Бакуде өткізілген темір жол әкімшіліктерінің басшылары Қ.Алпысбаев, Д.Гурбанов, М.Бахтадзенің жұмыс барысындағы кездесуінде Қазақстан, Әзербайжан, Грузия арасында жүк тасымалы көлемін өсіру туралы мәселе талқыланды, деп хабарлады «Қазақстан темір жолы» ҰК» АҚ-тың баспасөз қызметі.
Кездесуге қатысушылар үш ел арасындағы Транскаспий халықаралық дәлізімен 2017 жылы жүк ағынын ұлғайту үшін жұмсақ тариф саясатын ұстанудың қажеттігін алға тартты. 2020 жылға қарай аталған бағытта контейнерлік пойыз мың данаға дейін жеткізілмек.
«Қазақстан темір жолы» ҰК» АҚ басшысы Қанат Алпысбаев жұмыс сапары аясында «Грузия темір жолы» АҚ бас директоры Мамуко Бахтадземен, «Әзербайжан темір жолдары» ЖАҚ төрағасы Джавид Гурбановпен екіжақты келіссөздер өткізді. Тараптар көлік және логистика салаларындағы өзара серіктестікті одан әрі дамыту, оның ішінде темір жол көлігі машинасын жасау жайын талқылады.
Д.Гурбановпен кездесуде ағымдағы жылы Әзербайжанға «Локомотив құрастыру зауыты» АҚ-тың өнімі «Evolution» сериясындағы 10 жүк тепловозы жіберілгендігі айтылды. Келесі жылдан бастап Әзербайжан теміржолына «Электровоз құрастыру зауыты» ЖШС өндірісінен шыққан электровоздар жіберіле бастайды. 2019 жылға дейін Әзербайжанға 40 электровоз жеткізу жоспарланып отыр.
Кездесу соңында «Қазақстан темір жолы» ҰК» АҚ пен «Әзербайжан темір жолдары» ЖАҚ арасында Темір жол көлігі машиналарын жасау саласындағы серіктестік туралы меморандумға қол қойылды. Темір жол көлігі машинасын жасау саласындағы серіктестік туралы меморандум «Грузия темір жолы» АҚ-пен де жасалды.
«Қазақстан темір жолы» ҰК» АҚ басшысы Қанат Алпысбаев Душанбеге сапарында «Рохи охани Точикистон» МУК бастығы Комил Мирзоалимен келіссөз жүргізді. Кездесудің күн тәртібіне сәйкес темір жол көлігі машиналарын жасау саласындағы серіктестікті дамыту мен Тәжікстан аумағында жүктерді шоғырландыру және тасымалдау көлемін арттыру мәселесі қаралды. Сондай-ақ, 2017-2020 жылдары қазақстандық темір жол көлігі машиналарын тәжік темір жолына жеткізу туралы келісім жасалды.