ЭКСПО-2017 халықаралық мамандандырылған көрмесін өткізу кезіндегі мәдени бағдарламаны Мәдениет және спорт министрлігі, «Астана ЭКСПО-2017» Ұлттық компаниясы және Астана қаласының әкімдігі бірлесіп әзірледі. Бұл күндері ойын-сауық бағдарламалары мен концерттердің 70 пайызы қаланың түрлі аудандарындағы ашық алаңдарда, саябақтарда, сондай-ақ, қала маңындағы 9 тұрғын алабында (Пригородный, Интернациональный, Мичурин, Күйгенжар, Өндіріс, Железнодорожный, Үркер, Көктал және Промышленный) өтеді. Астана қаласының әкімдігі Александр Масляковтың қатысуымен КВН-ның халықаралық жазғы кубогін, «Барыс Арена» стадионында Олимпиада чемпионы Евгений Плющенко мен мәнерлеп сырғанаудың басқа да жұлдыздарының кешін, қазақстандық және шетелдік эстрада жұлдыздарының қатысуымен музыка өнеріне қосқан үлесі үшін наградалар табыстаумен «Astana Dausy» халықаралық музыка фестивалін ұйымдастыруға мұрындық болады. Елордамызда аталған іс-шараларды өткізудің өзі үлкен жетістік, бұл туристерді тартуға барынша септігін тигізеді деп күтілуде.
Мәдени-бұқаралық шаралар жаз бойы – маусымнан қыркүйек айына дейін өткізіледі. Бұл кезеңде қала әкімдігі 647 шара ұйымдастырады. Жоспарланған шаралар түрлі форматта өткізіледі: халықтық серуен, мәдени-бұқаралық, отбасылық демалыс, фестивальдар, көрмелер, театрландырылған және цирк қойылымдары өтеді. Сонымен бірге, ЭКСПО көрмесінің ресми ашылу және жабылу салтанатын қаланың үш ауданында тікелей эфирден тамашалауға болады – үлкен LED экрандар «Бәйтерек» монументінің алдындағы алаңда, қалалық алаңда және Студенттік саябақта орнатылады.
Жаздың үш айында Астаналық, Студенттік, Жерұйық, Президенттік және Арай саябақтарында «Саябақтың жеті кереметі» атты шаралар өткізіледі. Қазақ ертегілерінің, «Суық жүрек» мультфильмінің кейіпкерлерінің, Өрмекші адамның және диснейлік кейіпкерлер мен роботтардың қатысуымен 7 тақырыптық бағдарлама көпшілік назарына ұсынылады. Шоу жұмыс және демалыс күндері – күніне 2 рет өтеді. Жалпы алғанда, саябақтарда балалар мен ересектерге арналған мыңнан аса ойын-сауық шарасы ұйымдастырылады.
Сулы-жасыл желек бульвары ашық аспан аясындағы көрме павильонына айналады. Мұнда ІІІ Astana Art Fest халықаралық фестивалі ұйымдастырылады. Бұл елорда тұрғындары мен қонақтарының сүйікті шараларының бірі.
Өткізіле бастағаннан бергі екі жылда оған әлемнің 10 мемлекетінен 78 суретші қатысқан, ал келушілер саны жарты миллионнан асты. Биыл шараға әлемнің 9 елінен суретшілер, дизайнерлер, сәулетшілер, музыканттар мен режиссерлер атсалысады. Дайын жұмыстар желекжолға 1 маусымнан бастап қойылады, ал фестиваль маусымның 10-ы күні ашылады.
Елордада ЭКСПО-2017 халықаралық көрмесі сияқты ірі шара аясында ұлттық ерекшелікті паш ететін шаралар да көптеп ұйымдастырылады. Олардың бірі – дәстүрлі қазақ музыкасының «Астанаға тарту» концерті. Көрермендер «Жетісу», «Арқа», «Сыр» және «Батыс» атты дәстүрлі ән айтудың төрт мектебі өкілдерінің орындауында қазақ халқының бай фольклорымен танысады. Бұдан басқа, халық аспаптары оркестрлерінің «Серпер» фестивалі, үрмелі аспаптар оркестрлерінің «Астана самалы» фестивалі өтеді. Театр апталығын ұйымдастыру дәстүрі бұдан 5 жыл бұрын қалыптасқан. Жыл сайын «Сахнадан сәлем» фестивалінде Қазақстан мен шет мемлекеттердің үздік театр ұжымдары бас қосады.
Сонымен бірге, қала күні аясында Астанада қазақстандық эстраданың танымал орындаушыларының концерттері өтеді. Биыл қаланың концерт залдарында «Музарт», «Дервиши» топтарының концерттері, Секен Тұрысбектің және Алтынбек Қоразбаевтың шығармашылық кештері ұйымдастырылады. Барлық концерттерге билеттер қаланың кассаларында және www.koncertyastany.kz сайтында сатылады.
ЭКСПО-2017 халықаралық көрмесі аясында өтетін мәдени шаралар жоспарына түрлі жанрлардағы концерттер енгізілген. 23 және 24 маусымда «Бәйтерек» монументінің алдындағы алаңда «The Spirit of Astana» қазіргі заманғы этностық музыка фестивалі өтеді. Сахна төрінде Африка, АҚШ, Македония, Грузия, Венгрия, Ресей, Қазақстан, Башқұртстан, Бурятия және Тува мемлекеттерінің музыкалық ұжымдары өз өнерлерін ортаға салады. 15 шілдеде италиялық музыканы сүйетін қауым «Звезды Сан-Ремо в Астане» фестивалін тамашалайды. Отбасылық демалысқа арналған шаралардың бірі – «Азия жаңғырығы» атты X халықаралық цирк өнері фестивалі. Сонымен қатар, жастарға арналған «Energy Party» электронды музыка фестивалі және «International Street dance Session in Astana» көше биі фестивалі өтеді.
30 маусымнан 2 қыркүйекке дейін әр демалыс сайын «Бәйтерек» монументінің алдындағы алаңда, қалалық алаңда және Студенттік саябақта ашық аспан аясында «Есіл кештері» концерттері ұйымдастырылады. Бұдан басқа, халықаралық көрме барысында Astana Game Fest алғашқы геймерлер фестивалі өтеді. Шара аясында компьютерлік ойындар бойынша халықаралық жарыстар, роботты техникадан шеберлік сабақтары, жаңа ойындардың презентациялары, дрондар шоуы өткізіледі.
ЭКСПО халықаралық көрмесі кезінде өтетін шаралар бағдарламасына көптеген спорттық жарыстар да енгізілді. Мамыр айының ортасынан бастап жексенбі күндері Астаналық, Жерұйық және Студентік саябақтарда Astana Fitness Park шарасы өтеді. Оның барысында кәсіпқой бапкерлердің жетекшілігімен кроссфит, йога, зумба және басқа спорт түрлері бойынша жаттығу жасауға қатысуға болады. 25 маусымда Астанада дуатлоннан үшінші рет қалалық турнир өткізіледі. Оған 18 жастан асқан барлық азаматтар қатыса алады.
Жаһандық көрме жалауы желбіреген күндері елордада дәстүрлі Қала күні мерекесі салтанатты жағдайда аталып өтілмек. Яғни тәуелсіз Қазақстанның елордасы – Астананың тойы да жаһандық сипат алады. Ақиқатын айтқанда, ЭКСПО-2017 көрмесінің жалауы желбірейтін үш айда елордамыз әлемдік басқосулар мен ірі мәдени көпшілік шаралар өтетін орталыққа айналмақ.
Жылқыбай ЖАҒЫПАРҰЛЫ,
«Егемен Қазақстан»
