп көрсетілген. Сондай-ақ, әрбір тарап өзінің жауапты аймағында іздестіру-құтқару операцияларын жүзеге асыру барысында туындайтын шығыстарды өздері дербес көтеретіндігі де нақтыланған.
Жалпы отырыста «Қазақстан Республикасының кейбір заңнамалық актілеріне жоғары оқу орындарының академиялық және басқару дербестігін кеңейту мәселелері бойынша өзгерістер мен толықтырулар енгізу туралы» заң жобасы жұмысқа қабылданды. Сондай-ақ, «Қазақстан Республикасы мен Қырғыз Республикасы арасындағы Тарифтік саясат негіздерін қоса алғанда, темір жол көлігі көрсететін қызметтерге қол жеткізуді реттеу тәртібін қолдану туралы келісімді ратификациялау туралы» келісім мен «Қазақстан Республикасының Үкiметi мен Өзбекстан Республикасының Үкiметi арасындағы Қазақстан-Өзбекстан мемлекеттiк шекарасы арқылы өткiзу пункттерi туралы келiсiмге 2006 жылғы 4 қыркүйектегі Хаттамаға өзгерістер мен толықтырулар енгізу туралы хаттаманы ратификациялау туралы» заң жобасы бойынша бейінді комитеттерге корытынды әзірлеу мерзімдері тағайындалды.
Нұрлыбек ДОСЫБАЙ,
«Егемен Қазақстан»
