Сыр өңірінде нейрореабилитациялық орталық ашылды

Қызылорда қаласындағы №3 емхананың базасында инсультпен ауырған науқастарға нейрореабилитациялық орталық ашылды. Бұл туралы өңірлік коммуникациялар қызметінде өткен баспасөз мәслихатында облыстық денсаулық сақтау басқармасының басшысы Ақмарал Әлназарова мәлімдеді, деп хабарлады ҚазАқпарат. Ол бұған дейін  Қазалы теміржол ауруханасында 15 орындық нейрореабилитациялық бөлімі бар ІІ деңгейлі инсульттық орталық ашылғанын да айтты. Айта кеткен жөн, жаңа Орталық Арал, Қазалы, Қармақшы аудандары мен Байқоңыр қаласының тұрғындарына да қызмет көрсетеді. «Аймағымыздағы барлық медицина ұйымдарында науқастарды қолдау қызметтері құрылды. Халыққа қызмет көрсету сапасын жоғарылату мен ұзын-сонар кезекті болдырмау мақсатында БМСК ұйымдарындағы тіркеу бөлімінің жұмысы оңтайландырылды. Осы жылдың ақпан айында алғаш рет Emdeu.kz бірыңғай ақпараттық платформасы құрылып, Call-центр қызметінің аясы кеңейе түсті. Оған бюджеттен 5 млн теңге қаржы бөлінді. Бұл жүйе интернет, телефон арқылы қажетті дәрігерге жазылуға немесе үйде отырып-ақ дәрігерді шақыруға мүмкіндік береді», – дейді басқарма басшысы.